लोक सेवा आयोगका नवनियुक्त अध्यक्ष भट्टराईले लिए शपथ

A+ A A-

प्रदेश ५ लोक सेवा आयोगका नवनियुक्त अध्यक्ष प्राध्यापक डिलाराम भट्टराईले पद तथा गोपनीयताको शपथ लिएका छन् ।

प्रदेश ५ का प्रदेश प्रमुख उमाकान्त झाको कार्यालयमा आयोजित कार्यक्रममा उच्च अदालत तुल्सीपुरका मुख्य न्यायाधीश रमेश पोखरेलले भट्टराईलाई पद तथा गोपनीयताको शपथ गराएका हुन् ।

लोकसेवा आयोगका तीन सदस्य पदाधिकारीमध्ये अध्यक्षलाई मुख्यमन्त्री नेतृत्वको समितिले सिफारिस गर्ने व्यवस्था छ । मुख्यमन्त्री, सभामुख र प्रमुख प्रतिपक्षी दलको नेता रहेको समितिको सिफारिसमा प्रदेश प्रमुख उमाकान्त झाले भट्टराईलाई आयोगको अध्यक्षमा नियुक्त गरेका थिए ।

लोकसेवा गठनसँगै प्रदेश ५ मा कर्मचारी नियुक्तिको बाटो खुलेको छ । प्रदेशमा करिब १ हजार ५ सय दरबन्दी खाली छ । केही महिनाभित्रै लोकसेवाले विज्ञापन खुलाउने जनाएको छ ।

सन्धिखर्क नगरपालिका–१० अर्घाखाँचीका स्थायी भट्टराई प्रदेश लोक सेवा आयोगको अध्यक्ष बन्नुअघि महेन्द्र बहुमुखी क्याम्पस दाङका गणित विभागका प्रमुख थिए ।

लोकसेवा आयोगको कार्यालय बुटवलमै

प्रदेश ५ सरकारको मन्त्रिपरिषद् बैठकले बुटवलमा लोकसेवा आयोगको कार्यालय राख्ने निर्णय गरेको छ । मंगलबार बसेको बैठकको निर्णय सुनाउँदै प्रदेश सरकारका प्रवक्ता एवं भौतिक पूर्वाधार विकासमन्त्री बैजनाथ चौधरीले भूमि व्यवस्था कृषि तथा सहकारी मन्त्रालय नजिकै रहेको भवनमा लोक सेवा आयोगको कार्यालय राख्ने निर्णय भएको जानकारी दिए ।

प्रदेश आयोगको कार्यालय प्रदेश सरकारकै मन्त्रिपरिषद् बैठकले तोक्ने व्यवस्था छ ।

प्रकाशित मिति: बुधबार, साउन २९, २०७६ ००:४८