प्रहरी निरीक्षक वेतन यादवको कमजोर कमान्डका कारण भागेका थिए ६ जना थुनुवा, निलम्बनको तयारी

प्रहरी निरीक्षक वेतन यादवको कमजोर कमान्डका कारण भागेका थिए ६ जना थुनुवा, निलम्बनको तयारी

A+ A A-

धनुषामा प्रहरीकै लापर्वाहीले थुनावा भागेको खुलेको छ । धनुषा क्षिरेश्वरनाथ नगरपालिकास्थित इलाका प्रहरी कार्यालय सखुवा महेन्द्रनगरको हिरासत कक्षबाट आइतबार साँझ ६ जना थुनुवा भागेका थिए ।

प्रहरी स्रोतका अनुसार इलाका प्रहरी कार्यालय प्रमुख प्रहरी निरीक्षक वेतन यादवकै कमजोरीका कारण थुनुवा भागेका हुन् । थुनुवा कक्षको सीसीटीभी मोनिटरिङ प्रहरी निरीक्षक यादवकै कार्यकक्षमा राखिएको थियो । तर, उनकै लापर्वाहीका कारण थुनुवा भाग्न सफल भए ।

मधेस प्रदेश प्रहरी प्रमुख प्रहरी नायब महानिरीक्षक (डीआईजी) वसन्तबहादुर कुँवरले इलाका प्रहरी कार्यालय प्रमुख यादवकै कमजोर कमान्डका कारण थुनुवा भागेको भन्दै उनलाई कार्यालय प्रमुखको जिम्मेवारीबाट हटाएर प्रदेश कार्यालय तानिएको बताए ।

सात जना थुनुवा रहेकोमा ६ जना थुनुवा हिरासत कक्षको पर्खालै फोडेर फरार भएका छन् । धनुषा प्रहरीका अनुसार फरार हुने थुनुवाहरूमा क्षिरेश्वरनाथ नगरपालिका– ५ का लागुऔषध मुद्दाका अभियुक्त ३० वर्षीय विनोदकुमार शर्मा, सोही नगरपालिका–२ का २५ वर्षीय अमित मण्डल, सोही स्थानका २५ वर्षीय रोशन यादव छन् ।

त्यस्तै, मिथिला नगरपालिका–२ बस्ने अभद्र व्यवहार मुद्दाका २५ वर्षीय हरिदीप सिंह, सोही स्थानका हातहतियार तथा खरखजाना मुद्दाका २८ वर्षीय रोशन महतो र हातहतियार तथा खरखजाना मुद्दाका ३६ वर्षीय शंकर सिंह छन् ।

एक जना भने उनीहरूले भत्काएको पर्खालको प्वालभित्र छिर्न नसक्दा भाग्न नसकेको डीआईजी कुवँरको भनाइ छ । फरार थुनुवाहरूले थुनुवा कक्षकै लागि बनाएको शौचायलको ग्रिल तोडेर सोही ग्रिलको सहाराले पर्खालमा समेत प्वाँल पारेर भाग्न सफल भएको खुलेको छ ।

डीआईजी कुवँर भन्छन्, ‘उनीहरूले केही दिनअघिदेखि नै भाग्ने योजनासहित पर्खालमा प्वाल पार्ने काम गरेको देखिन्छ । हिजो रातिको कुरा मात्रै होइन । योजनाबद्ध तरिकाले भागेका हुन् ।’

डीआईजी कुँवरका अनुसार लागुऔषध मुद्दाका अभियुक्त विनोदकुमार शर्माको मुख्य योजनामा पर्खाल भत्काउने काम भएको खुलेको छ । उनीहरूको खोजीकार्यमा ठूलो मात्रामा प्रहरी परिचालन गरिएको छ ।

प्रहरी निरीक्षक यादवको कजोरी देखिएपछि उनलाई प्रदेश प्रहरी कार्यालय जनकपुर तानेर आन्तरिक अनुसन्धान सुरु गरिएको छ । उनलाई निलम्बन गर्न आन्तरिक प्रक्रिया थालिएको प्रहरी प्रधान कार्यालयको भनाइ छ ।

प्रहरी निरीक्षकदेखि माथिका प्रहरी अधिकारीलाई गृह मन्त्रालयले निलम्बन गर्ने कानुनी व्यवस्था छ ।

प्रकाशित मिति: सोमबार, माघ १६, २०७९ १४:२८