यी क्षेत्र, जहाँ सत्ता गठबन्धनका दलहरूबीच नै हुँदैछ प्रतिस्पर्धा

A+ A A-

मंसिर ४ मा हुने प्रतिनिधिसभा र प्रदेशसभा चुनावमा सत्ता गठबन्धनले वाम-लोकतान्त्रिक गठबन्धन बनाएको छ । एमालेसहितको साना राजनीतिक दलहरूबीच पनि तालमेल भएको छ । एमालेले १५ वटा निर्वाचन क्षेत्रमा जसपा र राप्रपासँग चुनावी तालमेल गरेको छ भने केही क्षेत्रमा स्वतन्त्र उम्मेदवारलाई सघाएको छ ।

सत्ता गठबन्धनमा रहेका कांग्रेस, नेकपा माओवादी केन्द्र ,नेकपा एकीकृत समाजवादी, लोकतान्त्रिक समाजवादी पार्टी (लोसपा), नेपाल समाजवादी पार्टी (नेसपा) र राष्ट्रिय जनमोर्चाबीच अधिकांश क्षेत्रमा गठबन्धन भएको छ । सत्ता गठबन्धनमा रहेका दलहरूबीच अधिकांश क्षेत्रमा गठबन्धन भए पनि केही स्थानमा भने आपसमै प्रतिस्पर्धा गर्दैछन् ।कुनै क्षेत्रमा माओवादी र कांग्रेस, कुनै क्षेत्रमा नेसपा र लोसपा तथा माओवादी केन्द्र र एकीकृत समाजवादीबीच प्रतिस्पर्धा हुँदैछ ।

सर्लाही २ बाट प्रतिनिधिसभा सदस्यका लागि डा. बाबुराम भट्टराई नेतृत्वको नेपाल समाजवादी पार्टी (नेसपा) का महिन्द्रराय यादव र महन्थ ठाकुर नेतृत्वको लोकतान्त्रिक समाजवादी पार्टी (लोसपा) का राजेन्द्र महतोबीच प्रतिस्पर्धा हुँदैछ । दुवैले आफूलाई सत्ता गठबन्धनको आधिकारिक उम्मेदवार भएको दाबी गर्दै आएका छन् । गठबन्धनले भने यादव आफ्नो आधिकारिक उम्मेदवार भएको बताएको छ । यो क्षेत्रमा एमालेका राजनारायण साह उम्मेदवार छन् । चर्चा भने यादव र महतोको बढी छ ।

चर्चाको पहिलो कारण हो- सत्ता गठबन्धनकै दलका उम्मेदवारबीचको प्रतिस्पर्धा । दोस्रो- दुवै नेता चुनाव जितेर पटक पटक मन्त्री हुनु हो । धनुषा २ मा कांग्रेसका रामकृष्ण यादव र नेकपा एकीकृत समाजवादीका रामचन्द्र झाबीच प्रतिस्पर्धा हुँदैछ । सिट बाँडफाँट हुँदा यो क्षेत्र कांग्रेसलाई परे पनि एकीकृत समाजवादीले रामचन्द्र झालाई उम्मेदवार बनाएको छ । माओवादी केन्द्र र लोसपाको साथ भने कांग्रेसका यादवलाई छ । यो क्षेत्रमा एमालेले अघिल्लो पटक जितेका उमाशंकर अरगरियालाई उम्मेदवार बनाएको छ । अरगरियाले अघिल्लो पटक ३२ हजार ४४ मतका साथ जित हासिल गरेका थिए ।

यो पटक सत्ता गठबन्धनका कांग्रेस र नेकपा एससँगै एमालेबीच त्रिपक्षीय प्रतिस्पर्धा हुनेछ । कांग्रेस र नेकपा एसबीच यो निर्वाचन क्षेत्रमा नेकपा एसका उम्मेदवार रामचन्द्र झाले बताए । उनले भने, ‘यहाँ गठबन्धनमा कुरा नमिल्दा गठबन्धनभित्र नै मित्रवत् प्रतिस्पर्धा भइरहेको छ । प्रतिनिधिसभामा मात्र होइन, प्रदेशसभाका लागि पनि मित्रवत् प्रतिस्पर्धा भएको छ ।’

यस्तै, काठमाडौं १० मा माओवादी केन्द्रकी अन्जना विसंखे र कांग्रेसका राजेन्द्रकुमार केसीबीच प्रतिस्पर्धा भइरहेको छ । माओवादीको भागमा परेको प्रदेशसभामा पनि कांग्रेसले उम्मेदवार उठाएपछि माओवादीले प्रतिनिधिसभामा पनि उम्मेदवारी दर्ता गरेको हो । काठमाडौंका ९ वटा निर्वाचन क्षेत्रमा गठबन्धन भएको छ तर यहाँ भने गठबन्धनका उम्मेदवार नै आमनेसमाने छन् ।

२०७४ को चुनावमा यो क्षेत्रबाट कांग्रेसका राजेन्द्र केसीले २४ हजार १ सय ९० मत ल्याएका थिए । वाम गठबन्धनका तर्फबाट माओवादी केन्द्रका हितमान शाक्यले २१ हजार ९ सय ७ मत ल्याएका थिए । वाम गठबन्धन हुँदा पनि कांग्रेसलाई पराजित गर्न सकेको थिएन । यो पटक माओवादी र एमाले कांग्रेससँग एक्लाएक्लै प्रतिस्पर्धामा छन् ।

प्रदेशसभामा पनि सत्ता गठबन्धनबीच प्रतिस्पर्धा !

प्रदेशसभामा पनि सत्ता गठबन्धनका दलहरूबीच मित्रवत् प्रतिस्पर्धामा छन् । धनुषा २ को 'क' मा नेकपा एसका रामनारायण यादव र 'ख' प्रदेशमा शैलेन्द्रकुमार यादव उम्मेदवार छन् । यिनै दुई क्षेत्रमा गठबन्धनका तर्फबाट 'क' मा लोसपाका सञ्जयकुमार साह र 'ख' मा माओवादी केन्द्रका श्यामकुमार यादव उम्मेदवार छन् ।

सिरहा ३ को 'ख' मा पनि सत्ता गठबन्धनबीच नै प्रतिस्पर्धा भइरहेको छ । जसमा कांग्रेसका प्रकाश यादव र एकीकृत समाजवादीका प्रमोद यादव रहेका छन् । महोत्तरी २ को 'क' मा नेकपा एसका मञ्जु यादव र लोकतान्त्रिक समाजवादीका जयनुल राइनबीच प्रतिस्पर्धा भइरहेको छ । सर्लाही १ को 'क' मा पनि माओवादीका रामचन्द्र सिंह कुसवाह र लोसपाका उपेन्द्र महतोबीच प्रतिस्पर्धा भइरहेको छ । बारा १ को 'ख' मा पनि गठबन्धनबीच तालमेल हुन सकेन र मित्रवत् प्रतिस्पर्धामा छन् । कांग्रेस नागेन्द्रप्रसाद कानु र नेकपा एकीकृत समाजवादीका बतहु यादवबीच प्रतिस्पर्धा हुँदैछ ।

पर्सा ३ को 'ख' मा कांग्रेसका जनार्दन सिंह क्षेत्री र नेकपा एसका प्रल्हाद गिरीबीच प्रतिस्पर्धा भइरहेको छ । काठमाडौं ३ को 'ख' मा कांग्रेसका विमल ठकुरी र माओवादी केन्द्रका महेश्वर फुयाँलबीच प्रतिस्पर्धा भइरहेको छ । काठमाडौं ५ को 'ख' मा कांग्रेसका श्यामबहादुर खडका र नेकपा एसका बालकृष्ण श्रेष्ठबीच प्रतिस्पर्धा भइरहेको छ । काठमाडौं ६ को 'ख' मा माओवादीका प्रकाश फुयाँल र कांग्रेसका विश्वभक्त तिमिल्सेनाबीच प्रतिस्पर्धा भइरहेको छ । १० को 'क' मा पनि माओवादी केन्द्रका दिलिप महर्जन र कांग्रेस पुकार महर्जनबीच प्रतिस्पर्धा भइरहेको छ ।

स्याङजा 'क' मा पनि गठबन्धनमा तालमेल हुन सकेन । जसमा कांग्रेसका भोजराज अर्याल र नेकपा एसका रामचन्द्र भट्टराईबीच प्रतिस्पर्धा हुँदैछ । नवलपरासी (बर्दघाट सुस्ता पश्चिम) १ मा सत्ता गठबन्धनबाट उद्योगपति विनोद चौधरी उम्मेदवार छन् । तर, यही क्षेत्रको प्रदेशसभा (ख) मा भने गठबन्धनका नेकपा माओवादी केन्द्र र कांग्रेसले उम्मेदवार उठाएका छन् । प्रदेशसभा 'ख' माओवादीको भागमा परेको भए पनि कांग्रेसले आफ्नो उम्मेदवार उठाएको छ ।

प्रदेशसभा 'ख' मा कांग्रेसका देवकरण कलवार (सन्तु) उम्मेदवार छन् भने माओवादीको रामानन्द यादव उम्मेदवार छन् । अब दुवै नेताबीच मित्रवत् प्रतिस्पर्धा हुनेछ । कपिलवस्तु १ को 'ख' मा कांग्रेसका सहसराम यादव र नेकपा एसका फजुर खानबीच मित्रवत् प्रतिस्पर्धा हुँदैछ ।

त्यस्तै, गठबन्धनमा कुरा नमिल्दा बाँके २ को 'क' मा कांग्रेसका राजकुमार बर्मा, नेकपा एसका समसद्दिन सिद्दिकी चुनावी मैदानमा प्रतिस्पर्धा गरिरहेका छन् । यसै क्षेत्रको 'ख' मा पनि गठबन्धनबीच कुरा मिल्न नसक्दा कांग्रेसका सुरेन्द्र हमाल र माओवादी केन्द्रका अक्कलबहादुर बमबीच प्रतिस्पर्धा हुँदैछ । गठबन्धनमा कुरा नमिल्नेमा कर्णाली प्रदेशसभा पनि अछुतो रहन सकेन । गठबन्धनमै हानथाप हुँदा केही क्षेत्रका लागि सत्ता गठबन्धनमा मित्रवत् प्रतिस्पर्धा हुँदैछ ।

हुम्लामा प्रदेशसभा 'क' मा गठबन्धनका तर्फबाट माओवादीका रनसिंह परियार उम्मेदवार छन् । परियार उम्मेदवार रहेको क्षेत्रमा नै नेकपा एस हस्तबहादुर शाही उम्मेदवार छन् । जबकि हुम्लाको 'क' माओवादी र 'ख' कांग्रेसले पाउने गरी गठबन्धनमा सहमति भएको थियो । 'ख' मा भने कांग्रेसका जीवन शाही मात्र गठबन्धनबाट उम्मेदवार छन् ।

सुर्खेत २ को 'क' र 'ख' मा कांग्रेस, माओवादी केन्द्र र नेकपा (एस) का उम्मेदवारबीच प्रतिस्पर्धा हुँदैछ । गठबन्धनमा भएको सहमतिअनुसार २ 'क' मा कांग्रेसका कालीप्रसाद शाक्य र 'ख' मा माओवादीका विन्दमान विष्ट उम्मेदवार छन् । तर, भागवण्डा चित्त नबुझेपछि नेकपा एसले दुवै क्षेत्रमा उम्मेदवार उठाएको छ । जसमा 'क' मा शिवप्रसाद उपाध्याय र 'ख' मा मोहनसिंह बडुवाल उम्मेदवार बनेका छन् । यहाँ मित्रवत् प्रतिस्पर्धामा हुँदैछ ।

प्रदेश सभा 'ख' मा कांग्रेसका हिक्मतबहादुर विष्ट र नेकपा (एस) बाट विश्वराज बमबीच प्रतिस्पर्धा भइरहेको छ ।बाजुरामा पनि प्रदेशसभा 'क' मा नेकपा माओवादी केन्द्रका कर्णबहादुर विश्वकर्मा र नेकपा एसका नरेशकुमार शाहीबीच प्रतिस्पर्धा हुँदैछ । बाजुराजस्तै कञ्चनपुरका प्रदेशसभाका २ निर्वाचन क्षेत्रमा पनि नेकपा एसले गठबन्धनसँग प्रतिस्पर्धा गर्दैछ । कञ्चनपुर २ को 'ख' मा गठबन्धनका बहादुरसिंह थापा र नेकपा एसका लालबहादुर खड्का प्रतिस्पर्धामा छन् । कञ्चनपुर ३ को 'क' मा माओवादी केन्द्रका टेकेन्द्र भट्ट र नेकपा एसका प्रकाश रावल प्रतिस्पर्धामा छन् ।

गठबन्धनमा एक-दुई ठाउँमा माओवादी र कांग्रेस आमनेसामने भए पनि अधिकांश स्थानमा नेकपा एसले गठबन्धनविरुद्ध बागी उम्मेदवार उठाएका छन् । नेकपा एसका केन्द्रीय सदस्य तथा हुम्ला प्रदेशसभा 'क' का उम्मेदवार हस्त शाही माओवादी टुक्रा-टुक्रा हुँदा पनि उसले आफूलाई पहिलेकै जस्तो सोचिरहेको आरोप लगाउँछन् । 'माओवादी केन्द्रलाई आफ्नो अवस्था अहिले पनि थाहा छैन । त्यसैले हामीले उम्मेदवारी दिएका हौँ,' शाहीले शिलापत्रसँग भने ।

प्रकाशित मिति: बुधबार, कात्तिक ३०, २०७९ १५:५६