बुटवलमा अत्याधुनिक सपिङ कम्पलेक्स, उपमहानगरकाे लगानी

A+ A A-

बुटवलको बसपार्कसँगै रहेको बस टर्मिनल परिसरमा बुटवल उपमहानगरपालिकाले पार्किङसहितको अत्याधुनिक सपिङ कम्प्लेक्स ‘बहुउद्देश्यीय भवन’ निर्माण गर्ने भएको छ । लुम्बिनी बस टर्मिनल परिसरमा निर्माण हुन लागेको पार्किङसहितको तीन तलाको भवनको आइतबार उपमहानगरपालिका प्रमुख शिवराज सुवेदीले शिलान्यास गरेका छन् ।

बुटवललाई आर्थिक कारोबारको केन्द्र बनाउन महत्त्वपूर्ण भूमिका खेल्ने र बुटवलका लागि दिगो आयस्रोतको आधार बन्न सक्ने गरी बहुउद्देश्यीय भवनको उपयोग हुने उपमहानगरपालिकाको विश्वास छ । बुटवलमा जनसंख्या र घर निर्माण बढेसँगै जग्गाको अभाव हुन थालेकाले ठूला व्यावसायिक भवन र आवास निर्माणका लागि नगरपालिकाले विज्ञमार्फत अध्ययन भइरहेको नगरप्रमुख सुवेदीले जानकारी दिए ।

‘साना–साना घर बनाएर बस्ने र व्यवसाय गरेर अब यहाँको विकास सम्भव छैन । बहुतले भवन बनाउनुपर्छ । त्यसका लागि विज्ञसँग छलफल र प्राविधिक अध्ययन भइरहेको छ,’ प्रमुख सुवेदीले भने, ‘अध्ययनपश्चात् कति तलासम्मका ठूला भवन बनाउने नगरपालिकाले निर्णय गर्नेछ ।’

त्यस अवसरमा निर्माण कम्पनी प्रेम सुनिल समीर जेभिका प्रोपराइटर नारायण पोख्रेलले निर्माण कार्य तोकेको समयमै सम्पन्न गर्ने प्रतिबद्धता व्यक्त गरे ।

बसटर्मिनल परिसरमा बन्ने अत्याधुनिक भवन नगर विकास कोषसँगको विशेष सहकार्यमा निर्माण हुन लागेको हो । यसका लागि बुटवल र कोषबीचमा गत फागुनमा सम्झौता भएको थियो । निर्माण कम्पनीले करिब ८ करोड रुपैयाँमै निर्माण गर्न सक्ने भन्दै ठेक्का सम्झौतामा हस्ताक्षर गरेर काम सुरु गरिसकेको प्रमुख प्रशासकीय अधिकृत चक्रपाणि शर्माले जानकारी दिए ।

२०७७ साउनमा निर्माण सक्ने गरी निर्माण कम्पनीसँग सम्झौता भएको सहरी पूर्वाधार विकास महाशाखा प्रमुख वरिष्ठ अधिकृत इन्जिनियर सुमन श्रेष्ठले बताए । बुटवल उपमहानगरपालिकाले अगाडि सारेका आवधिक र दीर्घकालीन महत्त्वका योजनामध्येकै एउटा योजना अत्याधुनिक पार्किङ भवन अर्थात् सपिङ कम्पलेक्स रहेको उल्लेख गर्दै उनले निजी र सहकारी क्षेत्रसँगको सहकार्यमा अन्य योजनालाई पनि प्रभावकारी रुपमा अगाडि बढाइने बताए ।

तीन तलाको भवनमा पार्किङबाहेक विभिन्न साइजका ६८ वटा व्यावसायिक सटर निर्माण हुने र ती सबै अत्याधुनिक मापदण्डका रहने बुटवलका अर्का इन्जिनियर रुक्मांगत बस्यालले जानकारी दिए । भुइँ तलामै १४ सटर तथा पहिलो र दोस्रो तलामा २७/२७ वटा सटर बन्नेछन् ।

प्रकाशित मिति: आइतबार, साउन २६, २०७६ २१:५४