चुनावका लागि मधेस प्रदेशको सुरक्षा व्यवस्था कडा, ९० प्रतिशत मतदानस्थल संवेदनशील

चुनावका लागि मधेस प्रदेशको सुरक्षा व्यवस्था कडा, ९० प्रतिशत मतदानस्थल संवेदनशील

A+ A A-

४ मंसिरमा हुने प्रदेश र प्रतिनिधिसभा चुनावका लागि मधेस प्रदेशमा सुरक्षा व्यवस्था कडा पारिएको छ । छिमेकी मुलुक भारतसँग सीमा जोडिएको मधेस प्रदेशको सुरक्षा व्यवस्था निर्वाचनलाई मध्यनजर गर्दै कडा पारिएको मधेस प्रदेश प्रहरी कार्यालयले जनाएको छ ।

मधेस प्रदेशका ८ वटै जिल्ला सप्तरीदेखि पर्सासम्म भारतसँग ३६७ किलोमिटर सीमा जोडिएको छ । भारतसँगको खुला सिमाना कारण सुरक्षा व्यवस्थालाई ध्यानमा राखेर बिहीबार राति १२ बजेदेखि नै सबै सीमा नाकाहरू बन्द गरिएको छ भने सीमावर्ती क्षेत्रमा व्यापक मात्रामा सुरक्षाकर्मी परिचालन गरिएको छ ।

मधेस प्रदेशमा निर्वाचनका लागि २ हजार १ सय ५६ मतदानस्थलमा ४ हजार २ सय ३५ मतदान केन्द्र तोकिएको छ । २ हजार १ सय ५६ मतदानस्थलमध्ये १ हजार २ सय २९ वटा मतदानस्थल अति संवेदनशील, ७ सय २९ संवेदनशील र १ सय ४७ वटा मतदानस्थल मात्रै समान्य सूचीमा राखिएको मधेस प्रहरी कार्यालयले जनाएको छ । अर्थात मधेस प्रदेशका करिव ९० प्रतिशत मतदानस्थल संवेदनशील सूचीमा राखिएको छ ।

चुनाव निष्पक्ष र भयरहित वातावरणमा गराउन प्रदेशमा १३ हजार नेपाल प्रहरीसहित करिव ४० हजार सुरक्षाकर्मी परिचालन गरिएको मधेस प्रदेश प्रहरी कार्यालयमा प्रवक्ता प्रहरी उपरीक्षक सुमन कुमार तिमल्सिनाले जानकारी दिए । चुनावको सुरक्षाको सम्पूर्ण तयारी पूरा भइसकेको जानकारी दिदै प्रवक्ता तिमल्सिनाले भने, ‘सबै मतदानस्थलहरूमा सुरक्षाकर्मी पुगिसकेका छन् भने सिमावर्ती क्षेत्र र ग्रामीण क्षेत्रमा प्रहरीको पेट्रोलिङ गस्तीका साथसाथै सादा पोशाकमा सुरक्षाकर्मी परिचालन गरिएको छ ।’

‘चुनावका लागि तीन घेराको सुरक्षा व्यवस्था मिलाइएको छ,’ उनले भने, ‘पहिलो घेरामा नेपाली सेना, दोस्रो घेरामा सशस्त्र प्रहरी र मतदानस्थलमा नेपाल प्रहरी परिचालन गरिन्छ ।’ गत स्थानीय तहको चुनावमा मतपेटिका लुटिएको तथा झडप भएका जिल्लाहरूको सुरक्षा व्यवस्थाको जिम्मेवारीमा वरिष्ठ प्रहरी उपरीक्षकहरूलाई पठाइएको उनले बताए । सर्लाही र रौतहट जिल्लाको चुनावी सुरक्षा व्यवस्था मिलाउन वरिष्ठ प्रहरी उपरीक्षक खटाइएको उनले बताए ।

यता, मतदानको पूर्वसन्ध्यामा मधे प्रदेशका प्रहरी प्रमुख डीआईजी मकसुद आलम खाँको नेतृत्त्वमा ४ वटै सुरक्षा निकायका अधिकारीहरूले शुक्रवार दिउँसो ८ वटै जिल्लाको सुरक्षा व्यवस्थाको अनुगमन र निरीक्षण गरेका छन् । सुरक्षा अधिकारीहरूको टोलीले हेलिकोप्टरमार्फत ८ वटै जिल्लाको सुरक्षा व्यवस्थाको अवस्थाबारे जानकारी लिएको प्रवक्ता तिमल्सिनाले जानकारी दिए ।