शाेकमा पनि मतदान, भन्छन्- देशमा भद्रगोल नहोस्

A+ A A-

आमा बितेपछि तनहुँ गाछेपानीका शिव पन्तको परिवार दुई दिनदेखि किरिया बसेको छ । आफूहरू शाेकमा रहे पनि आफ्नो ठाउँबाट जनप्रतिनिधि चुन्ने अधिकार भने उनीहरूले प्रयोग गरेका छन् ।

पन्त परिवार प्रतिनिधि तथा प्रदेश सभा निर्वाचनअन्तर्गत आइतबार मतदान गर्न शुक्लागण्डकी नगरपालिका–२ को शिला प्राथमिक विद्यालय मतदान केन्द्र पुगेको थियो । हिन्दु परम्पराअनुसार किरिया बस्दा कसैलाई छुन हुँदैन । उनीहरूले सहयोगीमार्फत आफ्नो मत खसालेका हुन् ।

शिवसहित श्रीमती सुनिता, दाइ विष्णु र उनकी श्रीमती मथुरा लामिछाने पन्त (सिर्जना) ले पनि सहयोगीमार्फत मन लागेको चिन्हमा मत खसाएका छन् । उनीहरूले तनहुँ निर्वाचन क्षेत्र २ र प्रदेश सभातर्फ तनहुँ २ (१) मा मतदान गरे ।

पाँच वर्षको अवधिमा आउने मौका गुमाउनु हुँदैन भनेर आफूहरू मतदानमा सहभागी भएको शिवले सुनाए । ‘चुनाव राम्रा जनप्रतिनिधि छान्ने अधिकार, मौका हो । यो मौकालाई गुमाउनु हुँदैन भनेर हाम्रो संस्कृतिअनुसार कसैलाई नछोइ अधिकार प्रयोग गरेका छौँ’, उनले भने, ‘पहिलाका जनप्रतिनिधिले चाहेअनुसार नगरे पनि अबकाले गरून् भन्ने अपेक्षा हो ।’

देशमा भद्रगोल भइरहेको र सक्षम व्यक्तिले जितोस् भन्ने चाहनाअनुसार मतदान गर्न आएको सिर्जनाले सुनाइन् । ‘पीडाको घडीमा यसरी आएको पाँच वर्षलाई राम्रो उम्मेदवार छान्न हो’, उनले भनिन्, ‘देशमा जुन भद्रगोल भइरहेको छ, यस्तो नहोस् र हाम्रो मतले राम्रो व्यक्तिले जित्न सकोस्, देशका लागि केही गरोस् भनेरै पीडाको घडीमा पनि आफ्नो अधिकार प्रयोग गर्न आएका हौँ ।’

तनहुँमा आइतबारको चुनावका लािग २ लाख ४८ हजार २९५ जनाले मतदाता थिए । तनहुँ क्षेत्र नम्बर १ मा १ लाख २३ हजार ९० र क्षेत्र नम्बर २ मा १ लाख २५ हजार ५ मतदाता थिए । कुलमध्ये ५५ प्रतिशतले मतदान गरेको निर्वाचन कार्यालयको प्रारम्भिक अनुमान छ ।

लमजुङको मध्यनेपाल नगरपालिका–५ स्थित सम्झना मावि मतदान केन्द्रमा श्रीमान्को किरिया बसेकी कल्पना परियारले मतदान गरेकी छन् । चार दिनअघि श्रीमान् दीपक परियारको मृत्यु भएपछि किरिया बसिरहेकी उनले आफैँ छाप लगाएर मत खसालेकी हुन् । कल्पनाले मत हालेको क्षेत्र लमजुङ प्रदेश सभा २ मा पर्छ । प्रतिनिधिसभातर्फ भने लमजुङमा एउटा मात्रै निर्वाचन क्षेत्र छ ।

प्रकाशित मिति: सोमबार, मंसिर ५, २०७९ ०४:१३