अश्लील भिडियो बनाएर पैसा असुल्नेहरू

A+ A A-

करिब तीन महिनाअघि मलाई एक महिलाले फेसबुकमा साथी बन्न अनुरोध पठाइन् । मैले ती महिलाको प्रोफाइल चेक गर्ने प्रयास गरेँ । अरु कोको साथी छन् भनेर हेरेँ । उनको फ्रेन्ड लिस्टमा केही नेपालका डाक्टर र शैक्षिक क्षेत्रमा लागेकाहरूको समेत नाम देखेँ ।

अरू पनि चिनजानका साथीभाइ भएको नाताले मैले उनको अनुरोधलाई सहजै स्वीकार गरेँ । अनुरोध स्वीकार गरेको केही मिनेटमै म्यासेन्जरमा एउटा म्यासेज आयो– ‘हलो डियर ? हाउ आर यु ?’

उनको पहिलो सन्देशमै लेखिएको ‘डियर’ शब्दले मलाई आश्चर्य र सोचनीय बनायो । त्यसलगत्तै मैले 'तपाईं को हो ? कहाँबाट ?' भन्ने लेखेँ । उनले पुणे, महाराष्ट्र बताइन् ।

उनको प्रोफाइल सरर्र हेरेँ । प्रोफाइलमा ग्लामर टाइपका तस्वीरहरू राखिएका थिए । भित्र अन्य सीमित तर राम्रा १२/१५ वटा तस्वीरहरू थिए ।

करिब एक मिनेटको संवादपछि ती युवतीले मलाई ह्वाट्सअप नम्बर छ भनेर सोधिन् । मैले 'छैन, किन नम्बर चाहियो' भनेँ । उनले भिडियो कल गर्न भनिन् । अनि म फेरि झस्किएँ ।

त्यसपछि ती युवतीले मलाई तिमी के गर्छौ भन्ने प्रश्न गरिन् । मैले खासै केही गर्दिनँ भने । सामान्य काम गर्छु भनेँ । उनले बारम्बार मसँग ह्वाट्सअप नम्बर मागिन् । मैले छैन भन्दै गएँ ।

त्यसै क्रममा मैले आजभोलि धेरैले यस्तै प्रकारको म्यासेज गर्छन् । किन र केका लागि भन्ने थाहा छ भनेँ । उनले आफू अरूजस्तो नभएको तर्क गरिन् । हाम्रो संवाद करिब ५ मिनेट चल्यो ।

त्यसपछि मैले म पत्रकार हो । तिमीहरूले किन ह्वाट्सअप नम्बर माग्छौ भन्ने मलाई राम्रोसँग थाहा छ भनेलगत्तै उनले मलाई ब्लक गरिन् ।

आजभोलि फेसबुक, म्यासेन्जरमा मात्र हैन, इन्स्टाग्रामबाट समेत यस्ता म्यासेजहरू निरन्तर आउने क्रम बढेको देखिन्छ । यसरी म्यासेज पठाउनेहरूको प्रोफाइलमा अमेरिका, कोही भारत, कोही पाकिस्तान निवासी डाक्टर भएको, हाल शान्ति सेनामा अफ्रिकी मुलुकहरूमा मेडिकल समूहमा खटिएको भन्ने जनाएर लेखिएको हुन्छ ।

यस्ता मानिसहरूले सीमित तर सुन्दर केही तस्वीरहरू राखेको भेटिन्छ भने यिनीहरूले पनि संवादको केही क्षणमै ह्वाट्सअप नम्बर माग्छन् । नम्बर माग्नुको पछाडिको रहस्य भने अर्कै हुन्छ ।

केही महिनाअघि ब्रसेल्सका एक व्यवसायी (स्थान र नाम गोप्य राखिएको)लाई पनि फेसबुकमा साथी बन्न अनुरोध आयो । प्रोफाइलमा सुन्दर तस्वीर भएका कारण उनीहरू साथी बने । केटीले ह्वाट्सअप नम्बर मागिन् । उनले नम्बर दिए । साथी बनेको दुई दिनसम्म उनीहरू गफिए । यसरी गफिएको परिणाम भने उनले नराम्रोसँग भोग्नुपर्‍यो ।

यसैबीच उनीहरू एकआपसमा नजिक भएजस्तो भयो । सुन्दर युवतीको तस्वीर देख्दा व्यवसायी लोभिए । उनीहरूबीच अन्तरंग कुरासमेत हुन थाल्यो ।

एक दिन ती युवतीको कल आयो । युवतीले 'एक्लै छौ ?' भनेर सोधिन् । संयोगवश त्यो दिन ती व्यवसायी घरमा एक्लै थिए । उनले 'म एक्लै छु' भने । युवतीले भिडियो खोल भनिन् । उनले भिडियो खोले ।

युवती नग्न अवस्थामा कामुक भएर बसेकी थिइन् । उनले भिडियोकलमार्फत आफ्नो नग्न शरीर देखाइन् र ती व्यवसायीलाई पनि कपडा खोलेर गोप्य अंगहरू देखाउन भनिन् ।

व्यवसायी पनि आवेगमा आए । दुवैले नग्नता प्रस्तुत गरे । यो क्रम दुई दिनसम्म चल्यो । तेस्रो दिनमा भने युवतीले आफूलाई केही रकम आवश्यक परेकाले पठाइदिन भनिन् । ती व्यवसायीले आफूले कति पनि रकम दिन नसक्ने बताएपछि ती युवतीले आफूले भिडियो च्याटको भिडियो बनाएको र मागेको रकम नदिए भिडियो सार्वजनिक गर्ने धम्की दिइन् ।

त्यसपछि भने ती सचेत व्यवसायीले युवतीको फेसबुक आईडी तुरुन्तै ब्लक गर्न त भ्याए तर त्यो बेलासम्म युवतीले नग्न भिडियो व्यवसायीको फेसबुकमा भएका केही महिला र पुरुष साथीहरूलाई पठाउन भ्याइसकेकी थिइन् । त्यसमध्ये व्यवसायीका आफन्तमध्येका एक जनाले त्यो भिडियो हेरे । त्यसलगत्तै उनले भिडियोका बारेमा उनलाई बताए । उनले भ्याई नभ्याई गरेर आफ्नो आईडी ब्लक गरे ।

करिब एक मिनेटको संवादपछि ती युवतीले मलाई ह्वाट्सअप नम्बर छ भनेर सोधिन् । मैले 'छैन, किन नम्बर चाहियो' भनेँ । उनले भिडियो कल गर्न भनिन् । अनि म फेरि झस्किएँ ।

पछिल्लो समय युरोप मात्र नभई संसारभरि नै यस्तो घृणित काम गर्दै पैसा असुल्ने युवतीहरूको समूह ठूलो देखिन्छ भने यस्तो गर्नुको पछाडि तीनवटा प्रमुख कारण रहेको देखिन्छ ।

पहिलो कारण भिडियो बनाएर पैसा असुल गर्ने । यस्ता युवतीहरूले मानिसको प्रोफाइल हेर्छन् । प्रोफाइलअनुसार उनीहरू सामाजिक सञ्जालमा जोडिन्छन् । प्रेमको नाटक गर्छन् । अश्लील भिडियो बनाउँछन् । आफूसँग अश्लील भिडियो भएको भन्दै पैसाका लागि बार्गेनिङ गर्छन् ।

दोस्रो कारण हो, बैंक खाता ह्याक गरी पैसा तान्ने । केही यस्ता युवतीहरू हुन्छन् जसले मायाजालमा फसाउँछन् र 'पैसा पठाइदिन्छु' भन्दै बैङ्क डिटेल्स लिन्छन् र खाता ह्याक गरेर खातामा भएको सबै पैसा तान्ने गरेको देखिन्छ ।

तेस्रो कारणमा पर्छ, केटाको मनस्थिति बुझ्ने । यदि पैसा दिन आनाकानी गर्‍यो भने त्यो भिडियो परिवारका सदस्य, साथीभाइलाई पठाएर बेज्जत गरिदिने । तर, यी सबै गर्नुको पछाडि भने पैसाको बार्गेनिङ नै मुख्य भएको एनआरएनए बेल्जियमका महासचिव रमेश कँडेल बताउँछन् ।

महासचिव कँडेल यस्ता छिटपुट घटनाहरू आफूले सुनेको तर नचिनेकाहरूलाई साथी बनाउनुपूर्व उसको प्रोफाइल चेक गरेर चिनजानका साथीभाइहरू धेरै भए मात्र अनुरोध स्वीकार गर्दा यस्तो समस्या नआउने बताउँछन् ।

सांग्रिला समाज बेल्जियमका कोषाध्यक्ष विनेश थापाको पनि कँडेलसँग मिल्दोजुल्दो विचार छ । उनी भन्छन्, ‘अपरिचित व्यक्तिले साथी बन्न अनुरोध गर्नेबित्तिकै साथी बनिहाल्नुभन्दा पनि पहिले उसको प्रोफाइल चेक गरेर के–कस्तो हो भन्नेबारे जानकारी लिन आवश्यक छ ।’ यसरी साथी बनेमा पछि जटिल समस्या नआउने उनको तर्क छ ।

नेपाल पत्रकार महासंघ बेल्जियमका सचिव पेम्बागेलु शेर्पाले पछिल्लो समयमा संसारभरि सामाजिक सञ्जालको दुरुपयोग बढेकाले यस्ता घटना हुन सक्ने बताउँदै यसप्रति सचेत रहनुपर्ने बताउँछन् ।

सचिव शेर्पाले यो दूषित कार्यको पछाडि आर्थिक विषय प्रमुख कारण हुन सक्ने उनको अनुमान छ । उनले सामाजिक सञ्जालको प्रयोग गर्दा सबै सधैँ चनाखो हुनुपर्ने र यस्तो घटना बेल्जियममा मात्र नभई युरोपका अन्य देशहरूमा समेत हुने गरेको बताउँछन् ।

एनआरएन बेल्जियमकी महिला उपाध्यक्ष सुशीला खतिवडा यस्ता घटना हुनुमा महिला–पुरुष दुवै दोषी रहेको बताउँछिन् । उनी 'साथी बनौँ' भन्दैमा बन्न नहुने र बुझेर मात्र साथी बन्न सुझाउँछिन् । उनले सामाजिक सञ्जालको प्रयोग गरेर फसाउन खोज्ने अनेकौँ तिकडम हुने र यसबाट बच्न सबै सचेत हुनुपर्ने बताउँछिन् । खतिवडाका अनुसार जसले गरे पनि यो कार्य घृणित, परिवार र समाजलाई विशाक्त बनाउने चाल हो ।

नेपालमा पनि नेपाल प्रहरीको साइबर ब्युरोले व्यक्ति/अपराधिक समूहले सामाजिक सञ्जालमार्फत ठगी गर्ने कार्य दिन प्रतिदिन बढ्दै गएको जनाएको छ । ब्युरोले गत सोमबार मात्र एक विज्ञप्ति प्रकाशित गरी सामाजिक सञ्जालमार्फत ठगी कार्य बढेको जनाउँदै त्यसबाट बच्न र सचेत रहन अनुरोध गरेको छ ।

साइबर ब्युरोले प्रकाशित गरेको विज्ञप्तिमा 'सामाजिक सञ्जालमार्फत चिनजान भएकाले उपहार माग्ने, सामाजिक सञ्जाल ह्याक गरी रकम माग्ने, प्रेमजालमा पारी अनेकौँ बहानामा पैसा माग्ने र खाता खोल्न लगाई ओटीपी र एटीएमलगायतका विवरण मागी रकम असुली गर्नेजस्ता कार्य गरेको देखिएकाले यसप्रति सचेत रहन' आग्रह गरिएको छ ।

यो पनि...

बीमाक्षेत्रको भ्रम चिर्ने कि व्यवसायलाई दुर्गन्धित बनाइराख्ने ?
सोचेजस्तो छैन सपनाको युरोप

प्रकाशित मिति: बुधबार, मंसिर १४, २०७९ १८:५९