१३ वाणिज्य बैंकको वित्तीय विवरणः ‘कटथ्रोट’ प्रतिस्पर्धा, नाफा बढेको बढ्यै

A+ A A-

गत आर्थिक वर्ष गरेको व्यवसायको आधारमा वाणिज्य बैंकहरुले आफ्नो अपरिष्कृत वित्तीय विवरण प्रकाशित गरेका छन् । बैंकहरुले प्रकाशित गरेको विवरणले उनीहरुको नाफा बढेको देखाएको छ ।

बैंकका प्रमुख कार्यकारी अधिकृत र संचालकहरुले बैंकको नाफा कम हुँदै गएको चिन्ता व्यक्त गर्न थालेका छन् । यस्तै उद्योगी व्यवसायीले बैंकहरु आफ्नो नाफा बढाउन चर्काे व्याज असुल गरेर लगानीको वातावरण नै विगार्न लागेको आरोप पनि लगाउन थालेका छन् ।

बैंकको नाफा अहिले चर्चाको विषय भएपनि नाफा भने कम भएको छैन । बैंकहरुले प्रकाशित गरेको वित्तीय विवरणले उनीहरुबीच नाफाको विषयमा तीब्र प्रतिस्पर्धा भएको देखाउँछ ।

स्ट्यान्डर्ड चार्टर्ड बैंक

स्ट्यान्डर्ड चार्टर्ड बैंकले गत वर्ष २ अर्ब ४९ करोड ३६ लाख रुपैयाँ खुद नाफा गरेको छ ।

चार्टर्डले अघिल्लो वर्ष २ अर्ब १८ करोड ९८ लाख ९८ हजार रुपैयाँ खुद नाफा गरेको थियो । चार्टर्डले अघिल्लो वर्षको १३.९४ प्रतिशतले बढाएको छ ।

यो अवधिमा चार्टर्डले वितरणयोग्य नाफा भने १ अर्ब ८० करोड २४ लाख ५३ हजार रुपैयाँ गरेको छ ।

चार्टर्डको खुद ब्याज आम्दानी ३ अर्ब ५२ करोड ३१ लाख ८९ हजार रुपैयाँ छ । अघिल्लो वर्षको सोही अवधिमा उसले ३ अर्ब २९ करोड ८० लाख ३४ हजार रुपैयाँ खुद ब्याज आम्दानी गरेको थियो ।

चार्टर्डको सञ्चालन नाफा ३ अर्ब ४८ करोड ७ लाख ९० हजार रुपैयाँ छ । अघिल्लो वर्षको सोही अवधिमा उसले ३ अर्ब १ करोड ७४ लाख ६४ हजार रुपैयाँ सञ्चालन नाफा गरेको थियो ।

चार्टर्डको प्रतिसेयर आम्दानी ३१ रुपैयाँ १५ पैसा छ । प्रतिसेयर नेटवर्थ १८७ रुपैयाँ छ ।

अघिल्लो वर्ष ४ अर्ब ५१ करोड १० लाख २९ हजार रुपैयाँ जगेडा कोषमा रहेकोमा गत वर्ष यस्तो कोषमा ५ अर्ब १७ करोड २८ लाख ४५ हजार रुपैयाँ पुगेको छ ।

बैंकमा ग्राहकको निक्षेप पनि अघिल्लो वर्षको तुलनामा बढेको छ । अघिल्लो वर्षसम्ममा ६७ अर्ब ६ करोड १० लाख ४७ हजार रुपैयाँ निक्षेप रहेकोमा गत वर्ष बढेर ७५ अर्ब ७३ करोड १५ लाख २७ हजार रुपैयाँ पुगेको छ । बैंकको कर्जा लगानी ५३ अर्ब ११ करोड १ लाख ४१ हजार रुपैयाँ छ ।

चार्टर्डको खराब कर्जा भने घटेको छ । गत वर्ष उसको खराब कर्जा ०.१५ प्रतिशत छ । अघिल्लो वर्ष खराव कजौ ०.१८ प्रतिशत थियो ।

एनसीसी बैंक

नेपाल क्रेडिट एण्ड कमर्श (एनसीसी) बैंकले गत वर्ष १ अर्ब ५२ करोड रुपैयाँ खुद नाफा गरेको छ । एनसीसीले गत वर्ष १३.४३ प्रतिशतले नाफा बढाएको छ । बैंकको अघिल्लो वर्षमा नाफा १ अर्ब ३४ करोड रुपैयाँ थियो ।

एनसीसीले गत असार मसान्तसम्ममा ६७ अर्ब रुपैयाँ निक्षेप संकलन गरेको छ भने ६१ अर्ब १३ करोड रुपैयाँ कर्जा प्रवाह गरेको छ ।

एनसीसीको चुक्ता पूँजी ७ अर्ब १ करोड छ भने रिजर्बमा ३ अर्ब ५९ करोड छ । बैंकले साधरणसभा बोलाएर बल्ल चुक्ता पूँजी ८ अर्ब पुर्याउन आँटेको छ ।

एनसीसीले गत वर्ष वितरणयोग्य नाफा १ अर्ब १९ करोड रुपैयाँ गरेको छ ।

एनसीसीको पूँजीकोष १४.०४ प्रतिशत छ । खराब कर्जा अनुपात २.७८ प्रतिशत छ ।

कर्जा निक्षेप अनुपात ७३.८४ प्रतिशत छ । १०.२३ बेसरेट रहेको एनसीसीको स्प्रेड ४.७० प्रतिशत छ ।

हिमालयन बैंक

हिमालयन बैंकले गत वर्ष ५१ प्रतिशतले नाफा बढाएको छ । उससले २ अर्ब ८४ करोड रुपैयाँ खुद नाफा गरेको हो ।

अघिल्लो वर्ष हिमालयनले १ अर्ब ८७ करोड रुपैयाँ खुद नाफा गरेको थियो । उसको खुद व्याज आम्दानी ५ अर्ब ४ करोड रुपैयाँ छ । अघिल्लो वर्ष हिमालयनले ४ अर्ब ३२ करोड रुपैयाँ खुद व्याज आम्दानी गरेको थियो ।

हिमालयनले १ खर्ब ९ अर्ब रुपैयाँ निक्षेप संकलन गरेको छ भने ९२ अर्ब ८२ करोड रुपैयाँ कर्जा प्रवाह गरेको छ । अघिल्लो वर्ष हिमालयनले ९८ अर्ब ९८ करोड रुपैयाँ निक्षेप संकलन गरेको थियो भने ८२ अर्ब ४७ करोड रुपैयाँ कर्जा तथा लगानी गरेको थियो ।

हिमालयनको जगेडा कोषमा ५ अर्ब ३२ करोड रुपैयाँ जम्मा भएको छ । खराव कर्जा १.४० प्रतिशतबाट १.१२ प्रतिशतमा झरेको छ ।

स्प्रेडदर घटाए पनि उसको स्प्रेडदर अझै ४.४७ प्रतिशत छ । आधार व्याजदर ९.०५ प्रतिशत छ । प्रतिशेयर आम्दानी १० रुपैयाँले बढेर ३३ रुपैयाँ पुगेको छ ।

एनएमबी बैंक

एनएमबी बैंकले गत वर्ष २४ प्रतिशतले नाफा बढाएको छ । उसले २ अर्ब ३१ करोड रुपयाँ नाफा गरेको हो । एनएमबीलसे अघिल्लो वर्ष १ अर्ब ८० करोड रुपैयाँ खुद नाफा गरेको थियो ।

एनएमबीको खुद व्याज आम्दानी ४ अर्ब २६ करोड रुपैयाँ भएको छ । अघिल्लो वर्ष उसको खुद व्याज आम्दानी २ अर्ब ९० करोड रुपैयाँ थियो ।

एनएमबीले ९७ अर्ब ८९ करोड रुपैयाँ निक्षेप संकलन गरेको छ भने ८८ अर्ब ४८ करोड रुपैयाँ कर्जा तथा लगानी गरेको छ ।

अघिल्लो वर्ष एनएमबीले ८३ अर्ब ९७ करोड रुपैयाँ निक्षेप संकलन गरेको थियो भने ७१ अर्ब ७१ करोड रुपैयाँ कर्जा तथा लगानी गरेको थियो ।

एनएमबीले खराब कर्जा थोरैले सुधार गर्दै ०.८२ प्रतिशतमा झारेको छ । स्प्रेडदर ४.१४ बाट ४.२६ प्रतिशतमा आएको छ । आधार व्याजदर ९.८६ प्रतिशत छ ।

एनएमबीको जगेडा कोषमा तीन अर्ब ५३ करोड रुपैयाँ छ । प्रतिसेयर आम्दानी २४ रुपैयाँ पुगेको छ ।

प्राइम बैंक

प्राइम बैंकले गत वर्ष ३७ प्रतिशतले नाफा बढाएको छ । प्राइमले २ अर्ब ३६ करोड रुपैयाँ नाफा गरेको हो । अघिल्लो वर्ष प्राइमले १ अर्ब ७२ करोड रुपैयाँ नाफा गरेको थियो ।

प्राइमले गत वर्ष ३ अर्ब ५९ करोड रुपैयाँ खुद व्याज आम्दानी गरेको छ । अघिल्लो वर्ष उसको खुद व्याज आम्दानी २ अर्ब ६६ करोड रुपैयाँ थियो ।

प्राइमले ७७ अर्ब ४ करोड रुपैयाँ निक्षेप संकलन गरेको छ । यस्तै ७२ अर्ब ५१ करोड रुपैयाँ कर्जा तथा लगानी गरेको छ । अघिल्लो वर्ष प्राइमले ७२ अर्ब ६३ करोड रुपैयाँ निक्षेप संकलन गरेको थियो भने ६७ अर्ब १३ करोड रुपैयाँ ऋण लगानी गरेको थियो ।

प्राइमको जगेडा कोषमा दुई अर्ब ६० करोड रुपैयाँ जम्मा भएको छ । उसको प्रतिसेयर आम्दानी २१ रुपैयाँबाट २५ रुपैयाँ पुगेको छ । प्राइमको स्प्रेड दर ४.३२ प्रतिशत छ ।

नेपाल बंगलादेश बैंक

नेपाल बंगलादेश (एनबी) बैंकले गत वर्ष ४१.५६ प्रतिशतले नाफा बढाएको छ । गत वर्ष एनबीले १ अर्ब ६१ करोड रुपैयाँ नाफा गरेको छ । अघिल्लो वर्ष उसले १ अर्ब १४ करोड रुपैयाँ नाफा गरेको थियो ।

एनबीले खुद व्याज आम्दानी २ अर्ब ९१ करोड रुपैयाँ गरेको छ । अघिल्लो वर्ष उसले १ अर्ब ९७ करोड रुपैयाँखुद व्याज आम्दानी गरेको थियो ।

एनबीले गत वर्ष ५९ अर्ब ८२ करोड रुपैयाँ निक्षेप संकलन गरेको थियो । यस्तै ५२ अर्ब ७२ करोड रुपैयाँ ऋण लगानी गरेको छ । अघिल्लो वर्ष एनबीले ४८ अर्ब रुपैयाँ निक्षेप संकलन गरेको थियो भने ४० अर्ब ८७ करोड रुपैयाँ कर्जा तथा लगानी गरेको थियो । उसको स्प्रेडदर ४.६४ प्रतिशत छ ।

जनता बैंक

जनता बैंकले गत वर्ष १ अर्ब ३४ करोड रुपैयाँ नाफा गरेको छ । अघिल्लो उसले १ अर्ब रुपैयाँ नाफा गरेको थियो । जनताको खुद व्याज आम्दानी ३ अर्ब ४१ करोड रुपैयाँ गरेको छ । अघिल्लो वर्ष उसले २ अर्ब ४० करोड रुपैयाँ खुद व्याज आम्दानी गरेको थियो ।

जनताले ७६ अर्ब १ करोड रुपैयाँ निक्षेप संकलन गरेको छ । यस्तै ६६ अर्ब ८४ करोड रुपैयाँ ऋण लगानी गरेको छ । अघिल्लो वर्ष जनताले ५८ अर्ब ३२ करोड रुपैयाँ निक्षेप संकलन गरेको थियो भने ५२ अर्ब ७९ करोड रुपैयाँ कर्जा तथा लगानी गरेको थियो ।

जनताको जगेडा कोषमा १ अर्ब ७० करोड रुपैयाँ जम्मा भएको छ । पूँजीकोष अनुपात १३.३३ प्रतिशत छ । खराव कर्जा १.११ प्रतिशत छ । एक वर्षमा प्रतिसेयर आम्दानी १२ रुपैयाँबाट १६ रुपैयाँ पुगेको छ ।

सेञ्चुरी बैंक

सेञ्चुरी बैंकको नाफा ५ करोड रुपैयाँ घटेको छ । गत वर्ष सेञ्चुरीको नाफा ८६ करोड ८ लाख रुपैयाँ भएको छ ।

सेञ्चुरीले खुद व्याज आम्दानी २ अर्ब ६७ करोड रुपैयाँ गरेको छ । अघिल्लो वर्ष उसको खुद व्याज आम्दानी १ अर्ब ९१ करोड रुपैयाँ थियो ।

गत वर्ष सेञ्चुरीले ५७ अर्ब ९९ करोड रुपैयाँ निक्षेप संकलन गरेको छ । यस्तै ५६ अर्ब ९३ करोड रुपैयाँ ऋण लगानी गरेको छ । अघिल्लो वर्ष सेञ्चुरीले ५३ अर्ब ३३ करोड रुपैयाँ निक्षेप संकलन गरेको थियो भने ५३ अर्ब ८४ करोड रुपैयाँ ऋण लगानी गरेको थियो ।

सेञ्चुरीको जगेडा कोषमा १ अर्ब ३ करोड रुपैयाँ छ । खराब कर्जा १.७२ प्रतिशत छ । नाफामा कमीसँगै उसको प्रतिसेयर आम्दनी ११ रुपैयाँबाट १० रुपैयाँमा झरेको छ ।

नेपाल इन्भेष्टमेन्ट बैंक

नेपाल इन्भेष्टमेन्ट बैंकको नाफा अघिल्लो वर्षको तुलनामा ६.६६ प्रतिशतले घटेको छ । इन्भेष्टमेन्ट बैंकले गत बर्ष ३ अर्ब ४१ करोड रुपैयाँ नाफा गरेको छ ।

अघिल्लो बर्ष उसको नाफा ३ अर्ब ६५ करोड रुपैयाँ थियो । इन्भेष्टमेन्ट बैंकले १ अर्ब ५० करोड रुपैयाँ प्रोभिजनिङ गर्नु परेको कारण उसको नाफा कम भएको देखिएको हो ।

इन्भेष्टमेन्टको खुद व्याज आम्दानी ६ अर्ब १५ करोड रुपैयाँ गरेको छ । उसले १ खर्ब ४९ अर्ब रुपैयाँ निक्षेप संकलन गरेको छ भने १ खर्ब २३ अर्ब रुपैयाँ ऋण लगानी गरेको छ ।

इन्भेष्टमेन्टको आधार व्याजदर ९.०२ प्रतिशतबाट ८.३३ प्रतिशतमा झरेको छ । उसको स्प्रेड दर ४.३८ प्रतिशत छ । प्रतिसेयर आम्दानी ९ रुपैयाँले घटेको छ । जगेडा कोषमा १० अर्ब ९५ करोड रुपैयाँ छ ।

सानिमा बैंक

सानिमा बैंकले गत आर्थिक वर्षमा ३२ प्रतिशतले नाफा बढाएको छ । अघिल्लो आर्थिक वर्षमा १ अर्ब ६९ करोड रुपैयाँ खुद नाफा गरेको सानिमाले गत आर्थिक वर्षमा २ अर्ब २४ करोड रुपैयाँ नाफा गरेको हो ।

सानिमाले एक वर्षको अवधिमा १३ अर्ब ६४ करोड रुपैयाँ ऋण बढाएको छ । यसले ११ अर्ब ४३ करोड रुपैयाँ निक्षेप वृद्धि पनि गरेको छ ।

सानिमाले अघिल्लो वर्ष गरेको ३ अर्ब रुपैयाँ खुद ब्याज आम्दानी बढाएर ४ अर्ब १० करोड रुपैयाँ र्पुयाएको छ । सानिमाको निक्षेपमा दिने र ऋणमा लिने ब्याजको अन्तर (स्प्रेड) दर ४.३५ प्रतिशत छ । सानिमाको आधार ब्याज दर ९.४५ प्रतिशत छ भने प्रतिसेयर आम्दानी २८ रुपैयाँ छ ।

प्रभु बैंक

प्रभु बैंकले अघिल्लो आर्थिक वर्षको तुलनामा खुद नाफा दोब्बर बनाएको छ । अघिल्लो अर्थिक वर्ष ९६ करोड ७० लाख रुपैयाँ नाफा गरेको प्रभुले गत आर्थिक वर्षमा २ अर्ब ३ करोड रुपैयाँ खुद नाफा गरेको छ ।

प्रभुले अघिल्लो वर्ष ७३ अर्ब रुपैयाँ रहेको ऋण बढाएर ८६ अर्ब रुपैयाँ र्पुयाएको छ । यस्तै, अघिल्लो वर्ष ९७ अर्ब रुपैयाँ रहेको निक्षेप एक वर्षमा बढेर १ खर्ब १२ अर्ब रुपैयाँ पुगेको छ ।

प्रभुले अघिल्लो वर्ष २ अर्ब ८१ करोड रुपैयाँ रहेको खुद ब्याज आम्दानी बढाएर ४ अर्ब ५६ करोड रुपैयाँ र्पुयाएको छ । यसको निक्षेपमा दिने र कर्जामा लिने ब्याज अन्तर (स्प्रेड) दर ४.७ प्रतिशत छ । प्रभुको आधार दर ९.३६ प्रतिशत छ ।

सिटिजन्स बैंक

सिटिजन्स बैंक इन्टरनेसनलले नाफा २१ प्रतिशतले बढाएर १ अर्ब ४८ करोड ६८ लाख रुपैयाँ पुर्याएको छ ।

गत आर्थिक वर्षको अन्त्यसम्ममा सिटिजन्सले ७० अर्ब ३५ करोड निक्षेप संकलन गरेको छ भने ६२ अर्ब ९० करोड रुपैयाँ कर्जा प्रवाह गरेको छ । यसको खुद ब्याज आम्दानी २ अर्ब ८१ करोड ६४ लाख रुपैयाँ छ । सिटिजन्सले ५० करोड २८ लाख रुपैयाँ फि र कमिसनबाट मात्रै प्राप्त गरेको छ ।

सिटिजन्सको निक्षेपमा दिने र कर्जामा लिने ब्याज अन्तर (स्प्रेड) दर ३.८४ प्रतिशत छ । उसको पुँजी कोष अनुपात १३ प्रतशितभन्दा बढी छ भने खराब कर्जा अनुपात एक प्रतिशतभन्दा केही बढी छ ।

सिटिजन्सको आधार दर १०.५२ प्रतिशत छ । प्रतिसेयर आम्दानी १८ रुपैयाँको हाराहारीमा छ ।

माछापुच्छ्रे बैंक

माछापुच्छ्रे बैंकले गत वर्ष नाफा ३६.३२ प्रतिशतले बढाएर १ अर्ब ७० करोड रुपैयाँ पुर्याएको छ ।अघिल्लो वर्ष यसले १ अर्ब २४ करोड रुपैयाँ नाफा गरेको थियो ।

माछापुच्छ्रेले खुद ब्याज आम्दानी २९ प्रतिशतले बढाएर ३ अर्ब ५३ करोड रुपैयाँ बनाएको छ । गत वर्ष यस्तो आम्दानी २ अर्ब ७३ करोड रुपैयाँ थियो ।

माछापुच्छ्रेको निक्षेप संकलन १७.५५ प्रतिशतले बढाएर ८५ अर्ब १९ करोड रुपैयाँ बनाएको छ । यस्तै, कर्जा लगानी भने १५.६९ प्रतिशतले बढाएर ७२ अर्ब ४७ करोड रुपैयाँ र्पुयाएको छ ।

माछापुच्छ्रेले खराब कर्जा अनुपात ०.४४ प्रतिशतबाट ०.३७ प्रतिशतमा झारेको छ । आधार ब्याजदर ११.०६ प्रतिशतबाट १०.३७ प्रतिशतमा आएको छ । निक्षेपमा दिने र कर्जामा लिने ब्याज अन्तर (स्प्रेड) दर ४.२७ प्रतिशत छ ।

सम्बन्धित सामाग्री

४ बैंकको नाफाः प्रभु शतप्रतिशत, सिटिजन्स २१, सानिमा र माछापुच्छ्रेको कति बढ्यो ?

प्रकाशित मिति: शुक्रबार, साउन ३१, २०७६ ०३:१९