कैलाली २: झपटले ह्याट्रिक गर्लान् कि भगतले दोस्रो जित निकाल्लान् ?

A+ A A-

कैलाली २ मा यो पटक त्रिपक्षीय भिडन्त हुने आकलन गरिएको छ । सत्ता गठबन्धनबाट माओवादी केन्द्रका भगत बडूवाल, एमालेका झपट रावल र नागरिक उन्मुक्तिका अरुण चौधरी उम्मेदवार छन् ।

२०४८, २०५१ र २०५६ सालको निर्वाचन जितेर कांग्रेसले ह्याट्रिक गरेको कैलाली २ मा २०७० र २०७४ को निर्वाचन भने एमालेले जितेको थियो । यो क्षेत्रमा कांग्रेसले पार्टीगत मात्रै ह्याट्रिक गरेन । उम्मेदवारका रूपमा रामजनम चौधरीले लगातार चुनाव जितेर ह्याट्रिक गरेका थिए ।

ह्याट्रिकको दाउमा एमाले

कांग्रेसले ह्याट्रिक गरेको क्षेत्रमा अहिले एमाले ह्याट्रिक गर्ने दाउमा छ । ‘मैले पाँच वर्षसम्म यहाँ विकासका थुप्रै काम गरेको छु । अझ धेरै काम गर्न बाँकी छ । त्यसका लागि जनताले मलाई पुनः निर्वाचित गराउनु हुनेछ भन्नेमा पूर्ण विश्वस्त छु’, एमाले उम्मेदवार रावलले भने, ‘राष्ट्र र राष्ट्रियताका लागि देशमा एमालेको सरकार आवश्यक छ भन्ने सबै नेपालीलाई थाहा छ । त्यसैले पनि हामीलाई विजयी गराउनु हुनेछ ।’

क्षेत्र नम्बर २ मा बर्दगोरिया गाउँपालिका र लम्की चुहा नगरपालिकाको पूरै क्षेत्र पर्दछ । यो क्षेत्रमा मोहन्याल गाउँपालिकाको वडा नम्बर-५ बाहेकका सबै वडा र जानकी गाउँपालिकाका वडा नम्बर २, ५, ८ र ९ पर्छन् । स्थानीय तह निर्वाचनको मतपरिणामअनुसार लम्की चुहाको प्रमुखमा कांग्रेस र उपप्रमुखमा एमाले विजयी भएको छ । बर्दगोरियाको प्रमुखमा एमाले र उपप्रमुखमा माओवादी विजयी भएका छन् ।

यहाँ पर्ने जानकीका चार वडामध्ये तीनवटामा एमाले विजयी भएको छ । त्यस्तै मोहन्याल गाउँपालिकाको ६ वडामध्ये तीनवटामा कांग्रेस, २ वटामा माओवादी केन्द्र र एउटामा एमाले विजयी भएको छ । यहाँ दलका वडाध्यक्षले पाएको मतअनुसार एक्लाएक्लैमा एमाले अगाडि छ । एमालेले १७ हजार ८३४ मत पाएको छ । कांग्रेस १३ हजार ८२० मतसहित दोस्रो स्थानमा छ । माओवादीले ८ हजार ७२४ मत पाएको छ । त्यस्तै नागरिक उन्मुक्ति पार्टीले ५ हजार २४३, राप्रपाले २ हजार ४०७ र नेकपा एकीकृत समाजवादीले २ हजार ३०६ मत पाएको छ ।

दोस्रो जित निकाल्ने दाउमा भगत

मंसिर ४ को निर्वाचनमा सत्ता गठबन्धनको तर्फबाट साझा उम्मेदवार बनेका माओवादीका भगत बडूवाल यसअघि पनि निर्वाचित सांसद हुन् । उनी २०६४ सालको पहिलो संविधानसभामा निर्वाचित भएका थिए । पहिलो जितको १५ वर्ष पछि उनी दोस्रो जितको खोजीमा छन् । यसपटक उनको प्रतिस्पर्धा अघिल्लो पटक चुनाव जितेका विजेता झपट रावल र नागरिक उन्मुक्तिका अरुण चौधरीसँग हुँदैछ ।

बडूवाललाई हराएर रावल जितको ह्याट्रिक गर्ने दाउमा छन् । बडूवाल भने एमालेको जित शृङ्खलामा ब्रेक लगाएर २०६४ कै नतिजा दोहोर्‍याउने दाउमा छन् । ‘अघिल्लो पटक यहाँबाट जितेर गएपछि पनि केही गर्न नसकेको आरोप छ । यसपटक फेरि उहाँलाई जिताउने मनसायमा यहाँका नागरिकहरू छैनन्’, बडूवालले भने, ‘गठबन्धनका उम्मेदवारलाई जनताले भारी मतले विजयी बनाउनुहुनेछ ।’ उम्मेदवार बडुवालले अघिल्लो पटक जितेका सांसदले केही गर्न नसकेको भन्दै यसपटक आफूलाई जनताले जिताउने दाबी गरे ।

नयाँ रेकर्ड बनाउने दाउमा नागरिक उन्मुक्ति

नागरिक उन्मुक्ति पार्टीका उम्मेदवार अरुण चौधरीले पनि कैलाली २ मा आफ्नो जित निश्चित रहेको दाबी गरेका छन् । कांग्रेसमा छँदा महासमिति सदस्य रहेका चौधरी अघिल्लो पटक कांग्रेसबाट प्रदेशसभा र त्यसअघि मधेसी जनअधिकार फोरम नेपाल लोकतान्त्रिकबाट लम्की चुहाको मेयर उम्मेदवार बनेका थिए । उनी दुवै पटक झिनो मतान्तरले पराजित भएका थिए ।

२०७४ सालमा लम्की चुहाको मेयरमा एमालेका महादेव बजगाईं ७ हजार १८८ मत ल्याएर विजयी हुँदा फोरम लोकतान्त्रिकबाट निर्वाचनमा होमिएका चौधरीले ६ हजार २२२ मत पाएका थिए । फोरम लोकतान्त्रिक र कांग्रेसको एकतापछि चौधरी कांग्रेसबाट कैलाली २ को ‘ख’ मा उम्मेदवार बनेका थिए ।

एमाले र माओवादीको वाम गठबन्धनसँग उनी ८४४ मतले पराजित भए । अघिल्लो दुई पटक आफू एक हजार मत भन्दा कमले पराजित भएकाले यसपटक आफ्नो जित सुनिश्चित भएको चौधरीको दाबी छ । ‘यसअघि प्राविधिक कारणले म झिनो मतले हारेको थिएँ । तर, यसपटक जित पक्का हो’, उनले भने, ‘नागरिकहरूले अहिले नागरिक उन्मुक्तिलाई विश्वास गरिरहनुभएको छ ।’

यी पनि पढ्नुस् :

रेशमले फरार रहँदै चुनाव जितेकाे कैलाली–१ मा रञ्जिताले साख जाेगाउलिन् ?

कैलाली ५: पन्त र रानालाई स्वतन्त्र उम्मेदवार ओझा कति भारी ?

प्रकाशित मिति: बुधबार, कात्तिक ३०, २०७९ ११:२७