'निर्णय प्रधानमन्त्रीको, पुत्ला दहन शिक्षामन्त्रीको ?'

A+ A A-

एकीकृत समाजवादी पार्टी निकटको विद्यार्थी संगठन अनेरास्ववियूले गत १३ माघमा शिक्षामन्त्री शिशिर खनालको पुत्ला जलायो । पाठ्यपुस्तक छपाइको जिम्मा निजी क्षेत्रलाई दिएको भन्दै अनेरास्ववियूले शिक्षामन्त्री खनालको पुत्ला जलाएको हो ।

तर, निजीलाई पाठ्यपुस्तक छपाइ गर्न दिने निर्णय उनी मन्त्री हुनु पहिले नै भएको पाइएको छ । मन्त्रालयले कक्षा १ देखि कक्षा ५ सम्मको पाठ्यपुस्तक निजी क्षेत्रलाई छपाइका लागि दिने निर्णय २९ पुसमा गरेको थियो । मन्त्रालयका अनुसार प्रधानमन्त्री पुष्पकमल दाहाल प्रचण्डले उक्त निर्णय गरेका थिए । मन्त्री खनालले ३ माघमा शिक्षा, विज्ञान तथा प्रविधि मन्त्रालय सम्हालेका थिए ।

‘निजीमा पुस्तक छाप्न लाग्यो भनेर शिक्षामन्त्रीको पुत्ला जल्यो । तर निजीलाई दिने निर्णय मेरो थिएन । पुत्ला दहन भनेको सुन्दा हासेँ,’ आइतबार शिक्षा पत्रकार सञ्जाल नेपाल (इजोन) को वार्षिक साधरणसभामा मन्त्री खनालले भने । निजीलाई पुस्तक छपाइ दिने प्रक्रिया २०६४ सालदेखि चलिरहेको मन्त्री खनालले स्मरण गराए ।

‘यो ०६४ सालदेखि भएको रहेछ । मलाई भोट हाल्ने मानिस भ्रममा पर्नुभयो । निजीलाई दिएर भ्रष्टाचार गर्‍यो भन्ने परेछ । मेरो सहभागिता छैन,’ उनले भने । यसवर्ष समयमै पाठ्यपुस्तक पुर्‍याउने गरी छलफल गरिरहेको मन्त्री खनालले बताए । ‘जनक शिक्षासँग नियमित छलफल गरिरहेका छौँ,’ उनले भने । शिक्षकको तलब ३–४ महिनामा दिइने गरेकोले महिनाको अन्त्यमा पठाइने विषयमान छलफल भइरहेको उनले बताए ।

मन्त्रालयले एनओसी अनलाइनबाट लिने सकिने व्यवस्था गर्ने तयारी गरेको उनले बताए । ‘एनओसी लिन लाइन लाग्छ । तीन चार दिन कुर्नुपर्ने छ । अनलाइनबाट लिन सक्ने बनाउने तयारी छ,’ मन्त्री खनालले भने ।

कार्यक्रममा राष्ट्रिय परीक्षा बोर्डका अध्यक्ष महाश्रम शर्माले संघ, प्रदेश र स्थानीय सरकारले गर्ने काम ऐनमा आउनुपर्नेमा जोड दिए । संघीय शिक्षा ऐन नबन्दा कुन सरकारले के गर्ने ? परीक्षा कसले सञ्चालन गर्ने भन्ने अन्योल छ । माध्यामिक शिक्षा परीक्षाका सम्बन्धमा ऐनमा उल्लेख हुनुपर्ने उनले जोड दिए । ‘ऐन आवश्यक छ । एसईई पनि संघीय शिक्षा ऐनमा आउँछ,’ उनले भने । मन्त्री खनालले शिक्षा ऐन ल्याउन काम सुरु गर्ने बताए ।

प्रकाशित मिति: आइतबार, माघ १५, २०७९ १५:४४