मतदाताका कुरा– संकेत मिलिसक्यो, नसच्चिए ठूला दल पत्तासाफ हुन्छन्

A+ A A-

कास्कीका सम्भव भुर्तेल काठमाडौंमा सफ्टवेयर कम्पनीमा काम गर्छन् । २३ वर्षीय उनले जनप्रतिनिधि छान्न आइतबार जीवनमै पहिलोपटक मतदान गरेका छन् । प्रतिनिधिसभा र प्रदेशसभा सदस्य चुनावमा भाग लिन उनले अफिसबाट दुई दिन बिदा नै लिएर पोखरा आएका रहेछन् । ‘दुःख गरेरै भोट हाल्न आउनुको कारण देशमा व्याप्त निराशा छ । हामीले नै त्यसलाई भोट हालेर सुधार्ने हो,’ मतदानपछि उनले सुनाए । राजनीतिक दललाई सोच्न बाध्य गराउने गरी पछिल्लो माहौलअनुसार नै उनले मत खसालेको अनुमान लगाउन सकिन्छ ।

सम्भवले पोखरा महानगरपालिका–११ को शिवशक्ति क्याम्पस मतदान केन्द्रबाट मतदान गरेका हुन् । प्रविधिको जमानामा पनि लाइन बसेर मत खसाल्दा भने उनलाई चित्त बुझेन । डिजिटल भोटिङको व्यवस्था गर्दा छरितो र सजिलो पनि हुने उनको भनाइ छ । ‘वृद्धवृद्धालाई गाह्रो होला तर सिकाउन सकिँदो रहेछ भन्ने छिमेकी देशकै हेर्न सक्छौँ,’ सम्भव भन्छन्, ‘चुनाव भएपछि सात÷आठ दिन समाचार नै हेर्नुपर्छ । यसरी मतदान गर्दा मतपत्र च्यातिने पनि हुन्छ । डिजिटल भोटिङ भए यी कुरा हुँदैनन्, व्यवस्थित हुन्छ ।’

शिवशक्ति क्याम्पस मतदान केन्द्रबाटै पोखरा–११ फूलबारीका उदयराज अधिकारीले पनि मतदान गरे । उनले विगतभन्दा यसपटक फरक ठाउँमा आफूले मतदान गरेको सुनाए । पुराना पार्टीलाई काम गर्नुपर्छ भन्ने सन्देश अहिलेको चुनाव र मतदानले देखाउने उनी दाबी गर्छन् ।

चुनावी नतिजा र राजनीतिक परिवेश फरक ढंगले आउने उदयको अनुमान छ । अघिल्ला चुनावमा घण्टौँ लाइन बसेर मतदान गर्नुपर्ने अवस्था थियो । तर, यसपटक मतदाताको उपस्थिति उत्साहपूर्ण देखिएन । यसले राजनीतिक दलप्रतिको वितृष्णा स्पष्ट पार्ने अधिकारीको दाबी छ । त्यसमा उनी अब राजनाीतिक दल नसच्चिए अर्को चुनावमा पत्तासाफ हुने पनि थप्छन् । ‘अब राजनीतिक नेतालाई के शंका लागेको छ भने जिते पनि यही तरिकाले शासनसत्ता चलाउन थाले टिकिन्न है भन्ने संकेत मिलेको छ,’ अधिकारी भन्छन्, ‘यही तरिकाले गए निश्चित रूपमा पत्तासाफ भएर जान्छन् । नयाँ पार्टीले राजनीतिक फड्को मार्नेछ ।’

अब पाँच वर्ष शासनसत्ता चलाउनेले जनचाहनाअनुसार काम नगरे जमानत गुमाउने अवस्था आउन सक्ने ठोकुवा अधिकारी गर्छन् । उनी भन्छन्, ‘देश विकास, आर्थिक स्थिति सुधारलगायत विकास निर्माण्लाई सशक्त ढंगले अगाडि नबढाए अर्कोपटक पार्टी जमानत नै जफत नहोला भन्न सकिँदैन ।’

सम्भव र विजयले मतदान गरेको पोखरा–११ कास्की क्षेत्र नम्बर २ मा पर्छ । यहाँ नेकपा एमाले, एकीकृत समाजवादी, राप्रपा, नेपाल मजदुर किसान पार्टी, राष्ट्रिय स्वतन्त्र पार्टीसहित पाँच स्वतन्त्र गरेर १७ जना उम्मेदवार चुनावी मैदानमा छन् । कास्की–२ का मतदान केन्द्र डुल्दा स्वतन्त्र पार्टीका माधवप्रसाद कँडेल र स्वतन्त्र उम्मेदवार महादेव गुरूङले राम्रै मत पाउने अवस्था देखिएको छ ।

कास्की–१ मा पर्ने मतदान केन्द्रमा भेटिएका मतदातामा पनि पुराना राजनीतिक दलप्रति र पुराना पार्टीप्रति वितृष्णा सुनियो । पोखरा–१५ कोलपाटनस्थित केन्द्रमा मत हालेकी प्रतीक्षा कार्कीले पनि यसपटक नयाँ उम्मेदवारलाई मत हालेको सुनाइन् । ‘पहिला भोट हालेकाले केही गरेर देखाएनन् । नयाँलाई भोट हालियो,’ उनले सटिक जवाफ दिइन् ।

कार्कीसँगै रहेका पोखरा–१५ कै रामचन्द्र क्षेत्रीले दलहरूप्रतिको वितृष्णाले स्वतन्त्रप्रति राम्रो माहोल बनेको बताए । उनले त रवि लामिछाने नेतृत्वको स्वतन्त्र पार्टीले समानुपातिकमा राम्रै मत ल्याउने पनि सुनाए । ‘मान्छेले समानुपातिकमा त स्वतन्त्र पार्टीलाई मत हालेकोजस्तो लाग्छ,’ उनी भन्छन्, ‘स्वतन्त्रको धेरै सिट नआउला । दलहरुलाई सच्चिन, देशमा तिमीहरूमात्रै छैनौ भन्ने सन्देश दिन्छजस्तो लाग्छ ।’

देशभरजस्तै कास्कीमा पनि रवि लामिछाने नेतृत्वको राष्ट्रिय स्वतन्त्र पार्टी र स्वतन्त्र उम्मेदवारले राम्रो मत पाउने संकेत मतदान केन्द्र पुगेर मतदातासँग कुरा गर्दा देखिएको छ । कास्कीका ३ वटा निर्वाचन क्षेत्रमा २ लाख ९१ हजार ५६८ मतदाता छन् । प्रारम्भिक जानकारीअनुसार कास्कीमा ५९ प्रतिशत मत खसेको छ ।

प्रकाशित मिति: आइतबार, मंसिर ४, २०७९ १९:५७