धनुषाका चारवटै क्षेत्रमा दुई गठबन्धनबीच तीव्र प्रतिस्पर्धा, यस्तो छ चुनावी गणित

धनुषाका चारवटै क्षेत्रमा दुई गठबन्धनबीच तीव्र प्रतिस्पर्धा, यस्तो छ चुनावी गणित

A+ A A-

चुनावको मौन अवधि सुरु हुन दुई दिन मात्र बाँकी रहँदा धनुषामा चुनावी सरगर्मी उफानमा छ । राष्ट्रिय पार्टीका उम्मेदवारदेखि स्वतन्त्र उम्मेदवारहरू पनि चुनावी महौल बनाउन अहोरात्र खटिइरहेका छन् ।

२ लाख ५२ हजार ९१५ पुरुष, २ लाख २१ हजार ६६५ महिला र अन्य ७ गरी कुल ४ लाख ७४ हजार ५८७ जना मतदाता रहेको धनुषामा प्रतिनिधिसभाका ४ र प्रदेशसभाका ८ सिट छन् । अहिलेसम्मको धनुषाको चुनावी अवस्थालाई विश्लेषण गर्दा धनुषाका चारवटै निर्वाचन क्षेत्रमा सत्तारुढ गठबन्धन र विपक्षी गठबन्धनबीच नै प्रतिस्पर्धा हुने देखिन्छ ।

धनुषा १ : पुरानै अनुहारबीच प्रतिस्पर्धा

धनुषा निर्वाचन क्षेत्र नम्बर १ मा पुरानै उम्मेदवारबीच चुनावी प्रतिस्पर्धी हुँदैछ । सत्तारुढ गठबन्धनबाट नेकपा माओवादी केन्द्रका मातृकाप्रसाद यादव र एमाले–जसपा गठबन्धनबाट जसपाका दीपक कार्कीबीच मुख्य प्रतिस्पर्धा हुने आकलन छ ।

२०७४ को निर्वाचनमा मातृका यादव २६ हजार ४१८ मत ल्याई विजयी भएका थिए भने कार्कीले १७ हजार २९६ मत पाएका थिए ।

अहिले यी दुवैको मुख्य प्रतिस्पर्धामा जनमत पार्टीका उम्मेदवार किशोरी साह (कमल) र राप्रपाका उम्मेदवार मनोज मल्लको भूमिकाले प्रतिस्पर्धालाई रोचक बनाइदिएको छ । कमल यसअघि सो क्षेत्रको प्रदेशसभाको १ बाट एमालेको टिकटमा निर्वाचित भएका थिए । तर, योपटक एमालेले उनलाई टिकट नदिएपछि उनी जनमतबाट उम्मेदवार बनेका छन् ।

यो क्षेत्रमा सबैला नगरपालिका, गणेशमान चारनाथ, धनुषाधाम, हंसपुर नगरपालिकाका पाँचवटा वडा, मिथिला विहारीका ५ वडा, क्षिरेश्वर नपाका २ वडा र मिथिला नपाका चारवटा गरी ४५ वटा वडा पर्छन् ।

स्थानीय तहको निर्वाचनमा कांग्रेसका वडाध्यक्ष उम्मेदवारले १७ हजार ५५०, एमालेका वडाध्यक्ष उम्मेदवारले १५ हजार ८१७, माओवादीका उम्मेदवारले १२ हजार २९२ र जसपाका उम्मेदवारले ९ हजार १० मत प्राप्त गरेका थिए ।

त्यस्तै, लोसपाका उम्मेदवारले ६ हजार ६२४, राप्रपाका उम्मेदवारले ४ हजार ९३०, जनमत पार्टीले ३ हजार ३२०, एकीकृत समाजवादीले २ हजार ९३७ र स्वतन्त्र उम्मेदवारले ३ हजार ३२४ मत पाएका थिए ।

स्थानीय तहको निर्वाचनमा दलहरूले पाएको मतलाई अधार मान्ने हो भने यहाँ सत्तारुढ गठबन्धन दलका उम्मेदवार यादव बलियो देखिन्छन् । त्यसैगरी, गठबन्धनभित्रको अन्तर्घात रोक्न प्रदेशका दुवै क्षेत्रमा कांग्रेसबाट उम्मेदवार बनाएको छ । माओवादी केन्द्रका नेता दीपक यादवले विगतमा उम्मेदवार मातृका यादवले गरेको काम र पाँचदलीय गठबन्धनले स्थानीय तहमा पाएको मतले सत्तारुढ गठबन्धनका उम्मेदवारको जित सुनिश्चित रहेको दाबी गरे ।

यता, जसपाका उम्मेदवार कार्की पनि विगतमा आफू निकटतम प्रतिद्वन्द्वी रहेको र यो निर्वाचनमा एमालेको साथ रहेकाले आफ्नो जित सुनिश्चित रहेको दाबी गर्छन् । यो क्षेत्रमा यादव र पहाडी समुदायको वर्चस्व छ । तर, कार्कीसँगै पहाडी समुदायबाट राप्रपाको टिकटमा मनोज मल्ल पनि चुनावी मैदानमा रहेकाले पहाडी भोट पनि बाँडिने सम्भावना छ ।

धनुषा–२ : तीन पूर्वमन्त्री प्रतिस्पर्धामा

धनुषा निर्वाचन क्षेत्र– २ मा तीन जना पूर्वमन्त्री चुनावी मैदानमा उत्रिएपछि यो क्षेत्रको चुनाव रोमाञ्चक बन्न पुगेको छ । तीनमध्ये दुई जना सत्तारुढ गठबन्धनकै पूर्वमन्त्री छन् । विपक्षी गठबन्धन (एमाले–जसपा)ले पनि अगल–अलग उम्मेदवार खडा गरेपछि त्यो क्षेत्रको निर्वाचन सबैको चासोको विषय बनेको छ ।

सत्तारुढ गठबन्धनबाट कांग्रेस नेता पूर्वमन्त्री रामकृष्ण यादव र नेकपा एकीकृत समाजवादीका नेता पूर्वमन्त्री रामचन्द्र झाले उम्मेदवारी दिएका छन् ।

त्यसैगरी, विपक्षी गठबन्धनको एमालेबाट पूर्वमन्त्री उमाशंकर अरगरिया र जसपाबाट गंगाराम यादवले उम्मेदवारी दिएका छन् । यो क्षेत्रमा सत्तारुढ गठबन्धनका आधिकारिक उम्मेदवार कांग्रेसका यादव हुन् । कांग्रेसबाट यादवसँगै प्रदेशसभा (१) मा लोसपाबाट सञ्जय साह र (२) मा माओवादी केन्द्रबाट श्यामसुन्दर यादव उम्मेदवार छन् ।

त्यसैगरी, नेकपा एसका उम्मेदवार झाले प्रदेशसभा सदस्यमा दुवै क्षेत्रबाट आफ्नै पार्टीका उम्मेदवार खडा गरेका छन् । प्रदेशसभा (१) बाट शैलेन्द्र यादव र (२) बाट रामनारायण साह उम्मेदवार छन् ।

चुनावको मुखमा लोसपा छाडेर एमालेमा प्रवेश गरेका पूर्वमन्त्री अरगरिया २०७४ सालको निर्वाचनमा उपेन्द्र यादव नेतृत्वको तत्कालीन संघीय समाजवादी फोरमबाट निर्वाचित भएका थिए । पार्टीले टिकट पूर्वमन्त्री अरगरियालाई दिने भएपछि एमालेसँग ४० वर्षे साइनो छाडेर आफ्नो पार्टीमा प्रवेश गरेका गंगाराम यादवलाई जसपाले उम्मेदवार बनाएको छ ।

एमालेबाट प्रदेशसभा (१) बाट लखन दास र (२) बाट सञ्जीव झाले उम्मेदवारी दिएका छन् । जसपाबाट (१) मा शैलेन्द्र यादव र (२) बाट रामआशिष यादवले उम्मेदवारी दिएका छन् । यादवद्वय २०७४ सालको निर्वाचनमा प्रदेशसभा सदस्यमा निर्वाचित भएका थिए । यी दुवै जना तत्कालीन संघीय समाजवादी फोरमबाट प्रदेशसभा र प्रतिनिधिसभामा अरगरिया निर्वाचित भएका थिए । तत्कालीन फोरम र राजपा मिलेर जसपा भयो । तर, तत्कालीन नेकपाको विभाजनसँगै जसपा पनि विभाजित भयो । विभाजनका क्रममा अरगरिया लोसपा रोजेर १८ दिनका लागि संघीय मन्त्रीसमेत भए ।

यसरी क्षेत्र नम्बर २ मा तीन जना पूर्वमन्त्री र पदमा नभएर पनि आफ्नो लगानी तथा चन्दा संकलन गरेर विद्यालय, अस्पताल बनाएर सो क्षेत्रमा आफ्नो राम्रो छवि बनाएका गंगाराम यादवबीच चुनावी प्रतिस्पर्धा रोचक हुने अनुमान गरिएको छ ।

स्थानीय तहको मतदान र पार्टीहरूको संगठनलाई आधार मान्ने हो भने यो क्षेत्रमा सत्तारुढ गठबन्धनका उम्मेदवार यादव बलिया देखिन्छन् भने दोस्रोमा एमाले र तेस्रोमा जसपाका उम्मेदवार ।

व्यक्तित्वको हिसाबले सो क्षेत्रका पुराना वामनेता हुन्, पूर्वमन्त्री रामचन्द्र झा । विभिन्न आन्दोलनमा जेलनेल सहेका नेता झा एकपटक स्थानीय विकासमन्त्रीसमेत भएका थिए। पूर्वी धनुषामा नेता झाले दर्जनौँ कम्युनिस्ट नेताहरू उत्पादन गरेको बताइन्छ । एमालेका सचिव रघुवीर महासेठलाई अगाडि ल्याउनुमा नेता झाको ठूलो भूमिका छ ।

नेता झा दुईपटक लगातार निर्वाचित भए भने दुईपटक २०७० र २०७४ सालमा लगातार पराजित भए । तर, यो निर्वाचनमा आफ्ना पुराना सहयोगीहरूले साथ दिने आश्वासन दिएपछि उनले पार्टीलाई दबाब दिएरै टिकट हात पारेका हुन् ।

त्यसैगरी, संगठन र स्थानीय तह चुनावको मतका आधारमा यो क्षेत्रमा अगाडि रहेका पाँचदलीय गठबन्धनका उम्मेदवार रामकृष्ण यादव दुईपटक मन्त्री र एकपटक सार्वजनिक लेखा समितिका सभापति भएका छन् । पूर्वमन्त्री यादव २०७४ सालको निर्वाचनमा अरगरियासँग पराजित भएका थिए । तर, उनले आफूले मन्त्री हुँदा आफ्नो क्षेत्रमा गरेको विकास र गठबन्धनको सहयोगले चुनावमा बाजी मार्ने बताउँदै आएका छन् ।

२०७४ सालको निर्वाचनमा लोकप्रिय मत ल्याएका एमाले उम्मेदवार अरगरिया भने यो चुनावमा पनि राम्रो मत ल्याएर निर्वाचित हुने विश्वासमा छन् । ‘२०७४ सालमा तत्कालीन फोरमबाट उम्मेदवारी दिँदा सो क्षेत्रमा पार्टीको संगठन नरहेको अवस्थामा जनताले अत्यधिक मत ल्याएर जिताए,’ अरगरियाले भने, ‘यसपालि त यो क्षेत्रमा पार्टीको राम्रो संगठन छ । म १८ दिनको मन्त्री मात्रै भएर होइन, सांसदकै रूपमा धेरै विकासका काम गरेको छु । जुन काम सो क्षेत्रबाट धेरैपटक मन्त्री भएकाहरूले पनि गर्न सकेनन् । जनताले त्यसको मूल्यांकन गरेर मतदान गर्छन् ।’

तर, सोही क्षेत्रबाट एमालेकै पुराना नेता गंगाराम यादवले जसपाबाट उम्मेदवारी दिएकाले संगठनको मत विभाजन हुने सम्भावना पनि उत्तिकै छ । २०७४ सालको निर्वाचनमा अरगरियाले ३२ हजार ४४ मत ल्याउँदा रामचन्द्र झाले १८ हजार ७१५ र रामकृष्ण यादवले १५ हजार ४४२ मत ल्याएका थिए ।

यो क्षेत्रमा ७ स्थानीय तहका ४४ वडा छन् । कमला नगरपालिकाका नौवटा, शहीदनगर नगरपालिकाका नौवटा, जनकनन्दनी गाउँपालिकाका ६ वटा र औरही गाउँपालिकाका ६ वटा वडा यस क्षेत्रमा पर्छन् । विदेह नगरपालिकाका ८ वटा र हंसपुर नगरपालिकाका ४ वटा वडा यस क्षेत्रमा पर्छन् । जनकपुरधाम उपमहानगरका वडा नम्बर १७ र १८ पनि यो क्षेत्रमा पर्छन् ।

गत स्थानीय निर्वाचनको ४४ वटै वडाको मत जोड्दा जसपाभन्दा कांग्रेसको मत झण्डै साढे सात हजारले बढी छ । कांग्रेसले २१ हजार २३२ र जसपाले १३ हजार ८८९ मत पाएको थियो । तेस्रोमा एमालेले ११ हजार ५८३, चौथोमा माओवादी केन्द्रले १० हजार ७९४, पाँचौँमा एकीकृत समाजवादीले ८ हजार ९९७ मत पाएको थियो । सबैभन्दा कम लोसपाले ६ हजार ७१३ मत पाएको थियो ।

धनुषा ३ मा निधि र मुस्लिम फ्याक्टर निर्णायक

धनुषा क्षेत्र नं. ३ मा सत्ता गठबन्धन र विपक्षी गठबन्धनबीच कडा टक्कर हुने देखिन्छ । सत्तारुढ गठबन्धन दल लोसपाबाट अनिल झा र विपक्षी गठबन्धनबाट एमाले नेतृ जुली कुमारी महतो उम्मेदवार छन् । यी दुईबीच मुख्य प्रतिस्पर्धा हुने आकलन छ । त्यसबाहेक स्वतन्त्र उम्मेदवार उमेश साह, जनत पार्टीका उम्मेदवार शम्भुनाथ साह पनि चुनावी महौल आफ्नो पक्षमा पार्न कम्मर कसेर लागेका छन् ।

यो निर्वाचन क्षेत्रमा जनकपुरधाम उपमहानगरपालिकाका १७ सहित जम्मा ३८ वटा वडा पर्छन् । जनकपुरधामबाहेक नगराइन नगरपालिकाका सबै नौवटा वडा, मुखियापट्टि मुसहरनिया गाउँपालिकाका सबै ६ वटा वडा, धनौजी गाउँपालिकाका सबै पाँचवटा वडा र विदेह नगरपालिकाको एउटा वडा यस क्षेत्रमा पर्छन् ।

गत स्थानीय तह चुनावको नतिजा हेर्ने हो भने यो क्षेत्रमा कांग्रेस बलियो देखिन्छ । दोस्रोमा एमाले छ । ३८ मध्ये आधा अर्थात् १९ वटा वडा एक्लै कांग्रेसले जितेको छ । दोस्रो स्थानमा एमालेले ११, जसपाले ४, लोसपाले ३ र नेकपा एकीकृत समाजवादीले १ वडामा जित निकालेको छ ।

गएको स्थानीय चुनावमा ३८ वटा वडाको वडाध्यक्ष पदमा पार्टीहरूले पाएको मत जोड्ने हो भने पहिलो स्थानमा कांग्रेस देखिन्छ । उसको २२ हजार ४ सय २९ मत छ । दोस्रोमा एमालेको १६ हजार १६ मत छ । जसपाले ८ हजार २ सय २४ र लोसपाले १ हजार १ सय ६३ मत प्राप्त गरेको छ । त्यस्तै, नेकपा एकीकृत समाजवादीले ३ हजार ७१३ र सबभन्दा कम नेकपा माओवादी केन्द्रले ६५६ मत प्राप्त गरेको निर्वाचन आयोगको तथ्यांक छ । कुल मत जोड्दा पाँचदलीय गठबन्धन बलियो देखिन्छ ।

लोसपा उम्मेदवार झाको जितका लागि कांग्रेसको मतको महत्त्व छ । यो चुनावलाई कांग्रेसका प्रभावशाली नेता विमलेन्द्र निधिले प्रतिष्ठाको विषय बनाएकाले अन्तर्घातको सम्भावना कम देखिन्छ । तर, स्थानीय तहभन्दा प्रतिनिधिसभाको चुनाव फरक हुन सक्ने भएकाले परिणाम पनि फरक आउन सक्ने सम्भावना पनि उत्तिकै छ ।

कांग्रेसबाट यो क्षेत्रको प्रदेशसभा सदस्य उम्मेदवार मधेस सरकारका पूर्वभौतिक पूर्वाधारमन्त्री रामसरोज यादव भन्छन्, ‘हाम्रो गठबन्धनको जित यस क्षेत्रमा सुनिश्चित छ । लोसपालाई मात्र होइन, हामीलाई पनि चुनाव जित्नुपर्ने रहेका कारण हामीबाट अन्तर्घात हुँदैन । हामी जित्छौँ नै, ढुक्क हुनुस् ।’

यो क्षेत्रमा ९६ हजारको हराहारीमा मतदाता छन् । त्यसमध्ये झण्डै २५ हजारको हराहारीमा वैश्य अर्थात् तेली, सुडी, कलवार, रौनियार सादुदायको मत छ । त्यसैगरी, मुस्लिम सामुदायको १८ हजार, ब्राह्मण समुदायको १७ हजार, यादवको १२ हजार मत रहेको बताइन्छ ।

यो निर्वाचन क्षेत्रमा जातीय समीकरणले चुनावलाई प्रभाव पार्ने गरेको देखिन्छ । यो क्षेत्रको शहरी क्षेत्रमा वैश्य सामुदायको वर्चस्व देखिन्छ । वैश्य समुदाय एकीकृत भएको खण्डमा सुडी समुदायकी जुली महतोलाई चुनावी अवस्था सहज हुन्छ । तर, वैश्य समुदायबाट थप दुई जना स्वतन्त्र उम्मेदवार उमेश साह र जनमत पार्टीका उम्मेदवार शम्भुनाथ साह तेली रहेकाले वैश्य समुदायको मत विभाजन हुने सम्भावना पनि छ ।

ब्राह्मण समुदायका अनिल झाले प्रदेशको १ बाट सुडी समुदायका परमेश्वर साह र २ मा यादव समुदायबाट कांग्रेसका रामसरोज यादवलाई उम्मेदवार बनाई जातीय समीकरण मिलाएका छन् । यस्तोमा उम्मेदवार झाको पनि अवस्था सहज देखिन्छ ।

महतोले पनि जातीय समीकरण मिलाएकी छिन् । प्रदेशको १ मा यादव समुदायबाट जसपाका जितेन्द्र यादव र २ मा भूमिहार समुदायबाट दिपेन्द्र ठाकुरलाई उम्मेदवार बनाएकी छिन् ।

यस्तोमा दोस्रो ठूलो संख्यामा रहेको मुस्लिम समुदायको मत निर्णायक हुन जान्छ । तर, प्रतिनिधिसभामा मुस्लिम समुदायबाट उम्मेदवार छैनन् । प्रदेशसभाको १ बाट नेपाल संघीय समाजवादी पार्टीका उम्मेदवार अजिज राइन छन् भने २ बाट तराई मधेस लोकतान्त्रिक पार्टी तमलोपाका उम्मेदवार असगर अली छन् । यी दुवै जनाको समर्थनले पनि प्रतिनिधिसभाको चुनावी समीकरण फेरबदल हुने सम्भावना प्रवल छ ।

धनुषा ४ मा पुरानै प्रतिस्पर्धी

धनुषा निर्वाचन क्षेत्र नं. ४ मा प्रतिनिधिसभा सदस्यका लागि फेरि पुरानै अनुहारबीच चुनावी प्रतिस्पर्धा हुँदैछ । २०७४ को निर्वाचनमा यो क्षेत्रमा कांग्रेसबाट उम्मेदवार रहेका पूर्वमन्त्री महेन्द्र यादव, एमालेबाट पूर्वमन्त्री रघुविर महासेठ र तत्कालीन संघीय समाजवादी फोरमबाट उम्मेदवारी दिएका महाजन यादवबीच प्रतिस्पर्धा भएको थियो । यो निर्वाचनमा पनि उनीहरूबीच नै प्रतिस्पर्धा हुँदैछ । फरक यति मात्रै हो कि २०७४ मा महाजन यादवको पार्टीको नाम परिवर्तन भई अहिले जसपा भएको छ ।

यो क्षेत्रमा एमाले र जसपाको चुनावी गठबन्धन भएको छैन । सत्तारुढ गठबन्धनबाट नेपाली कांग्रेसका सहमहामन्त्री तथा पूर्वमन्त्री महेन्द्र यादवले उम्मेदवारी दिएका छन् भने प्रदेशसभा १ मा टिकट नपाएपछि जसपा छोडेर कांग्रेसका प्रवेश गरेका शेषनारायण यादव र २ मा प्रदेशका उद्योग, पर्यटन तथा वनमन्त्री शत्रुधन महतो सत्तारुढ दल नेकपा एसबाट उम्मेदवार छन् ।

त्यसैगरी, यो क्षेत्रमा एमाले सचिव रघुविर महासेठसँगै प्रदेशसभा १ मा कांग्रेस छाडेका सन्तोष यादव र २ मा मिथिला नगरपालिकाका पूर्वमेयर हरिनारायण महतोलाई एमालेले उम्मेदवार बनाएको छ ।

जसपाबाट महाजन यादवसँगै प्रदेशसभा १ मा प्रदेशका मन्त्री ज्ञानेन्द्र यादव र (२) मा चन्देश्वर महतो उम्मेदवार छन् । एमाले नेता महासेठ यो क्षेत्रका निवर्तमान सांसद पनि हुन् । २०७४ सालको निर्वाचनमा महासेठ प्रतिनिधिसभा सदस्यमा २२ हजार ५३२ मत ल्याएर विजयी हुँदा महेन्द्र यादव र महाजन पराजित भएका थिए । त्यो निर्वाचनमा महेन्द्रले १९ हजार ९९१ र महाजनले १९ हजार ६६२ मत प्राप्त गरेका थिए ।

पहिलाको भन्दा अहिलेको दलीय गठबन्धन परिवर्तन भएकाले समीकरण पनि फरक देखिएको छ ।

गत स्थानीय चुनावका आधारमा मान्ने हो भने सत्तारुढ गठबन्धन दलका उम्मेदवार महेन्द्र यादवको अवस्था बलियो देखिएको छ । सो क्षेत्रमा पर्ने ५ वटा पालिकामध्ये ४ वटा पालिका मिथिला नगरपालिका, बटेश्वर गाउँपालिका, लक्ष्मीनिया गाउँपालिका र मिथिला विहारी नगरपालिका कांग्रेसले जितेको छ । एमालेले भने क्षिरेश्वरनाथ नगरपालिका मात्रै जितेको छ ।

क्षेत्र ४ मै जनकपुरधाम उपमहानगरपालिका ५ वटा वडा पर्छन् । सो क्षेत्रको पर्ने ४२ वडामा कांग्रेस र एमालेले पाएको मतलाई विश्लेषण गर्दा कांग्रेस करिब दुई–तीन हजार मतले मात्रै अगाडि देखिन्छ ।

स्थानीय तहमा सो क्षेत्रका ४२ वटै वडामा कांग्रेसले २६ हजार १५९ र एमालेले २४ हजार ३९४, जसपाले ८ हजार ३८८, एकीकृत समाजवादीले ८ हजार १६४, माओवादी केन्द्रले ४ हजार ४८५ र लोसपाले २ हजार २८४ मत पाएको थियो । कांग्रेस, समाजवादी, माओवादी र लोसपाको एक ठाउँमा राखेर विश्लेषण गर्दा सत्तारुढ गठबन्धनको मत ४० हजार ९९२ पुग्छ ।

एमाले र जसपाबीच गठबन्धन भए पनि यो क्षेत्रमा छुट्टाछुटै उम्मेदवार हुँदा सत्ता गठबन्धनलाई सहज हुने अनुमान छ । स्थानीय निर्वाचनको मत र सत्तारुढ गठबन्धनको साथ र सहयोगले आफ्नो जित सुनिश्चित रहेको उम्मेदवार यादवले बताए ।

यादवले आफ्नो जित सुनिश्चित रहेको दाबी गरे पनि त्यस क्षेत्रमा कांग्रेसका पूर्वजिल्ला उपसभापति सन्तोय यादवले चुनावको मुखमा पार्टी परिवर्तन गरी एमालेबाट प्रदेशसभामा उम्मेदवार बनेकाले कांग्रेसको मत विभाजन हुन सक्ने सम्भावना छ ।

एमाले उम्मेदवार महासेठ विगतमा आफूले यो क्षेत्रमा गरेको कामलाई मूल्यांकन गरेर जनताले फेरि एकपटक जिम्मेवारी दिने बताउँदै आएका छन् । सो क्षेत्रमा ठूलो संख्यामा कांग्रेसबाट नेता तथा कार्यकर्ताहरू एमालेमा प्रवेश गरेकाले पनि आफ्नो चुनावी यात्रालाई सहज बनाएको उनको भनाइ छ । स्थानीय तहको निर्वाचनमा पनि कांग्रेसभन्दा एमाले थोरै मतले मात्रै पछाडि रहेकोमा यो निर्वाचनमा अझ बढ्ने उनले बताए ।

स्थानीय चुनाव र प्रतिनिधिसभाको निर्वाचन फरकफरक रहेकाले यो निर्वाचनमा उस्तै प्रकृतिको मतदान नहुने जसपाका उम्मेदवार महाजन यादवको भनाइ छ । महासेठ र महेन्द्र यादव दुवै जना मन्त्री भइसकेको बताउँदै महाजन यादवले भने, ‘मन्त्री भए पनि उनीहरूले आफ्नो क्षेत्रमा विकास निर्माणका कामहरू गर्न सकेनन्, जनतासँग उनीहरू धेरै टाढा छन् । त्यस कारण यो निर्वाचन उनीहरूले भनेजस्तै सहज होइन । जसपाप्रति जनताको आकर्षण बढ्दै गएको छ ।’

प्रकाशित मिति: बुधबार, कात्तिक ३०, २०७९ १६:५५