सन्दीप ३ बजे नै उडे यूएई, भोलिको खेल खेल्ने

A+ A A-

क्रिकेटर सन्दीप लामिछाने आईसीसी क्रिकेट विश्वकप लिग टु अन्तर्गत त्रिदेशीय सिरिज खेल्न आज दिउँसो ३ बजे नै यूएई प्रस्थान गरेका छन् ।

नेपाल क्रिकेट संघ (क्यान)का अनुसार सन्दीपले आईसीसीबाट स्वीकृति पाएर आजै दिउँसो ३ बजे यूएई प्रस्थान गरेको जनाएको छ । क्यानका कार्यवाहक सचिव दुर्गाराज पाठकले सन्दीप त्रिदेशीय सिरिज खेल्न गइसकेको बताए । उनले भने, ‘सन्दीप ३ बजे नै यूएई उडिसकेका छन् । हामीले आईसीसीको स्वीकृति पाएसँगै पठाएका हौँ ।’

नेपालले भाेलि घरेलु टिम यूएईसँग प्रतिस्पर्धा गर्दैछ । सन्दीप मैदानमा देखिनेछन् । सन्दीपले मौसम ढकालको स्थानमा टिममा मौका पाएका हुन् । मौसम ढकाल घाइते छन् ।

सोमबार सर्वाेच्च अदालतले सन्दीपलाई पुनः थुनामा राख्न नपर्ने आदेश दिँदै विदेश जानसमेत अनुमति दिएको थियो ।

नेपाल क्रिकेट संघ (क्यान) ले सोमबार नै आईसीसीलाई पत्राचार गर्दै सन्दीपलाई लिग टुको त्रिदेशीय सिरिज खेल्न दिन आग्रह गरेको थियो । आईसीसीले अध्ययन गरेपछि सन्दीपलाई यूएईमा जारी सिरिज खेल्न दिने निर्णय गरेको हो ।

सोमबार नाबालिग बलात्कारको अभियोगमा मुद्दा खेपिरहेका सन्दीपलाई सर्वोच्च अदालतका न्यायाधीशद्वय सपना प्रधान मल्ल र कुमार चुँडालको संयुक्त इजलासले पुर्पक्षमा राख्नु नपर्ने निर्णय गर्दै विदेश जान अनुमति दिएको थियो ।

यसअघि उच्च अदालत पाटनले कडा सर्तससहित धरौटीमा रिहा गर्ने आदेश दिएको थियो । त्यसविरुद्ध सरकारी वकिलको कार्यालयले सर्वोच्चमा पुनरावेदन गरेको थियो । पाटन अदालतले विदेश जान रोक लगाएपछि सन्दीपले पनि सर्वाेच्चमा पुनरावेदन गरेका थिए ।

प्रकाशित मिति: बुधबार, फागुन १७, २०७९ १६:१९