स्थानीय चुनावमा विकृति हटाउने भन्दै विद्रोह गरेका जगन्नाथले किन दिएनन् दिनेशलाई साथ ?

स्थानीय चुनावमा विकृति हटाउने भन्दै विद्रोह गरेका जगन्नाथले किन दिएनन् दिनेशलाई साथ ?

A+ A A-

१५ बैशाख २०७९ मा भरतपुर महानगरपालिकाका तत्कालीन मेयर उम्मेदवार जगन्नाथ पौडेलले शिलापत्रसगँ कुरा गर्दै भनेका थिए ‘मैले कांग्रेसभित्र भएको विकृति हटाउन उम्मेदवारी दिएको हुँ ।' केन्द्रबाट जति दबाब आए पनि पछि नहट्ने उनको अडान थियो ।

‘अब मैले चाहेर केही हुँदैन । म जिल्लाभरिका साथीहरूको घेराबन्दीमा छु । यो कांग्रेस राजनीतिको सुदूरभविष्यसँग जोडिएको कुरा हो,’ चुनाव चिह्न रुख नभए पनि भरतपुर महानगरपालिकामा नेपाली कांग्रेसको उम्मेदवार नभएकाले आफैँ कांग्रेसको उम्मेदवार भएको उनको दाबी थियो । उनले भनेझै भरतपुरमा उनलाई जनताको राम्रै सहयोग भयो । चुनाव जित्न नसके पनि उनले सम्मानजनक १४ हजार ७ सय २८ भोट पाए ।

प्रदेश र प्रतिनिधिसभा निर्वाचन २०७९ मा पनि त्यही घटना दोहोरियो । चितवन क्षेत्र नम्बर ३ मा कांग्रेसका केन्द्रीय सदस्य दिनेश कोइराला बागी उम्मेदवार बनेका छन् । उनीसँगै पौडेल पनि चुनावी मैदानमा छन् । कोइरालाको असन्तुष्टि पनि अघिल्लोपटक पौडेलले गरे जस्तै छ ।

‘पार्टीमा बिसंगतीमा बढ्यो । परिवारबाद, पैसाबाद मौलायो त्यसकारण म केन्द्रीय सदस्य जस्तो पदको ख्याल नगरी बिद्रोहमा उत्रिएँ,’ उनले भने । अघिल्लोपटक जगन्नाथको भन्दा योपटक दिनेशको माहाैल केही फरक छ । चितवन ३ बाट प्रचण्ड बाहिरिएपछि कांग्रेस नेताले टिकट पाउँछन् भन्ने त्यहाँका कांग्रेसहरूको आकलन थियो । तर नेकपा माओवादी केन्द्रका डा भोजराज अधिकारीले गठबन्धनको तर्फबाट टिकट पाए ।

त्यस्तै नेकपा एमालेका अध्यक्ष केपी शर्मा ओलीले आफ्नो पार्टीका उम्मेदवार रामप्रसाद न्यौपानेको उम्मेदवारी फिर्ता गराएर कोइरालालाई सर्मथन गर्ने निणर्य गरे । सर्मथन मात्रै होइन, ओलीले चितवनमा भएको चुनावी कार्यक्रममा दिल खोलेर उनको प्रसंसा गरे । र कोइरालालाई जिताउन अपिल गरे । एमालेको सर्मथनपछि अघिल्लो चुनावमा जगन्नाथको समर्थन गरिरहेका कांग्रेस अग्रज नेताहरूले पनि दिनेशलाई सर्मथन गरेका छन् । तर जगन्नाथले किन उनलाई समर्थन गरेनन् भन्ने प्रश्न उब्जिएको छ ।

कसैलाई छोड्नका लागि आफुले उम्मेदवारी नदिएको जन्नाथ बताउँछन् । ‘सबैले आ–आफ्नो उद्देश्यका लागि उम्मेदवारी दिने हो । मसगँ बजेट निर्माणका लागि योगदान गर्न सक्ने क्षमता छ, सरकार निमार्णमा सहयोग गर्न सक्ने परिपक्कता छ, संसदमा अनुभव छ । व्यवसायिक पृष्ठभूमिको हिसावले म कानुनमा काम गरेको मान्छे । सांसद हुने तर पार्लियामेन्टमा विधेयक पास गर्न नसक्ने हो भने कसरी चल्छ,’ उनले भने ।

अघिल्लापटक आफूले विद्रोह गरिरहँदा कोइराला गठबन्धनमै भएकाले पनि आफ्नो र कोइरालाको बाटो फरक भएको उनको तर्क छ । ‘अघिल्लोपटक मैले विद्राेह गरिरहँदा दिनेश जी गठबन्धनमा हुनुहुन्थ्यो । त्यतिबेला त आवाज उठाउनुभएन । अहिले फेरि त्यही गठबन्धन मन नपरेर एमालेमा टाँसिन जानुभएको छ,’ पौडेलले भने ।

आफ्नो जित सुनिश्चत भइसकेकाले पौडेलको सर्मथन नहुनाले फरक नपर्ने कोइरालाको तर्क छ । ‘उहाँ मात्र होइन, यो क्षेत्रमा । १८/१९ जना स्वतन्त्र उम्मेदवार हुनुहुन्छ । मैले त्यता ध्यान दिएको छैन । हिजो उहाँलाई सहयोग गर्ने पूर्व जिल्ला सभापति कृष्णलाल सापकोटा, पूर्व सांसद भिमबहादुर श्रेष्ठ, मिना खरेललगायत जिल्लाका अघिकांश नेता/कार्यकर्ताहरूको साथ मलाई छ ।'

पार्टीका केही नेता कोइरालाको पक्षमा लाग्दैमा आफू कमजोर नभएको पौडेलको तर्क छ । ‘कोही आउनुभयो कोही जानुभयो । स्थानीय निर्वाचनमा भएको भुँइकटहर आन्दोलनमा ३० हजार जना संलग्न थिए । त्यहाँ कोही नेता थिएन र कोही कार्यकर्ता थिएन । २/४ जना भएनन् भन्दैमा केही फरक पर्दैन,’ उनले भने ।

प्रकाशित मिति: बिहीबार, मंसिर १, २०७९ १५:४०