पहाडी जिल्लाका लागि प्रदेश सरकारले किन्यो अत्याधुनिक एम्बुलेन्स

A+ A A-

सुदूरपश्चिम प्रदेश सरकारले ७ पहाडी जिल्लाका ‘बी ग्रेड’ को एम्बुलेन्स खरिद गरेको छ। सूदूरपश्चिमका ७ पहाडी जिल्ला डडेल्धुरा, बैतडी, डोटी, दार्चुला, बझाङ,अछाम र बाजुराका १६ निर्वाचन क्षेत्रका लागि सरकारले अत्याधुनिक एम्बुलेन्स खरिद गरेको हो।

संघीय सरकारको अर्थ मन्त्रालयले भन्सार छुटका लागि इजाजत दिएपछि सामाजिक विकास मन्त्रालयले ३९ लाखका दरले ‘बी ग्रेड’ का एम्बुलेन्स खरिद गरेको हो। एम्बुलेन्स खरिद गरी यातायात व्यवस्था कार्यालयमा दर्ता प्रक्रिया अगाडि बढेको मन्त्रालयले जनाएको छ।

हरेक निर्वाचन क्षेत्रको एउटा स्थानीय तहलाई मर्मत र चालकको व्यवस्था गर्ने गरी एम्बुलेन्स हस्तान्तरण गरिने छ । सबै एम्बुलेन्स ’बी ग्रेड’ का खरिद गरेको मन्त्रालयले जानकारी दिएको छ।

प्रदेशको सामाजिक मन्त्रालयले आर्थिक वर्ष २०७५/०७६ को बजेटमा एम्बुलेन्स खरिदका लागि ६ करोड २५ लाख रुपैयाँ विनियोजन गरेको थियो। सोही बजेटबाट मन्त्रालयले सवा ६ करोड मूल्य पर्ने १६ वटा अत्याधुनिक एम्बुलेन्स खरिद गरेको हो।

सुदूरपश्चिममा अहिलेसम्म थिएनन् ‘बी ग्रेड’का एम्बुलेन्स

सुदूरपश्चिममा ’बी ग्रेड’ को अहिलेसम्म एउटा पनि एम्बुलेन्स थिएनन्। सूदूरपश्चिमका पहाडी जिल्लामा प्रदेश सभाका १६ निर्वाचन क्षेत्र रहेका छन्।

किनिएका एम्बुलेन्स दशै अगाडि सम्बन्धित संस्थालाई एम्बुलेन्स हस्तान्तरण गरिने मन्त्रालयका सह–सचिव तथा प्रवक्ता झंकरबहादुर विष्टले शिलापत्रलाई जानकारी दिए। सुदूरपश्चिमका पहाडी जिल्लामा एम्बुलेन्स नहुँदा धेरै बिरामीले अकालमा ज्यान गुमाउनु परेको थियो।

’बी ग्रेड’ को एम्बुलेन्समा सबै आकस्मिक उपकरणसँगै ट्राभलिङ भेन्टिलेटर, अटोमेटेड एक्सटर्नल डिफ्राइब्रिलेटर, चेस्ट ड्रेनेज ट्युब, हेमो स्टेटिक सेटबाहेक ’ए ग्रेड’का सबै उपकरण र सुविधा हुने बताइएको छ।

मन्त्रालयले दिएको जानकारी अनुसार डडेल्धुराको भागेश्वर र नवदुर्गा स्वास्थ्य चौकी, बैतडीको रुद्रेश्वर र कुलाउ, डोटीको जिल्ला अस्पताल र चमारा स्वास्थ्य चौकी, दार्चुलाको हिकिला र खार स्वास्थ्य चौकी तथा बझाङको मटेला र रायल स्वास्थ्य चौकीमा एम्बुलेन्स वितरण गरिने छ ।

त्यस्तै बाजुराको कोल्टी प्राथमिक स्वास्थ्य केन्द्र र टाटे स्वास्थ्य चौकी, अछामको जिल्ला अस्पताल र बाब्ला स्वास्थ्य चौकी,अछामको बान्नीगढी र विनायक स्वास्थ्य चौकीलाई संयुक्त रुपमा एउटा एम्बुलेन्स हस्तान्तरण हुने बताइएको छ।

प्रकाशित मिति: आइतबार, साउन २६, २०७६ ००:१३