बीवाईडी ठगी प्रकरण फलोअप: राजस्व चुहावटको अनुसन्धान गर्न भन्सारसँग समन्वय गर्दै वाणिज्य विभाग

बीवाईडी ठगी प्रकरण फलोअप: राजस्व चुहावटको अनुसन्धान गर्न भन्सारसँग समन्वय गर्दै वाणिज्य विभाग

A+ A A-

बीवाईडीको नेपालका लागि आधिकारिक वितरक साइमेक्स इन्कले बीवाईडीको ई ६ मोडलको सवारीसाधन अत्यधिक नाफा राखेर बिक्री गरेको विषयमा वाणिज्य, आपूर्ति तथा उपभोक्ता संरक्षण विभागले अनुसन्धान थालेको छ ।

साइमेक्स इन्कले गाडीमा अत्यधिक नाफा राखेर बेचेको सूचना पाएपछि विभागले केही दिनअघि कम्पनीका प्रतिनिधिलाई सोधपुछका लागि बोलाएको थियो ।

साइमेक्स इन्कका प्रतिनिधिको जवाफ चित्त नबुझेपछि विभागले काजगपत्र माग गरेको विभागका महानिर्देशक महेश भट्टराईले जानकारी दिए । उनले शिलापत्रसँग भने, ‘पुस मसान्त भएका कारण उनीहरूले विभागसँग थोरै समय माग गरेका थिए । उनीहरूले कागजपत्र ल्याएपछि थप अनुसन्धान गर्छौं ।’

बीवाईडीको ब्रह्मलुट : एउटै गाडीमा २० लाखभन्दा बढी नाफा

साइमेक्स इन्कले गाडी ल्याउँदा अण्डर भ्यालुएसन (न्यून बीजकीकरण) गरेको हुन सक्ने विभागको आशंका छ ।

महानिर्देशक भट्टराईले भने, ‘एउटै गाडी चीनतर्फको नाका र भारततर्फको नाकाबाट भित्रँदा मूल्य निकै फरक पर्छ । यो १८/२० लाखमा आउने गाडी त होइन । प्रारम्भिक अनुसन्धानका क्रममा यो कालो बजारीभन्दा पनि न्यून बीजकीकरण गरिएको जस्तो देखिन्छ ।’

थप कागजात आएपछि भन्सार विभागको समन्वयमा अनुसन्धान गरिने उनको भनाइ छ । ‘यो राजस्व चुहावटअन्तर्गत पर्छजस्तो लाग्छ । अरु कागजपत्र आएपछि अनुसन्धान गर्छौं,’ उनले भने ।

साइमेक्स इन्कले बीवाईडी ई ६ (२०१५ भर्सन) मा अस्वाभाविक नाफा खाएर बेचिएको देखिएको थियो । २०२२ अप्रिल १८ मा जारी भएको प्रज्ञापनपत्रअनुसार बीवाईडी अटोबाट साइमेक्स इन्कले सातवटा गाडी ७० हजार डलरमा खरिद गरेको थियो ।

त्यो समयमा डलरको मूल्य १२२.१९ रुपैयाँ थियो । यो हिसाबले हेर्दा सातवटा गाडीको कुल मूल्य ८५ लाख ५३ हजार ३ सय पर्छ । प्रज्ञापनपत्र अनुसार ती गाडी रसुवा भन्सारसम्म ल्याउँदा कुल ३३ लाख ८९ हजार २ सय २९ रुपैयाँ खर्च लागेको छ ।

त्यस्तै भन्सार, भ्याट र सडक मर्मतबापत कुल ३६ लाख ४४ हजार २ सय ६३ रुपैयाँ खर्च भएको छ । यी सबै खर्च जोड्दा साइमेक्सको कुल १ करोड ५५ लाख ८६ हजार ७ सय ९२ रुपैयाँ खर्च भएको छ । त्यस्तै, ट्रकमा रसुवा नाकाबाट काठमाडौंसम्म ल्याएको धेरैमा ५० हजार र अन्य खर्च जोड्दा धेरैमा १ लाख रुपैयाँ खर्च हुने एक गाडी व्यवसायीले बताए ।

सबै खर्च जोड्दा सातवटा गाडीको कुल १ करोड ६२ लाख ८६ हजार ७ सय ९२ रुपैयाँ मात्र खर्च भएको देखिन्छ । यसरी हेर्दा एउटा गाडीका लागि कम्पनीले कुल २३ लाख २६ हजार ६ सय ८४ रुपैयाँ खर्चिएको छ । तर, शिलापत्रले प्राप्त गरेको बीजकअनुसार त्यो गाडी कम्पनीले छुटसहित ४५ लाखमा बेचेको छ ।

यो हिसाब गर्दा कम्पनीले एउटै गाडीमा २१ लाख ७३ हजारभन्दा धेरै नाफा लिएको देखिन्छ । कालो बजार तथा अन्य केही सामाजिक अपराध ऐन २०३२ ले लागतमा २० प्रतिशतभन्दा धेरै मुनाफा राख्न नपाइने व्यवस्था छ ।