काठमाडाैं महानगर : पार्किङको ठेकेदारले लत्यायो सम्झौता, आर्थिक पाटो बेहिसाब

काठमाडाैं महानगर : पार्किङको ठेकेदारले लत्यायो सम्झौता, आर्थिक पाटो बेहिसाब

A+ A A-

८ माघ २०७५ काठमाडौं महानगरपालिका र ह्विल्स ट्रुली योर्स प्रालीबीच स्मार्ट पार्किङबारे सम्झौता भयो । त्यसको ४ महिनापछि जेठ २०७६ देखि निकै तामझामसाथ काठमाडौंका विभिन्न ५ स्थानमा स्मार्ट पार्किङ लागू गरियाे ।

सुरुमा पाइलट प्रोजेक्टको रूपमा आरबी कम्प्लेक्सअगाडि, विशाल बजारअगाडि इन्द्रचोक जाने सडक, न्युरोडको रामेश्वर मिठाइ पछाडिको भाग, धर्मपथ, पाको गरी पाँच ठाउँमा पार्किङ सुरु गरिएको थियो । कम्पनीले अघिल्लो ३ वर्ष प्रत्येक सवारी साधनको २० प्रतिशत शुल्क र त्यसपछिका वर्षहरूमा ३० प्रतिशत रोयल्टी महानगरलाई तिर्नुपर्ने सम्झैतामा उल्लेख छ । महानगरले चाहिँ पार्किङको लागि दुई पांग्रे सवारीले प्रतिघन्टा २५, चार पांग्रेले ६० रुपैयाँ तिर्नुपर्नेगरी शुल्क निर्धारण गरिएकाे छ ।

यो प्रोजेक्टको विशेषता के थियो भने, यी क्षेत्रमा जानुअघि पार्किङ खाली छ कि छैन भनेर ‘पार्क केटीएम’ नामक एपमार्फत रियल टाइममा कुन ठाउँ खाली छ भनेर हेरेर आफूलाई उपयुक्त लागेको स्थानमा १५ मिनेटअघि बुकिङ गर्न मिल्ने सुविधा थियो । त्यस ठाउँमा पार्किङको अवस्था जानकारी दिन एलईडी स्कृन राखिने र अनलाइन बुक नगरेकाहरूले त्यही स्क्रिन हेरेर रिजर्भ नभएको पार्किङ गर्ने ठाउँ हेर्न पाउने सम्झाैतामा उल्लेख थियो ।

यसले पार्किङ व्यवस्थापन र आर्थिक पाटो पनि पारदर्शी हुने महानगरको विश्वास थियो । तर सम्झाैता कागजमै सीमित भएकाे छ । ठेकेदार कम्पनीले महानगरसँगकाे सम्झौताअनुसार काम नगरेकाे पाइएकाे छ ।

सम्झौताको ५ औँ बुँदामा पार्किङ क्षेत्र अग्रिम बुकिङ र तथा पार्किङ शुल्क भुक्तनीका लागि प्रविधि प्रयोग गरी आधुनिक पार्किङ प्रणली अवलम्बन गर्नुपर्ने लेखिएको छ । कम्पनीले एप संचालनमा राखेको त छ तर त्यसमा राखिएकाे नम्बरमा फोन उठ्दैन । रोचक त के भने, सबै पार्किङ क्षेत्रको लागि एउटै नम्बर दिइएको छ । हाल सुरुवाती चरणमा राखिएको एलईडी स्क्रिन पनि छैन ।

सम्झौताको १६ औँ बुँदामा दोस्रो पक्षले पार्किङ क्षेत्रमा भइरहेका गतिविधिलाई प्रथम पक्षले समेत जानकारी पाउन सक्नेगरी प्रविधिमार्फत महानगरलाई लिङ्क गर्नुपर्ने उल्लेख छ ।

तर यो प्रविधि हालसम्म प्रयोग नै नभएको महानगरका सार्वजनिक निजी साझेदारी एकाई प्रमुख महेश काफ्ले बताउँछन् । अब कम्पनीले कति पैसा उठायो भन्नेमै प्रश्न उठ्छ ।

‘सम्झौताअनुसार काम भएको छैन, त्यसलाई हामी सुधार गर्दै छौँ । सफ्टवेर इन्स्टल गर्दै छौँ’, उनले भने 'यसबीचमा के-के भयो मलाई जानकारी छैन । उनीहरूलाई बोलाएर कुरा बुझ्छु ।’

उता ह्विल्स ट्रुली योर्स प्रालिका कार्यकारी निर्देशक शैलेसराज कुँवर भने महानगरसित भएकाे सम्झाैताअनुसार काम भइरहेकाे दाबी गर्छन् ।

‘आज हाम्रो कार्यालयमा काम गर्ने स्टाफ व्यक्तिगत कामले बाहिर गएकाले २/३ घण्टा फोन नउठेको हो । त्यस्तै केही समयअघि ट्रकले एलईडी डिस्प्लेमा ठोकेको कारण एक ठाउँमा मात्र डिस्प्ले बिग्रिएको हो’, उनले भने ।

तस्वीर – सुशील श्रेष्ठ/शिलापत्र

प्रकाशित मिति: शनिबार, फागुन १३, २०७९ ०९:१३