धनुषामा प्रहरी हिरासतबाट फरार भएका ६ जनामध्ये एक जना पक्राउ

A+ A A-

धनुषास्थित इलाका प्रहरी कार्यालय सखुवा महेन्द्रनगरको हिरासतबाट फरार भएका छ जनामध्ये एक जना पक्राउ परेका छन् ।

फरार भएकामध्ये रोशन महतोलाई प्रहरीले आज पक्राउ गरेको हो । जिल्ला प्रहरी कार्यालय धनुषाका प्रहरी नायव उपरीक्षक तथा प्रवक्ता प्रदीप क्षेत्रीले हातहातियार तथा खरखजना मुद्दामा हिरासतमा रहेका मिथिला नगरपालिका- ६ बस्ने महतोलाई फरार भएको १० घण्टामा पक्राउ गरिएको जानकारी दिए ।

गएराति विभिन्न मुद्दामा पक्राउ परी क्षीरेश्वर नगरापालिकास्थित इलाका प्रहरी कार्यालयको थुनुवा कक्षमा रहेका अभियुक्तहरू थुनुवा कक्षको पर्खाल तोडेर फरार भएका थिए ।

धनुषामा पर्खाल तोडेर ६ जना थुनुवा फरार

फरार भएकामध्ये पाँच जना भने अझै पक्राउ परिसकेका छैनन् । प्रहरीका अनुसार क्षीरेश्वर नगरपालिकाका लागुऔषध मुद्दाका अभियुक्त ३० वर्षीय विनोदकुमार शर्मा, राष्ट्रसेवक बाधा विरोध मुद्दाका २५ वर्षीय अमित मण्डल, राष्ट्रसेवक बाधा विरोध मुद्दाका २५ वर्षीय रोशन यादव पक्राउ परेका छैनन् । त्यस्तै मिथिला नगरपालिका–२ बस्ने अभद्र व्यवहार मुद्दाका २५ वर्षीय हरिदीप सिंह र सोही नगरपालिका–६ बस्ने हातहतियार तथा खरखजाना मुद्दाका ३६ वर्षीय शंकर सिंह अझै फरार छन् ।

छ जनामध्ये मिथिला नगरपालिका वडा नम्बर–६ बस्ने २८ वर्षीय रोशन महतो र सोही ठाउँ बस्ने ३६ वर्षीय शंकर महतोलाई प्रहरी पेस्तोलसहित पक्राउ गरेको भनेर गत शनिबार पत्रकार सम्मेलन गरेर सार्वजनिक गरेको थियो ।

प्रहरी निरीक्षक वेतन यादवको कमजोर कमान्डका कारण भागेका थिए ६ जना थुनुवा, निलम्बनको तयारी

प्रहरीले फरार भएकाहरूको खोजी कार्य तीव्र बनाएको जनाएको छ । जिल्ला प्रहरी कार्यालय धनुषाले घटनाको छानबिनको लागि प्रहरी नायव उपरीक्षक प्रदीप क्षेत्रीको संयोजकत्वमा ७ सदस्यीय छानबिन समिति गठन गरेको छ ।

छानबिन समितिको सिफारिसमा तत्काल गएर राति ड्युटीमा लापरबाही गर्ने प्रहरी अधिकृत, प्रहरी असई, गार्ड कमाण्डर प्रहरी वरिष्ठ हबल्दार र एक प्रहरी जवानलाई निलम्बन गरिएको धनुषाका प्रहरी उपरीक्षक विश्वराज खड्काले जानकारी दिए ।

प्रकाशित मिति: सोमबार, माघ १६, २०७९ २०:२३