ब्यवसायीलाई अर्थमन्त्रीले भनेः तुरुन्तै ब्याज घटाउन सकिदैन

A+ A A-

अर्थमन्त्री डा. युवराज खतिवडाले उद्योगी ब्यवसायीहरुलाई बैंकको ब्याज तत्कालै घटाउन नसकिने जानकारी गराएका छन् ।

बैंकको ब्याज महंगो भएको भन्दै आन्दोलित उद्योगी ब्यवसायीका कुरा सुनेर उचित निष्कर्ष निकाल्न प्रधानमन्त्री केपी शर्मा ओलीले निर्देशन दिएपछि अर्थमन्त्री डा. खतिवडाले सरोकारवालालाई छलफलमा बोलाएका थिए ।

छलफलमा अर्थमन्त्री डा. खतिवडाले क्रमिकरुपमा ब्याज घटाउने जवाफ दिएका बैठकमा सहभागी मोरङ ब्यापार संघका अध्यक्ष पवन कुमार सारडाले जानकारी दिए ।

‘अर्थमन्त्रीज्यूले तुरुन्तै ब्याज घटाउन सकिदैन भन्नुभयो, तर गृहकार्य गरेर के कस्तो गर्न सकिन्छ त्यो हेरौंला भन्नुभएको छ, समस्याको समाधान भएन भने १५ दिनपछि फेरि बैठक बसेर अर्काे निष्कर्षमा पुगौं भन्नुभयो,’ अध्यक्ष सारडाले शिलापत्रसँग भने ।

अर्थमन्त्री डा. खतिवडाले नियामक निकायले गर्ने काममा सरकारले प्रत्येक्ष रुपमा हस्तक्षेप नगर्ने प्रष्ट पारेको नेपाल उद्योग परिसंघको बैंकिङ समितिका संयोजक अनलराज भट्टराईले जानकारी दिए । भट्टराई पनि सो बैठकमा सहभागी थिए ।

‘सरकारले प्रत्येक्ष रुपमा गर्नुपर्ने काम तत्काल गर्छ, तर नेपाल राष्ट्र बैंक, बीमा समिति, धितोपत्र बोर्ड जस्ता नियामक निकाय मार्फत हुने काम ती निकायहरुले नै गर्छन्, यसमा सरकारले प्रत्येक्ष हस्तक्षेप गर्दैन भनेर अर्थमन्त्रीज्यूले प्रष्ट रुपमा भन्नुभयो,’ संयोजक भट्टराईले भने ।

छलफलमा अर्थमन्त्री डा. खतिवडाले उद्योगी ब्यवसायी र बैंकर जिम्मेवार रुपमा प्रस्तुत हुनुपर्ने बताएका थिए । उनले उच्चस्तरीय वित्तीय समितिलाई थप संक्रिय बनाएर समस्याको बारेमा छलफल गरी उपयुक्त निकाय तत्काल दिने पनि बताएका थिए ।

बैठकमा उद्योगी ब्यवसायीका प्रतिनिधिमूलक संस्थाका प्रतिनिधि, बैंकर्स संघका प्रतिनिधि, विकास बैंकका प्रमुख कार्यकारी अधिकृतहरु लगायत सहभागी थिए । यस्तै नेपाल राष्ट्र बैंकका गभर्नर लगायत पदाधिकारी पनि बैठकम सहभागी थिए ।

अर्थमन्त्रीले ब्यवसायी सहित सरोकारवालासँग छलफल गरेपछि नेपाल राष्ट्र बैंकका गभर्नर डा. चिरन्जीबी नेपाल र अर्थसचिब डा. राजन खनाल सहित राष्ट्र बैंक र अर्थमन्त्रालयका उच्च पदाधिकारीको बैठक बसेको छ ।

याे पनि हेर्नुहाेस

ब्यापारीले पाउँलान् त ९ प्रतिशत ब्याजमा ऋण ?

राष्ट्र बैंक जमिनदार भयो, बैंकहरू साहु महाजनः सारडा