४ बैंकको नाफाः प्रभु शत प्रतिशत, सिटिजन्स २१, सानिमा र माछापुच्छ्रेको कति बढ्यो ?

४ बैंकको नाफाः प्रभु शत प्रतिशत, सिटिजन्स २१, सानिमा र माछापुच्छ्रेको कति बढ्यो ?

A+ A A-

चारवटा वाणिज्य बैंकले गत आर्थिक वर्षको अपरिष्कृत वित्तीय विवरण प्रकाशित गरेका छन् । प्रकाशित वित्तीय विवरणअनुसार प्रभु बैंकले नाफा शत प्रतिशत बढाएको छ ।

यस्तै, सानिमा बैंकले ३२ प्रतिशत, सिटिजन्स बैंक इन्टरनेसनलले २१ प्रतिशत र माछापुच्छ्रे बैंकले ३६ प्रतिशतले नाफा बढाएका छन् ।

सानिमा बैंक

सानिमा बैंकले गत आर्थिक वर्षमा ३२ प्रतिशतले नाफा बढाएको छ । अघिल्लो आर्थिक वर्षमा १ अर्ब ६९ करोड रुपैयाँ खुद नाफा गरेको सानिमाले गत आर्थिक वर्षमा २ अर्ब २४ करोड रुपैयाँ नाफा गरेको हो ।

सानिमाले एक वर्षको अवधिमा १३ अर्ब ६४ करोड रुपैयाँ ऋण बढाएको छ । यसले ११ अर्ब ४३ करोड रुपैयाँ निक्षेप वृद्धि पनि गरेको छ ।

सानिमाले अघिल्लो वर्ष गरेको ३ अर्ब रुपैयाँ खुद ब्याज आम्दानी बढाएर ४ अर्ब १० करोड रुपैयाँ पुर्‍याएको छ । सानिमाको निक्षेपमा दिने र ऋणमा लिने ब्याजको अन्तर (स्प्रेड) दर ४.३५ प्रतिशत छ । सानिमाको आधार ब्याज दर ९.४५ प्रतिशत छ भने प्रतिसेयर आम्दानी २८ रुपैयाँ छ ।

प्रभु बैंक

प्रभु बैंकले अघिल्लो आर्थिक वर्षको तुलनामा खुद नाफा दोब्बर बनाएको छ । अघिल्लो अर्थिक वर्ष ९६ करोड ७० लाख रुपैयाँ नाफा गरेको प्रभुले गत आर्थिक वर्षमा २ अर्ब ३ करोड रुपैयाँ खुद नाफा गरेको छ ।

प्रभुले अघिल्लो वर्ष ७३ अर्ब रुपैयाँ रहेको ऋण बढाएर ८६ अर्ब रुपैयाँ पुर्‍याएको छ । यस्तै, अघिल्लो वर्ष ९७ अर्ब रुपैयाँ रहेको निक्षेप एक वर्षमा बढेर १ खर्ब १२ अर्ब रुपैयाँ पुगेको छ ।

प्रभुले अघिल्लो वर्ष २ अर्ब ८१ करोड रुपैयाँ रहेको खुद ब्याज आम्दानी बढाएर ४ अर्ब ५६ करोड रुपैयाँ पुर्‍याएको छ । यसको निक्षेपमा दिने र कर्जामा लिने ब्याज अन्तर (स्प्रेड) दर ४.७ प्रतिशत छ । प्रभुको आधार दर ९.३६ प्रतिशत छ ।

सिटिजन्स बैंक

सिटिजन्स बैंक इन्टरनेसनलले नाफा २१ प्रतिशतले बढाएर १ अर्ब ४८ करोड ६८ लाख रुपैयाँ पुर्‍याएको छ ।

गत आर्थिक वर्षको अन्त्यसम्ममा सिटिजन्सले ७० अर्ब ३५ करोड निक्षेप संकलन गरेको छ भने ६२ अर्ब ९० करोड रुपैयाँ कर्जा प्रवाह गरेको छ । यसको खुद ब्याज आम्दानी २ अर्ब ८१ करोड ६४ लाख रुपैयाँ छ । सिटिजन्सले ५० करोड २८ लाख रुपैयाँ फि र कमिसनबाट मात्रै प्राप्त गरेको छ ।

सिटिजन्सको निक्षेपमा दिने र कर्जामा लिने ब्याज अन्तर (स्प्रेड) दर ३.८४ प्रतिशत छ । उसको पुँजी कोष अनुपात १३ प्रतशितभन्दा बढी छ भने खराब कर्जा अनुपात एक प्रतिशतभन्दा केही बढी छ ।

सिटिजन्सको आधार दर १०.५२ प्रतिशत छ । प्रतिसेयर आम्दानी १८ रुपैयाँको हाराहारीमा छ ।

माछापुच्छ्रे बैंक

माछापुच्छ्रे बैंकले गत वर्ष नाफा ३६.३२ प्रतिशतले बढाएर १ अर्ब ७० करोड रुपैयाँ पुर्‍याएको छ । अघिल्लो वर्ष यसले १ अर्ब २४ करोड रुपैयाँ नाफा गरेको थियो ।

माछापुच्छ्रेले खुद ब्याज आम्दानी २९ प्रतिशतले बढाएर ३ अर्ब ५३ करोड रुपैयाँ बनाएको छ । गत वर्ष यस्तो आम्दानी २ अर्ब ७३ करोड रुपैयाँ थियो ।

माछापुच्छ्रेको निक्षेप संकलन १७.५५ प्रतिशतले बढाएर ८५ अर्ब १९ करोड रुपैयाँ बनाएको छ । यस्तै, कर्जा लगानी भने १५.६९ प्रतिशतले बढाएर ७२ अर्ब ४७ करोड रुपैयाँ पुर्‍याएको छ ।

माछापुच्छ्रेले खराब कर्जा अनुपात ०.४४ प्रतिशतबाट ०.३७ प्रतिशतमा झारेको छ । आधार ब्याजदर ११.०६ प्रतिशतबाट १०.३७ प्रतिशतमा आएको छ । निक्षेपमा दिने र कर्जामा लिने ब्याज अन्तर (स्प्रेड) दर ४.२७ प्रतिशत छ ।

प्रकाशित मिति: सोमबार, साउन १३, २०७६ २३:१८