कैलाली ५: पन्त र रानालाई स्वतन्त्र उम्मेदवार ओझा कति भारी ?

A+ A A-

कैलालीको निर्वाचन क्षेत्र नम्बर ५ मा कसले बाजी मार्ला भनेर चासो चौतर्फी छ । अघिल्लो निर्वाचनमा कांग्रेस नेतृ डा. आरजु राणा देउवालाई हराउँदै एमालेका नारदमुनि रानाले जितेका थिए ।

यो क्षेत्रमा आरजु पछि हटे पनि रानालाई जित निकाल्न मुस्किल देखिएको छ । कैलाली क्षेत्र नम्बर ५ मा सत्ता गठबन्धन, एमाले र स्वतन्त्र उम्मेदवारबीच कडा प्रतिस्पर्धा हुने देखिएको छ । चुनाव नजिकिएसँगै क्षेत्र नम्बर ५ मा कसले बाजी मार्ला त भनेर चर्चा सुरु भएको छ ।

कैलाली ५ मा सत्ता गठबन्धन र विपक्षी एमालेसहित दलका आधिकारिक उम्मेदवारलाई स्वतन्त्र उम्मेदवारले कडा चुनौती दिएका छन् । यो क्षेत्रको प्रतिनिधिसभा र प्रदेशसभामा दलका आधिकारिक उम्मेदवारको भन्दा स्वतन्त्र उम्मेदवारको चर्चा बढी हुन थालेको छ ।

रानाका लागि स्वतन्त्र उम्मेदवार पुष्करनाथ ओझा भारी देखिएका छन् । गठबन्धनको तर्फबाट २०७४ को प्रदेशसभामा विजयी भएका डिल्लीराज पन्त उम्मेदवार छन् । एमालेका राना र गठबन्धनका तर्फबाट पन्त चुनावी मैदानमा छन् ।

२०७० सालमा प्रधानमन्त्री शेरबहादुर देउवाले तत्कालीन कैलाली ६ छोडेपछि भएको उपनिर्वाचनमा कांग्रेसबाट पुष्करनाथ ओझा विजयी भएका थिए । ओझालाई यो क्षेत्रमा राम्रो पकड भएका नेता मानिन्छ छ । अघिल्लो निर्वाचनमा कांग्रेस नेतृ आरजु राणालाई हराउन भूमिका खेलेको भन्दै कांग्रेसले ओझालाई कारबाही गरेको थियो । कांग्रेसले कारबाही गरेका ओझा स्वतन्त्र उम्मेदवारका रूपमा चुनावी मैदानमा होमिएका छन् ।

प्रदेशसभा ‘ख’ बाट स्वतन्त्र उम्मेदवारी दिएका कांग्रेसका युवा नेता क्षितिज भण्डारी सत्ता गठबन्धन र एमालेका उम्मेदवारका लागि भारी देखिएका छन् । यो क्षेत्रमा कांग्रेसबाट प्रकाश देउवा, एमालेबाट दुर्गा जोशी, नागरिक उन्मुक्ति पार्टीबाट गोठु चौधरी, राष्ट्रिय प्रजातन्त्र पार्टीबाट शिवराज भण्डारी, कांग्रेस (बीपी) बाट दीपकराज खैर, नेपाल मजदुर किसान पार्टीबाट रामबहादुर दर्लामी मगर, संघीय लोकतान्त्रिक मञ्चबाट कार्तिक लुहार र स्वतन्त्रमा क्षितिज भण्डारीले प्रतिस्पर्धा गरिरहेका छन् ।

प्रतिनिधिसभातर्फ यस क्षेत्रमा धनगढी उपमहानगरपालिकाका पूरै १९ वडा र कैलारी गाउँपालिका-६ र ९ वडा समेटिएको छ । स्थानीय निर्वाचनमा वडाध्यक्षहरूले पाएका मतलाई आधार मान्ने हो भने कांग्रेस, माओवादी केन्द्र र नेकपा एकीकृत समाजवादीको गरी ३२ हजार ६१९ मत छ ।

एमाले एक्लैले यो क्षेत्रमा १७ हजार ४२० मत ल्याएको छ । अघिल्लोपटकको निर्वाचनमा राना २७ हजार २०२ मतसहित विजयी हुँदा राणाले २२ हजार ३२२ मत पाएकी थिइन् । निर्वाचनमा अन्तर्घात गरेको भन्दै पुष्करनाथलाई कांग्रेसले कारबाही गरेको थियो ।

अहिले प्रतिनिधिसभातर्फको गठबन्धनको उम्मेदवार बनेका पन्त र स्वतन्त्र उम्मेदवार ओझाबीचको प्रतिस्पर्धाले समेत एमाले उम्मेदवार रानालाई सहज हुने देखिएको छैन । वैशाख ३० मा भएको स्थानीय तहको निर्वाचनमा पनि उपप्रमुखमा गठबन्धनका उम्मेदवार शान्ति अधिकारी र स्वतन्त्र उम्मेदवारी दिएका प्रभाकर भण्डारीका कारण एमाले उम्मेदवार कन्दकला राना विजयी भएकी थिइन् ।

धनगढी उपमहानगरपालिकाको प्रमुख र उपप्रमुखमै गठबन्धनको उम्मेदवार पराजित भएजस्तै अहिले पनि प्रतिनिधिसभामा गठबन्धनको उम्मेदवारलाई सहज हुनुपर्ने हो । तर, स्वतन्त्र उम्मेदवार ओझाका कारण गठबन्धनका उम्मेदवार पन्तलाई निकै सकस छ । गठबन्धन हुँदा पनि चुनाव जित्न नसकिने भएपछि आरजु ब्याक भएको विश्लेषण भइरहेको छ ।

पन्तले २०७४ सालमा लडेको कैलाली ५ को 'ख' मा आरजुले आफ्ना स्वकीय सचिवसमेत रहेका भतिजा प्रकाश देउवालाई उम्मेदवार बनाएपछि कांग्रेसकै कार्यकर्ता रुष्ट छन् । कांग्रेसभित्रको किचलो र पुराना कांग्रेस नेताको स्वतन्त्र उम्मेदवारीले रानालाई फाइदा हुनेमा एमाले ढुक्क छ । अहिले विभिन्न दल तथा स्वतन्त्र उठेका उम्मेदवारहरू आफूले नै जित्ने दाबी गरिरहेका छन् ।

प्रकाशित मिति: बिहीबार, कात्तिक १७, २०७९ १६:३४