नयाँ पार्टी गठन गरेर रेशम चौधरी एमालेमा प्रवेश गर्न लागेका हुन् ?

A+ A A-

सांसदको शपथ लिएर डिल्लीबजार कारागारमा जेलजीवन बिताइरहेका रेशम चौधरीले २० पुसमा नयाँ पार्टी दर्ताका लागि निर्वाचन आयोगमा निवेदन दिएका छन् । निर्वाचन आयोगले नयाँ पार्टी दर्ताको प्रमाणपत्र दिई नसक्दै चौधरीले कारागारबाटै राजनीतिक सक्रियता बढाएका छन् ।

उनी आफ्नै नाममा पार्टी दर्ता गराउन चाहन्थे । तर, टीकापुर घटनाका मुख्य योजनाकारका रूपमा ज्यान मुद्दामा सजाय भोगिरहेका चौधरीको नाममा नयाँ पार्टी खोल्न नमिल्ने भन्दै आयोगले रोक्यो । त्यसैले उनकी पत्नी रन्जिता श्रेष्ठ चौधरीलाई अध्यक्ष बनाएर ‘नागरिक उन्मुक्ति पार्टी’ दर्ताका लागि निवेदन दिइएको छ ।

कांग्रेस, कम्युनिष्ट र मधेसकेन्द्रित पार्टीका असन्तुष्ट नेता-कार्यकर्ता नयाँ पार्टीमा आकर्षित भएको उक्त पार्टीका केन्द्रीय सदस्य लक्ष्मण चौधरीले बताए । ‘कांग्रेस-कम्युनिष्ट र मधेसवादी पार्टीले जनताको भावना अनुरुप काम गर्न सकेनन् । त्यसैले ती पार्टीमा असन्तुष्ट नेता-कार्यकर्ताको नयाँ पार्टीमा आकर्षित छन्,’ उनले शिलापत्रसँग भने, ‘नयाँ पार्टीमा आउन माननीयलाई भेट्न डिल्लीबजार जानेको संख्या धेरै छ । हामी उत्साहित छौँ ।’

कैलालीको टीकापुरमा ७ भदौ २०७२ मा सात सुरक्षाकर्मी र एक बालकको ज्यान जाने गरी भएको हिंसात्मक प्रदर्शनका मुख्य अभियुक्तका रूपमा चौधरीलाई जिल्ला र उच्च अदालतले दोषी करार गरेको छ । उनी फरार रहेकै बेला २०७४ सालको निर्वाचनमा तत्कालीन राष्ट्रिय जनता पार्टी (राजपा) का तर्फबाट कैलाली १ बाट प्रतिनिधिसभा सदस्य निर्वाचित भएका थिए । तर, राजपालगायत मधेस केन्द्रित दलहरू सत्तामा पुगे पनि आफूहरूको माग र मुद्दालाई बेवास्ता गरेको भन्दै चौधरीले नयाँ पार्टी गठन गरेका हुन् ।

‘हामीले चार वर्ष त हेर्‍यौं नि । तर, समय क्रममा के बुझियो भने हामीलाई सत्ताको सिढी बनाइएको रहेछ । राजनीतिक कमैया बनाइयो,’ केन्द्रीय सदस्य चौधरीले भने, ‘साथमै छौँ भन्ने तर हाम्रो एजेण्डाप्रति सकारात्मक व्यवहार नभएपछि नयाँ पार्टी खोल्ने स्थितिमा पुग्यौं ।’

रेशम चौधरी र उनको पारिवारिक पृष्ठभूमिलाई नजिकबाट बुझ्नेहरू उनी नयाँ पार्टी गठन गरेर एमालेसँग पार्टी एकताको गृहकार्यमा रहेको बताउँछन् । रेशम कुनै बेला एमालेनिकट अनेरास्ववियुका नेता थिए । उनी अनेरास्ववियुबाट आरआर क्याम्पसमा २०५१ सालमा स्ववियु सदस्यमा निर्वाचित भएका थिए । कलाकारितामा सक्रिय हुन थालेपछि उनको रुची राजनीति घट्दै गयो ।

रेशमका बुबा लालवीर चौधरी एमालेका जिल्ला नेता हुन् । रेशम राजपाबाट कैलाली १ बाट प्रतिनिधिसभा सदस्य उम्मेदवार हुँदा लालवीर एमालेबाट कैलाली १ (क) बाट प्रदेशसभा सदस्य उम्मेदवार थिए । उनी पराजित भए भने रेशम भूमिगत रहेरै निर्वाचित भए । रेशमका काका बालकुमार चौधरी पनि एमाले नेता हुन् । नयाँ पार्टी गठन गरेर सके एमालेसँग एकता गर्ने वा जिल्लाको माहोल हेरेर आउँदो चुनावमा सहकार्य गर्ने रणनीतिमा चौधरी देखिन्छन् ।

तत्कालै एमाले प्रवेश गर्दा आफ्ना सबै शुभेच्छुकहरू साथै नरहन पनि सक्ने विश्लेषण उनको समूहले गरेको छ । रेशमका समर्थकहरू एउटै पृष्ठभूमिबाट आएका हैनन् । केन्द्रीय सदस्य लक्ष्मण चौधरी कांग्रेसको टीकापुर नगर सभापति भइसकेका नेता हुन् । त्यस्तै, लालबहादुर चौधरी ०५४ को स्थानीय निर्वाचनमा एमालेबाट उपमेयरमा निर्वाचित भएका थिए । राजपा र जसपा पृष्ठभूमिका अरु नेता-कार्यकर्ता पनि चौधरीको नयाँ पार्टीमा जोडिएका छन् ।

‘भर्खर त पार्टी दर्ता हुँदैछ । अहिल्यै योसँग एकता गर्ने भन्ने कुनै योजना छैन,’ पार्टीका राजनीतिक संयोजकसमेत रहेका लक्ष्मण चौधरीले भने, ‘यो राजनीति हो । सम्भावनाको खेल हुन्छ । भोलिका दिनमा असम्भव केही छैन ।’ एमाले वा अन्य पार्टीसँग सहकार्य हुनसक्ने सम्भावनालाई भने उनले अस्वीकार गरेनन् । २०७४ को निर्वाचनमा उनी पनि राजपाबाट उम्मेदवार थिए । भूमिगत अवस्थामा रहेका रेशमको चुनावी प्रचारप्रसार, संयोजन र कानुनी प्रक्रिया उनैले मिलाएका थिए ।

निलम्बित सांसद रेशम चौधरीपत्नी रञ्जिताको अध्यक्षतामा गठन भएको ‘नागरिक उन्मुक्ति पार्टी’ मा २१ सदस्यीय केन्द्रीय समिति छ । निर्वाचन आयोगबाट दर्ता प्रमाणपत्र प्राप्त गरेपछि पार्टीलाई देशव्यापी रूपमा विस्तार गरिने अध्यक्ष श्रेष्ठले बताइन् ।

प्रकाशित मिति: आइतबार, माघ ९, २०७८ १७:५७