अघिल्लो चुनावमा मेयर, अहिले सांसद बनेका सन्ताेष चालिसेसँग अन्तर्वार्ता

A+ A A-

काठमाडौं क्षेत्र नम्बर ३ मा कांग्रेसका सन्तोष चालिसे विजयी भएका छन् । उनले एमालेका कृष्ण राईलाई ३ हजार ९ सय ६२ मतले पराजित गर्दै संसद् छिर्ने ढोका खोलेका छन् । चालिसेले १५ हजार १ सय ५८ मत ल्याउदा राईले ११ हजार १ सय ९६ मत पाए । चालिसेको जितसँँगै दोस्रो पटक संसद छिर्ने राईको ढोका बन्द भएको छ । चालिसे ०७४ को स्थानीय तहको चनावमा गोकर्णेश्वर नगरपालिकाका प्रमुखमा निर्वाचित भएका थिए भने राई प्रतिनिधिसभाको चुनावमा पहिलो पटक संसद् छिरेका थिए ।

विजयी भएसँगै चालिसेसँग हामीले संक्षिप्त कुराकानी गरेका छौँ ।

अघिल्लो चुनावमा गोकर्णेश्वर नगरपालिकाको मेयरमा यसपटक प्रतिनिधिसभा सदस्यमा विजयी हुनुभयो । यो संयोग हो कि के हो ?

यो संयोग हो । ३० वर्षदेखि लागातार कहिले वडामा कहिले गाविसमा कहिले पालिकामा विजयी भइरहेको छु । अनौठो संयोगकोरुपमा लिएको छु ।

यसरी हरेक चुनावमा विजयी हुने आधार के हो ?

बारम्बार जनताको घरदैलोमा बसेर काम गर्ने अवसर पाएँ । जनताको दुःख सुखमा साथ दिए । जनता खुसी भएर नै मलाई मत दिनु भयो । यही नै मेरो जितको आधार हो ।

अब तपाईको मुख्य प्राथमिकता के हो ?

यो क्षेत्रमा सुकुम्बासीको ठूलो समस्या छ । उनीहरूको समस्या समाधान गर्न भूमिका खेल्छु । शिक्षा महंगो बनेको छ । नागरिकले राम्रो स्वास्थ्य उपचार पाएका छैनन् । शिक्षा र प्राथमिक स्वास्थ्य निःशुल्क बनाउन कानुन बन्नुपर्छ । संसदमा गएर यो विषयमा आवाज उठाउने छु । यो क्षेत्रमा पढेका धेरै युवा बेरोजगार छन् । रोजगारको सृजना गर्नेगरी काम गर्छु ।

आश्वासन मात्र कि ?

आश्वासन होइन । मैले बोलेको अहिलेसम्म अपूरो रहेको छैन । अरुले आश्वासन दिए होलान् म आश्वास होइन । फिल्डमै उत्रेर काम गर्ने हो ।

तर नगर प्रमुख भएर ५ वर्ष काम गर्नुभयो । तर तपाईसँग पनि त्यहाँका मतदाता सन्तुष्ट छैनन् । काठमाडौंको कर्णाली भनेर चिनिने ओख्रेनीमा ५ वर्षमा एक पटक पुग्नु भयो भन्ने गुनासो छ नि ?

त्यो कसले भन्योे ? वर्षमा ५ पटक बढी पुगेको छु । त्यो ठाउँमा पहिले बामे सरेर जानुपर्थ्यो, अहिले बाटो पुर्‍याएको छ ।

निःशुल्क स्वास्थ्य र शिक्षामा काम गर्छु भन्नुभयो तर ओख्रेनीमा न माध्यामिक विद्यालय छ न स्वास्थ्य चौकी नै ?

स्वास्थ्य चौकी खोलेको छ । माध्यामिक विद्यालय नभएको हो । अब त्यसका लागि पहल गर्छु ।

सम्बन्धित समाचार

ओख्रेनीवासीको प्रश्न- कसरी काठमाडौंको नागरिक हौँ भनौँ ?

मेयर हुँदा गर्न नसकेको काम सांसद भएपछि गर्छु भन्न खोज्नु भएको हो ?

हो, यो क्षेत्र पर्यटनको लागि अब्बल ठाउँ हो । पर्यटनको क्षेत्रमा काम गर्न धेरै बजेट चाहिन्छ । पर्यटनको विकास गर्न लाग्छु ।

प्रतिस्पर्धीलाई के भन्नुहुन्छ ?

एमालेका कृष्ण राईले फोन गरेर भर्खरै शुभकामना दिनुभयो । राजनीतिमा प्रतिस्पर्धा हुन्छ । उहाँ र म ३० वर्षदेखि वडा गाविसमा यसरी नै प्रतिस्पर्धा गरिरहेका छौँ । यो पनि संयोग हो । सबै प्रतिस्पर्धी र दलहरूसँग मिलेर नै काम गर्न चाहन्छु । यो त्यो नभनी सबैलाई समेटेर काम गर्छु ।

सम्बन्धित समाचार