मतले बलिया राईलाई अन्तर्घातको डर, चालिसेलाई गठबन्धनको भर

A+ A A-

काठमाडौं क्षेत्र नम्बर ३ का एमालेका प्रतिनिधिसभा सदस्यका उम्मेदवार कृष्ण राई र प्रदेशसभा सदस्यका उम्मेदवार चन्द्रमान लामा सोमबार भोट माग्न बौद्धस्थित सम्पूर्णकुमार लामाको घरमा पुगे । घरदैलो अभियानमा रहेका राई र लामालाई सम्पूर्णको परिवारले नै फूलमालाले भव्य स्वागत गर्‍यो । तर, सम्पूर्णको मनस्थिति भने बेग्लै थियो ।

‘स्वागत मात्र हो कि...?’

प्रश्न पूरा नहुँदै सम्पूर्णले जवाफ फर्काए, ‘यसपटक नयाँ अनुहारलाई हेर्नुपर्छ ।’ सम्पूर्ण एमाले पृष्ठभूमिमा हुर्किएका हुन् । तर, शान्ति प्रक्रियामा आएपछि उनीसहितको टिम माओवादीमा छिरेको थियो । हाल उनी कुनै पनि पार्टीमा आबद्ध छैनन् ।

एमाले र कांग्रेसबीच नै प्रतिस्पर्धा

यसपटक तटस्थ रहेका सम्पूर्ण काठमाडौं ३ मा एमाले र कांग्रेसबीच नै प्रतिस्पर्धा हुने देख्छन् । ‘पहिलेको जस्तो माहौल छैन । गठबन्धनमा पनि बागी छन् । त्यसैले यही उम्मेदवारले जित्छन् भन्ने ग्यारेन्टी छैन । तर, प्रतिस्पर्धा एमाले र कांग्रेसकै देखिन्छ,’ उनी भन्छन् ।

राई र लामा सम्पूर्णको घरबाट बौद्धका पुराना नेता गणेश योञ्जनको घरतर्फ अगाडि मोडिए । योञ्जनले पनि एमालेका दुवै उम्मेदवारलाई खादा लगाएर स्वागत गरे । बौद्धका पुराना नेता योञ्जन संघीय समाजवादी पार्टीमा थिए । हाल उनी कुनै पार्टीमा छैनन् । काठमाडौं ३ मा उनी पनि कांग्रेस र एमालेबीच प्रतिस्पर्धा हुने मत राख्छन् । ‘प्रदेशमा कांग्रेसको बागी उम्मेदवार भएकाले एमालेलाई सजिलो हुन सक्छ । तर, कांग्रेस र एमालेबीच रोचक प्रतिस्पर्धा देखिन्छ,’ योञ्जन भन्छन् ।

एमालेको बौद्धमा घरदैलो अभियान चलिरहँदा कांग्रेसको नयाँ पाटीमा अभियान चलिरहेको थियो । प्रतिनिधिसभातर्फका उम्मेदवार सन्तोष चालिसे र प्रदेशतर्फका उम्मेदवार विमल ठकुरी मतदाताको घरघरमा भोट मागिरहेका थिए । चोकचोकमा कांग्रेसका शुभेच्छुकले दुवै उम्मेदवारलाई फूलमालाले स्वागत गरिरहेका थिए । ‘हामी जे गर्न पनि तयार छौँ । रुखमा छाप लगाउनुहोला,’ चालिसे मतदातालाई भनिरहेका थिए ।

टोलटोलमा चालिसेसहितको टोलीलाई फूलमालाले स्वागत गरे पनि मतदाताको मन भने फरक देखिन्थ्यो । ‘पहिले एमालेलाई पनि हालियो, कांग्रेसलाई पनि हालियो । अब कसलाई हाल्ने, हेर्नुपर्छ,’ नयाँ पाटीकी ठूली कान्छी तामाङले भनिन् । नयाँ उम्मेदवारलाई पनि हेर्नुपर्ने उनको मत थियो । ‘हिजो घण्टी पनि आएको थियो नि,’ तामाङले थपिन्, ‘धेरै ठाउँमा स्वतन्त्रले जित्छ भन्छन् । हिजो घण्टी बजाउँदै घण्टीका उम्मेदवार आएका थिए ।’ उनको मनमा घण्टी बसेको रहेछ । तर, मत कसलाई दिने भन्ने निर्णय नगरेको उनले बताइन् ।

ठूली कान्छी मात्र होइन, काठमाडौं ३ मा पार्टीका कार्यकर्ताबाहेकका मतदाता भोट कसलाई दिने भन्ने अलमलमा रहेको देखिन्थ्यो । कोही नयाँ स्वतन्त्रलाई दिनुपर्छ भनिरहेका थिए भने कोही पार्टीका उम्मेदवारलाई नै दिनुपर्छ भनिरहेका थिए ।

स्थानीय चुनावमा १ हजार मतले कांग्रेस अघि

एमालेका कृष्ण राई २०७४ को चुनावमा पनि विजयी भएका हुन् । उनले १९ हजार १ सय ६९ मत पाएका थिए । उनका प्रतिद्वन्द्वी कांग्रेसकी अम्बिका बस्नेतले १४ हजार ८ सय ८४ मत ल्याएकी थिइन् । ४ हजार २ सय ८५ मत बढी मतले राई विजयी भएका थिए । तर, २०७४ को चुनावमा एमाले र माओवादीको गठबन्धन भएका कारण राईलाई सहज थियो । यसपटक एमाले एक्लै चुनावी मैदानमा छ ।

गत ३० वैशाखमा भएको स्थानीय तहको चुनावको मत परिणामलाई आधार मान्दा क्षेत्र नम्बर ३ मा एमाले करिब १ हजार मतले पछाडि छ । काठमाडौं ३ मा गोकर्णेश्वर नगरपालिकाका नौवटै वडा, कागेश्वरी मनोहरा नगरपालिकाको १, २ र ३ नम्बर वडा र काठमाडौं महानगरपालिकाको ६ नम्बर वडा पर्छन् ।

स्थानीय तहको निर्वाचनमा कांग्रेसले गोकर्णेश्वर नगरप्रमुख र चारवटा वडामा जित हात पारेको थियो । कागेश्वरीको एउटा वडा र महानगरको ६ नम्बर वडा पनि कांग्रेसले जित हात पारेको थियो । गोकर्णेश्वर नगरपालिका प्रमुखमा कांग्रेसले ९ हजार ६ सय ९२ मत ल्याएको थियो ।

गोकर्णेश्वरको नगरपालिकाको नौवटा वडामा कांग्रेसको ८ हजार ९ सय ४७, कागेश्वरी मनोहरा नगरपालिकाको १, २ र ३ नम्बर वडामा २ हजार ९ सय ७२ र काठमाडौं महानगरपालिका–६ मा ३ हजार ८ सय ७६ गरी १५ हजार ७ सय ९५ मत कांग्रेसले पाएको थियो । त्यसैले कांग्रेसका उम्मेदवार चालिसे आफू जित्नेमा ढुक्क देखिन्छन् । उनी २०७४ को चुनावमा गोकर्णेश्वरको नगर प्रमुखमा विजयी भएका हुन् । ५ वर्ष नगर चलाएको अनुभव आफ्नो जितको आधार भएको उनी बताउँछन् ।

एमालेको मत कति ?

गत स्थानीय चुनावमा गोकर्णेश्वरमा एमालेले उपप्रमुख र ५ वटा वडा जितेको थियो । कागेश्वरीका दुईवटा वडा पनि एमालेले जित हात पारेको थियो । उपप्रुखमा एमालेले ८ हजार ८ सय ४ मत ल्याएको थियो । गोकर्णेश्वरका ९ वटा वडामा एमालेले ८ हजार ८ सय १७ मत, कागेश्वरी मनोहरा नगरपालिकाको १, २ र ३ वडामा ३ हजार ३ सय २७ र काठमाडौं महानगर–६ मा २७३३ गरी एमालेले १४ हजार ८ सय ७७ मत ल्याएको थियो ।

यसरी बनाए राईले माहौल

स्थानीय चुनावमा १ हजार मतले पछि रहेको एमालेले हाल माओवादी र एकीकृत समाजवादीका स्थानीय नेतालाई भित्र्याएको छ । गत स्थानीय चुनावमा एकीकृत समाजवादी र माओवादी गठबन्धनबाट गोकर्णेश्वर नगरपालिकाको उपप्रमुख उम्मेदवार रहेका पेमा छिरी शेर्पासहितको टोली नै एमाले प्रवेश गरेको छ ।

उपप्रमुखका उम्मेदवार बनेका शेर्पाले २ हजार ७ सय १ मत ल्याएका थिए । यो मतलाई जितको आधार बनाएका छन् राईले । अर्को आधार हो, एमाले छोडेर एकीकृत समाजवादीमा गएका नेता कार्यकर्ता एमालेमै फर्किनु । एसका नेता कार्यकर्ता एमालेमै फर्काएपछि आफूलाई बलियो उम्मेदवार ठानेका हुन् राईले ।

एमालेमा अन्तर्घात

काठमाडौं ३ को रोग हो, अन्तर्घात । यसपटक पनि एमालेका कतिपय स्थानीय नेता कार्यकर्ता राईलाई मत नदिने पक्षमा देखिएका छन् । घरदैलोमा राईसँगै हिँडेका एमालेका कार्यकर्ता खुलेरै भन्छन्, ‘पार्टीलाई भोट दिने हो । व्यक्तिलाई त दिइँदैन ।’

राई एकलौटी ढंगले चल्ने र आफू निकटबाहेककालाई पेल्ने गरेका कारण मत नदिने पक्षमा देखिन्छन् एमालेका असन्तुष्ट नेता कार्यकर्ता । त्यति मात्र होइन, ५ वर्ष सांसद भएर केही गर्न नसकेको आरोप पनि राईमाथि छ । ‘जित्न धेरै मिहिनेत गर्नुपर्छ । सबैलाई मिलाएर नलैजाने हो भने गाह्रो छ,’ एमालेका एक असन्तुष्ट नेताले भने ।

एमालेको असन्तुष्ट र गठबन्धनको भरमा चालिसे

एमालेको असन्तुष्ट समूहको मत आफूले पाउने आशामा छन् चालिसे । र, गठबनका कारण नेकपा एसको मत पनि आफूले पाउनेमा ढुक्क देखिन्छन् उनी । गत स्थानीय चुनावमा नेकपा एसले नगर प्रमुखमा १ हजार ८ सय ४१ मत ल्याएको थियो । यो मतलाई आफ्नो पक्षमा ल्याउन सके भने चालिसेले राईलाई दोस्रोपटक संसद् छिर्नबाट रोक्न सक्ने स्थानीय नेताहरू बताउँछन् ।

तर, कांग्रेसले नेकपा एस र माओवादीलाई चुनाव प्रचारप्रसारमा समेटेको छैन । कांग्रेस एक्लै चुनावी प्रचारमा हिँडेका कारण नेकपा एस पनि सन्तुष्ट छैन । क्षेत्र नम्बर ३ मा नेकपा एसले गठबन्धनलाई सहयोग गर्ने निर्णय गरेको छ ।

तर, कांग्रेसले नेकपा एससँग अहिलेसम्म संवाद गरेको छैन । ‘कांग्रेस एक्लै हिँडेको छ । हामीलाई खबर गरेको छैन,’ नेकपा एसका एक नेताले भने । माओवादीले आफ्नो उम्मेदवार उठाए पनि हाल निष्क्रिय बनाएको छ । नेकपा एस र माओवादीको मत पाएमा चालिसेका लागि संसद् छिर्ने ढोका खुल्न सक्ने बताउँछन् एस र माओवादीका स्थानीय नेता । ‘हाम्रो उम्मेदवार नभएपछि कार्यकर्ता तितरबितर भएका छन् । कांग्रेसले संवाद नगर्ने हो, एक्लै हिँड्ने हो भने स्थिति अर्कै बन्ने खतरा छ,’ एसका एक नेताले भने ।

कांग्रेसमा पनि अन्तर्घात र बागीको पिरलो

क्षेत्र नम्बर ३ ‘क’ मा कांग्रेसको बागी उम्मेदवारका कारण चालिसेलाई कठिन हुने कांग्रेसकै नेता कार्यकर्ता बताउँछन् । ‘क’ का कांग्रेसका दीपेन्द्र लामा बागी उठेका छन् । महानगर–६ मा उनको प्रभाव राम्रो भएकाले यसको असर चालिसेलाई पर्ने देखिन्छ । कांग्रेसका असन्तुष्ट नेता कार्यकर्ता पनि चालिसेको सट्टा एमालेका राईलाई मत दिने पक्षमा देखिन्छन् । ‘पार्टीले भूमिका दिएको छैन । जसले पाउनुपर्ने हो, उसले टिकट पाएको छैन,’ कांग्रेसका एक स्थानीय नेताले भने, ‘कांग्रेस उम्मेदवारलाई जित्न सहज छैन ।’

स्वतन्त्र र साना दलका उम्मेदवारको असर

प्रतिनिधिसभातर्फ क्षेत्र नम्बर ३ मा २३ जना उम्मेदवार चुनावी मैदानमा छन् । स्वतन्त्र र साना दलका उम्मेदवारको पक्षमा कम माहौल बनेको देखिन्छ । यद्यपि, उनीहरूले कांग्रेस एमालेकै मत काट्ने अनुमान स्थानीय नेताहरूको छ ।

गत स्थानीय चुनावमा राप्रपाले गोकर्णेश्वर नगरपालिका प्रमुखमा ८ सय ४० मत ल्याएको थियो । राप्रपाका गणेश गिरी, राष्ट्रिय स्वतन्त्र पार्टीका दुर्गा विक्रम थापा क्षेत्री, हाम्रो नेपाली पार्टीका द्वारिका अधिकारी र स्वतन्त्र उम्मेदवार निरञ्जन पुडासैनीको पनि प्रभाव देखिएको छ । असन्तुष्टहरूको मत राप्रपा र स्वतन्त्र उम्मेदवारलाई जाने बताउँछन् स्थानीय नेताहरू ।

अघिल्लो चुनावमा एकले अर्कोलाई सघाएका थिए

रोचक त के छ भने २०७४ मा संघको चुनावमा चालिसेले राईलाई र स्थानीय चुनावमा राईले चालिसेलाई सहयोग गरेको आरोप लाग्ने गरेको छ । एमालेको राम्रो मत भएर पनि २०७४ मा गोकर्णेश्वरमा हार्नुपरेको एमालेकै नेताहरू दाबी गर्छन् । र, संघमा कंग्रेसले हार्नुमा चालिसेले राईलाई सहयोग गरेको आरोप लाग्ने गरेको छ ।

‘अघिल्लो चुनावमा एकले अर्कोलाई सहयोग गरेका थिए । अहिले दुवै एकअर्काको प्रतिस्पर्धी भएका छन्,’ कांग्रेस र एमालेका स्थानीय नेता भन्छन् ।

उम्मेदवारद्वय कृष्ण राई र सन्तोष चालिसे ।

किनबेचको असर

हरेक चुनावमा गोकर्णेश्वरमा कांग्रेसले एमालेको, एमालेले कांग्रेसका मतदाता किन्ने गरेको आरोप लाग्छ । यसपटक पनि यही स्थिति आउने बताउँछन् स्थानीय नेताहरू ।

‘मतदानको दुई दिनअघिबाट किनबेचको चलखेल हुने गरेको छ । कसले कति खर्च गर्न सक्छ, उसको पोल्टोमा नतिजा निस्कन्छ,’ एक स्थानीय नेताले भने ।

दोब्बर मतले जित्छु : राई

काठमाडौं ३ मा गठबन्धन भत्केको स्थिति छ । सांसद भएपछि पदीय मर्यादा जोगाएर काम गरेको छु । कानुन निर्माणमा राम्रो भूमिका खेलेको छु । जनताको सरोकार राख्ने विषयमा दुःखसुखमा साथ दिएको छु । र, कांग्रेसभित्र बागी उम्मेदवार छन् । मेरो जितको आधार नै यही हो ।

अर्को भनेको सिंगो देशमा एमालेको भूमिका नै मेरो जित्ने आधार हो । हारजितको सवालमा सजिलोसँग पराजित गर्छु । २०७४ को चुनावमा ४ हजारभन्दा बढी मतले जितेको थिएँ । यसपटक यसको दोब्बर मतले जित्छु ।

मेरा प्रतिस्पर्धी बलिया छैनन् : चालिसे

नगरपालिकाको प्रमुख हुँदा गरेको विकास नै मेरो जितको आधार हो । टोलटोलमा सडक बाटो पुर्‍याएको छु । पिच गरेको छु । त्यसैले अहिले घरघरमा जनताले फूलमालाले स्वागत गरेका छन् । यही हो मेरो जित्ने आधार ।

अर्को कुरा, मेरा प्रतिस्पर्धी बलिया छैनन् । यति नै मतले पराजित गर्छु भनेर अहिले नै त भन्दिनँ । तर, प्रतिस्पर्धीलाई सजिलै पराजित गर्छु ।

४ गते फैसला
काठमाडौं क्षेत्र नम्बर ३ मा ५८ हजार ८ सय ८९ मतदाता छन् । जसमा पुरुष मतदाता ३० हजार ८४ र महिला मतदाता २८ हजार ८ सय ५ जना छन् । यी मतदाताले ४ मंसिरमा जितहारको फैसला गर्नेछन् ।

सम्बन्धित समाचार

ओख्रेनीवासीको प्रश्न- कसरी काठमाडौंको नागरिक हौँ भनौँ ?

प्रतिनिधिसभातर्फका उम्मेदवार

कृष्ण राई– एमाले
सन्तोष चालिसे –कांग्रेस
बद्री बजगाई– माओवादी केन्द्र
महोन कमार विश्वकर्मा– जसपा
गणेश गिरी – राप्रपा
विशोक डंगोल– नेमकिपा
मोहोन बहादुर बस्नेत–लोसपा
गोविन्द नेपाल– जनमत पार्टी
सुमिना न्यौपाने– मौलिक जरोकिलो पार्टी
द्वारिका अधिकारी– हाम्रो नेपाली पार्टी
कृष्ण काजी श्रेष्ठ–मंगोल नेशनल अर्गनाइजेसन
नुर्पु गेन्जेन शेर्पा–संघीय लोकतान्त्रि राष्ट्रिय मञ्च
रक्षाकुमार राई– सामाजिक लोकतान्त्रिक पार्टी
नेत्रबहादुर तामाङ– आमूल परिवर्तन मसिहा पार्टी नेपाल
दुर्गाविक्रम थापा–राष्ट्रिय स्वतन्त्र पार्टी
दिनेश खनाल –स्वतन्त्र
कविता विष्ट सुनार– स्वतन्त्र
राजेश विष्ट– स्वतन्त्र
विन्दु मगर –स्वतन्त्र
श्रीकृष्ण ज्योति– स्वतन्त्र
जगन्नाथ देवकोटा– स्वतन्त्र
निरञ्जन पुडासैनी– स्वतन्त्र

प्रदेशसभातर्फका उम्मेदवार

क्षेत्र नम्बर ३ (क)
चन्द्रमान लामा– एमाले
छिरिङ दोर्जे लामा– कांग्रेस
कपिलमुनि उप्रेती– माओवादी केन्द्र
चुण्डी लामा– राप्रपा
कृष्ण दुवाल– नेमकिपा
ठूलो कान्छो लामा– मंगोल नेसनल अर्गनाइजेसन
दीपेन्द्र लामा– स्वतन्त्र
उत्तम प्रसाद फुयाँल– स्वतन्त्र
हरेराम डोटेल– स्वतन्त्र

क्षेत्र नम्बर ३ (ख)

रामेश्वर फुयाँल– एमाले
विमल ठकुरी – कांग्रेस
महेश्वर फुयाँल– माओवादी केन्द्र
कमल सुनार–राप्रपा
सुमित्रा सुवाल – नेमकिपा
दिनेश श्रेष्ठ– नागरिक उन्मुक्ति पार्टी
कुलबहादुर लामा– मंगोल नेसनल अर्गनाइजेसन
देवराज थापा –स्वतन्त्र
पुष्पकुमार भण्डारी– स्वतन्त्र
कुमार श्रेष्ठ– स्वतन्त्र
सीता पौडेल– स्वतन्त्र
अर्जुनप्रसाद पुडासैनी– स्वतन्त्र

तस्वीरमा कांग्रेस र एमालेको घरदैलोलाई पछ्याउँदा...