पार्किङको ठेकेदारले जति दियो त्यत्तिमै चित्त बुझाउन बाध्य काठमाडौं महानगर

पार्किङको ठेकेदारले जति दियो त्यत्तिमै चित्त बुझाउन बाध्य काठमाडौं महानगर

A+ A A-

८ माघ २०७५ मा काठमाडौं महानगरपाहिका र ह्विल्स ट्रुली योर्स कम्पनीबीच स्मार्ट पार्किङको सम्झौता भयो । उक्त सम्झौताको १६औँ बुँदामा लेखिएको छ, ‘दोस्रो पक्ष (ठेकेदार कम्पनी)ले पार्किङ क्षेत्रमा भइरहेका गतिविधिहरूलाई प्रथम पक्ष (महानगर)ले समेत जानकारी पाउन सक्ने गरी प्रविधिमार्फत महानगरसँग लिङ्क गर्नुपर्नेछ ।’

आर्थिक पारदर्शिताका लागि यो बुँदा महत्त्वपूर्ण छ । किनभने ३ वर्षसम्म पार्किङबाट उठेको पैसाको २० प्रतिशत महानगरले पाउने र त्यसपछि ३० प्रतिशत पाउने सम्झौता उल्लेख छ । यसो हुँदा महानगरले कति सवारीसाधन पार्किङ भयो, कति पैसा उठ्यो भन्ने रियल टाइम जानकारी पाउँथ्यो ।

तर, सम्झौताको ४ वर्षसम्म पनि ठेकेदार कम्पनीले महानगरलाई रियल टाइम लिङ्क गराएको छैन । कम्पनीले जति पैसा दियो, त्यति नै हात थाप्न महानगर बाध्य भएको महानगरका एक कर्मचारीले बताए । ‘उनीहरूले रियल टाइम हेर्न मिल्ने डिभाइस जोडेका छैनन् । तर, फिल्डका पार्किङ कर्मचारीको हातमा हुने डिभाइसबाट हेर्न मिल्छ भनेका छन् । त्यसकै आधारमा तिरेका हौँ भनेर ठेकेदारले भनेका छन् । महानगरले हेर्न चाहे दिन्छौँ भनेका छन् रे,’ ती कर्मचारीले भने ।

ठेकेदार कम्पनीलाई रियल टाइम डिभाइस ल्याउन भनिएको र कम्पनीले ल्याइसकेको पनि महानगरका सार्वजनिक निजी साझेदारी एकाइ प्रमुख महेश काफ्लेले बताए ।

‘म यो एकाइमा आएको धेरै नभएका कारण योभन्दा पहिले के भयो, धेरै जानकारी छैन । म आएपछि उक्त डिभाइस ल्याउन लगाएको छु । उनीहरूले डिभाइस ल्याएर सेटिङ मिलाएका छन् । २/४ दिनमा रियल टाइम निरीक्षण गर्न सकिन्छ,’ उनले शिलापत्रसँग भने । योबाहेक पार्किङमा कलरिङ गर्न, नम्बरिङ गर्न, एलईडी डिस्प्ले मर्मत गर्न पनि लगाइएको उनले जानकारी दिए ।

ठेकेदार मालामाल, महानगरलाई बाछिटा

स्मार्ट पार्किङमा लापर्वाही मात्र होइन, ठेक्कानै कम्पनीको पक्षमा रहेको देखिन्छ । ५ वर्षको सम्झौतामा ३ वर्ष कम्पनीले महानगरलाई पार्किङबाट उठेको २० प्रतिशत र त्यसपछि ३० प्रतिशत दिनुपर्ने भन्ने छ । महानगरले पाउने रकम पाएकाे छैन तर ठेकेदार कम्पनी भने मालामाल बनेको छ ।

हालसम्म कम्पनीले महानगरलाई पहिलो ३ वर्ष २० प्रतिशत र त्यसपछि ३० प्रतिशत गरी १ करोड ९२ लाख ५७ हजार ६ सय ८० रुपैयाँ ६१ पैसा रोयल्टी बुझाएको छ । तर, कम्पनीले पार्किङबाट करिब ८ करोड उठाएको छ ।

याे पनि पढ्नुहाेस् :

काठमाडाैं महानगर : पार्किङको ठेकेदारले लत्यायो सम्झौता, आर्थिक पाटो बेहिसाब

प्रकाशित मिति: बुधबार, फागुन १७, २०७९ १८:१५