बीवाईडीको ब्रह्मलुट : एउटै गाडीमा २० लाखभन्दा बढी नाफा

A+ A A-

नेपालमा विद्युतीय सवारीसाधन प्रवर्द्धन गर्न बीवाईडीको ठूलो योगदान छ भन्दा फरक पर्दैन । विद्युतीय सवारीसाधनलाई विश्वास नगर्ने समयमा बीवाईडीको नेपालका लागि आधिकारिक वितरक साइमेक्स इंकले जोखिम मोलेर नेपालमा प्रिमियम विद्युतीय सवारीसाधन भित्र्यायो ।

फलस्वरुप राष्ट्रपति कार्यालय, ऊर्जा मन्त्रालय, नेपाल विद्युत् प्राधिकरणले समेत विद्युतीय सवारीसाधन प्रयोग गर्न सुरुवात गरे । बीवाईडीले नै हो नेपाल विद्युत् प्राधिकरणमा पहिलो चार्जिङ स्टेशन स्थापना गरेको ।

विद्युतीय सवारीसाधन प्रवर्द्धन गर्न ठूलो भूमिका खेलेको साइमेक्सले उपभोक्तामाथि ब्रह्मलुट मच्चाइरहेको खुलेको छ ।

साइमेक्सले बीवाईडी ई ६ (२०१५ भर्सन) मा २१ लाखभन्दा धेरै नाफा खाएको देखिएको छ । शिलापत्रलाई प्राप्त २०२२ अप्रिल १८ मा जारी भएको प्रज्ञापनपत्र अनुसार बीवाईडी अटोबाट साइमेक्सले ७ वटा गाडी ७० हजार डलरमा खरिद गरेको थियो ।

त्यो समयमा डलरको मूल्य डलर मूल्य १२२.१९ थियो । यो हिसाब गर्दा ७ वटा गाडीको कुल मूल्य ८५ लाख ५३ हजार ३ सय पर्छ । प्रज्ञापनपत्र अनुसार ती गाडी रसुवा भन्सारसम्म ल्याउँदा कुल ३३ लाख ८९ हजार २ सय २९ खर्च लागेको छ ।

त्यस्तै भन्सार, भ्याट र सडक मर्मतबापत ३६ लाख ४४ हजार २ सय ६३ रुपैयाँ खर्च भएको छ । यी सबै खर्च जोड्दा साइमेक्सको कुल १ करोड ५५ लाख ८६ हजार ७ सय ९२ रुपैयाँ खर्च भएको छ ।

त्यस्तै, ट्रकमा रसुवा नाकाबाट काठमाडौंसम्म ल्याएको धेरैमा ५० हजार र अन्य खर्च जोड्दा धेरैमा एक लाख खर्च हुने एक गाडी व्यवसायीले बताए । सबै खर्च जोड्दा ७ वटा गाडीमा कम्पनीको कुल १ करोड ६२ लाख ८६ हजार ७ सय ९२ खर्च भएको छ ।

त्यस हिसाबले एउटा गाडीमा कम्पनीले कुल २३ लाख २६ हजार ६ सय ८४ रुपैयाँ खर्चिएको छ । शिलापत्रले प्राप्त गरेको बिलअनुसार त्यो गाडी कम्पनीले छुटसहित ४५ लाखमा बेचेको छ । यो हिसाब गर्दा कम्पनीले एउटै गाडीमा २१ लाख ७३ हजार भन्दा धेरै नाफा लिएको छ ।

सवारीसाधनको नाफाको विषयमा सरोकारवाला निकाय उदासिन बनेको उपभोक्ता अधिकारकर्मी माधव तिमल्सिना बताउँछन् । ‘यसलाई नियमन गर्ने वाणिज्य आपूर्ति तथा उपभोक्ता संरक्षण विभाग हो । तर, विभागले यो क्षेत्रमा खासै अनुगमन गर्न सकेको छैन,’ उनले भने ।

गाडी बिक्रीकर्ता कम्पनीले अत्याधिक नाफा राख्नु सरासर लुट भएको उपभोक्ता अधिकारकर्मी तिमल्सिना तर्क गर्छन् । ‘कालो बजार तथा अन्य केही सामाजिक अपराध ऐन २०३२ ले लागतमा २० प्रतिशतभन्दा धेरै मुनाफा राख्न नपाउने व्यवस्था छ । कि सरकारले यो व्यवस्था गाडीमा लागु हुँदैन भन्नुपर्‍यो । होइन भने दाल-चामलमा चाहिँ यो प्रावधान लागू गर्ने, गाडीमाचाहिँ नगर्ने हो भने खुल्लम खुल्ला लुट हो,’ उनी भन्छन् ।

साइमेक्सले बीवाईडी इसिक्समा अत्यधिक नाफा खाएर बेचेको विषयमा वाणिज्य, आपूर्ति तथा उपभोक्ता संरक्षण विभागले अनुसन्धान सुरु गरिसकेको छ ।

ती गाडी बेच्नका लागि ल्याइएको नभइ रेन्टल प्रयोजनका लागि ल्याइएको बीवाईडीको आधिकारिक बिक्रेता साइमेक्स इन्ककी प्रबन्ध निर्देशक यमुना श्रेष्ठ बताउँछिन् । ‘हामीले त्यो मोडलका कुल २० वटा गाडी ल्याएका थियौँ । तीमध्ये १६ वटा त फिल्डमै चलाएका छौँ । त्योबाहेक हाम्रा केही आफन्तले चलाउनुभएको छ । हामीले ती गाडी बेचेकै छैनौँ,’ श्रेष्ठ भन्छिन् ।

शिलापत्रले प्राप्त गरेको विजकअनुसार भने साइमेक्सले ती गाडी बेचेको छ । कम्पनीले त्यो गाडी ४५ लाख १ पैसामा बेचेको हो ।