प्रथम अन्तर्राष्ट्रिय विज्ञान प्रदर्शनीमा सेन्ट मेरिज स्कुल प्रथम

A+ A A-

विद्यालयस्तरीय प्रथम अन्तर्राष्ट्रिय विज्ञान प्रदर्शनीमा सेन्ट मेरिज स्कुल जावलाखेलले प्रथम स्थान हासिल गरेको छ ।

नेसनल साइन्स फाउन्डेसन, भारत र डीएभी सुशील केडिया विश्व भारती विद्यालय ललितपुर, नेपालको संयुक्तमा आयोजना भएको उक्त सम्मेलनमा नेपाल र भारतका उत्कृष्ट एघार विद्यालयको सहभागिता थियो ।

‘विश्व दिगो विकास लागि नवीनतम उद्योग र पूर्वाधार’ नारासहित आयोजना भएको सो कार्यक्रममा केन्द्रीय विद्यालय काठमाडौं र द्यान गंगा विद्यालय, पुने भारतले क्रमशः दोस्रो र तेस्रो स्थान हासिल गरेका छन् ।

सोही प्रदर्शनीको अर्को विधामा द्यान गंगा विद्यालय, पुने भारत र डीएभी सुशील केडिया विश्व भारती विद्यालय विजेता बनेका छन् । उक्त कार्यक्रमको निर्णायकको भूमिकामा मनोज कुमार, एसोसिएट प्रोफेसर त्रिचन्द्र क्याम्पस, त्रि.वि र इन्जिनियर अजय श्रेष्ठ, एड्भान्सन्ड इन्जिनियरिङ एण्ड म्यानेजमेन्ट त्रिवि रहेका थिए ।

सो अवसरमा डीएभी विद्यालय नेपालकी प्राचार्य डा. भुवनेश्वरी राव र द्यान गंगा विद्यालय पुने भारतकी प्राचार्य श्रीमती रेनुका दत्तलाई ‘संयुक्त राष्ट्रसंघीय दिगो विकास अवार्ड २०२२’ बाट सम्मानित गरियो ।

प्रदर्शनीमा टर्निङ प्वाइन्ट स्कुल पट्ना भारतका डाइरेक्टर उमेश सिंहको समेत उपस्थिति थियो । साथै डीएभी विद्यालयको मयुर डान्स क्लबका विद्यार्थीहरूले आकर्षक नृत्य प्रदर्शन गरेका थिए ।

प्रदर्शनी कार्यक्रमलाई सम्बोधन गर्दै अन्तर्राष्ट्रिय कन्भेनर तथा डीएभी विद्यालयका अध्यक्ष अनिल केडियाले भौतिक विज्ञानको विकासका लागि आध्यात्मिक विज्ञानको महत्त्वपूर्ण भूमिका रहेको विचार व्यक्त गरे ।

कार्यक्रममा राष्ट्रिय कन्भेनर सुनील कुमारले प्रथम विद्यालयस्तरीय अन्तर्राष्ट्रिय विज्ञान प्रदर्शनी विश्व विज्ञान सम्मेलनको एक अंश रहेको बताउँदै डीएभी विद्यालयसँगको सहकार्यले दुई छिमेकीबीचका विद्यार्थीहरूमाझ ज्ञान, प्रविधि र संस्कृति आदान—प्रदान गर्न सफल भएको राय व्यक्त गरे ।

कार्यक्रमका प्रमुख अतिथि प्रा.डा. महेन्द्र महर्जन (त्रिभुवन विश्वविद्यालय) ले डीएभी विद्यालयलाई एक स्रोत संस्थाको रूपमा व्यख्या गरेका छन् । डीएभी विद्यालयकी प्राचार्य डा. भुवनेश्वरी रावले विज्ञान र प्रविधिको क्षेत्रमा संयुक्त राष्ट्र संघको सन्देश र भूमिकामाथि चर्चा गर्दै सहभागी विद्यार्थीहरूद्वारा निर्मित नवीनतम मोडलहरूको प्रशंसा गरिन् ।

प्रदर्शनीमा सहभागीहरूले फलाम र स्टिल उद्योगका लागि आवश्यक पर्ने पानी भण्डारणको मोडेल, वर्षा, बाढी र हावाहुरीको पूर्वसंकेत दिने विभिन्न मोडेललगायत, स्र्माट सीटी, सामुन्द्रिक फोहोर व्यवस्थापन, बहुउद्देश्य ल्याण्ड रोभर र सोलारबाट सञ्चालनमा ल्याउन सकिने विभिन्न ल्याम्पहरूका मोडेलहरू प्रदर्शन गरेका थिए । यी सम्पूर्ण मोडेलहरू विद्यार्थीहरूले दुई घण्टाको अवधिभित्र सिर्जना गरेका हुन् ।

प्रकाशित मिति: बुधबार, कात्तिक ३०, २०७९ १३:४०