चुनावी प्रचारमा म्यासेज र फोन गर्न उम्मेदवारले कसरी पाउँछन् मतदाताको नम्बर ?

चुनावी प्रचारमा म्यासेज र फोन गर्न उम्मेदवारले कसरी पाउँछन् मतदाताको नम्बर ?

A+ A A-

ललितपुरका सुजन तिमल्सिनालाई २७ कात्तिक रातको ११:३० बजे ९८६००१४७८ बाट फोन आयो । त्यतिबेला उनले फोन रिसिभ गर्न भ्याएनन् ।

उनका भाइलाई पनि त्यही नम्बरबाट फोन आएको रहेछ । दाजुभाइलाई नै एकै नम्बरबाट फोन आउँदा कोही चिनेजानेको मान्छेलाई समस्या पर्‍यो कि भनेर कल ब्याक गर्दा कोही बोलेन ।

‘पछि थाहा पाए, त्यो त ललितपुर क्षेत्र नम्बर १ का गठबन्धनका उम्मेदवार उदयशमशेर राणाको चुनावी प्रसारको भ्वाइस रेकर्ड सुनाउने फोन पो रहेछ,’ उनले भने ।

315207752_444302677881383_5134998089425129746_n1668516385.jpg

पछि राणाले निर्वाचन प्रचारप्रसारका क्रममा आफ्नो आवाजको भ्वाइस कल र भ्वाइस म्यासेज प्राविधिक कारणले राति बज्न पुगेको भन्दै सामाजिक सञ्जाल फेसबुकमार्फत माफी नै मागे ।

त्यस्तै, चितवन रत्ननगरका विष्णु सापकोटालाई नयाँ नम्बरबाट फोन आयो । कसको रहेछ भनेर उठाउँदा चितवन क्षेत्र नम्बर ३ का राप्रपाका उम्मेदवार विक्रम पाण्डेले भ्वाइस रेकर्डमार्फत भोट मागेका थिए ।

यी त भए चुनावी उदाहरण । सामान्य समयमा पनि विभिन्न कम्पनीजस्तै सवारी बिक्रेता, इन्टरनेट प्रदायक, विभिन्न एक्स्पो, कर्पोरेट हाउसहरूबाट पनि विभिन्न समयमा म्यासेज आइरहेको हुन्छ ।

यसरी फोन र म्यासेज आउनु भनेको उपभोक्ताको गोपनीयताको अधिकार कुण्ठित भएको उपभोक्ता अधिकारकर्मी माधव तिमल्सिना बताउँछन् । सेवाग्राहीको नम्बर सेवाप्रदायकले दिएको हो भने बैमानी भएको उनको तर्क छ ।

‘कुनै सञ्जाल, इष्टमित्रलगायतबाट नम्बर पाएको भए त केही भन्न सकिएन तर सेवाप्रदायकले दिएको हो भने उसले गोपनीयताको अधिकार कुण्ठित गरिरहेको छ । यस्तो गर्न पाइँदैन,’ उनले भने ।

आफूहरूले कुनै राजनीतिक दललाई उपभोक्ताको नम्बर नदिएको र दिन पनि नमिल्ने नेपाल टेलिकमका सह–प्रवक्ता रञ्जित लोहियाले बताए ।

‘हामीबाट त्यस्तो काम हुँदै हुँदैन । बरु हामीले एसएमएस बनाउन पोर्टल बनाएर भने दिन्छौँ । उहाँहरूले आफूसँग भएको नम्बर राखेर पठाउनुहुन्छ,’ उनले शिलापत्रसँग भने ।

टेलिकमले नदिएको भए उम्मेदवार र कर्पोरेट हाउसले कसरी पाउँछन् त उपभोक्ताको मोबाइल नम्बर ?

यसरी नम्बर सार्वजनिक हुनुमा ग्राहक स्वयम्‌ कारण रहेको आईटीविज्ञ राजीव सुब्बा बताउँछन् । उनी भन्छन्, 'पहिलो कुरा त राजनीतिक दलले स्थानीयस्तरमै नम्बर संकलन गरेको हुन सक्छ । टेलिकमले दिन मिल्दैन । मलाई टेलिकमले बदमासी गरेको जस्तो लाग्दैन,’ उनले भने ।

त्यस्तै, कर्पोरेट हाउसहरूले पनि ग्राहक स्वयम्‌ले नै दिएको नम्बरमा एसएमएस गर्ने उनी बताउँछन् । ‘हामी विभिन्न कार्यक्रममा जाँदा नाम/नम्बर दाखिला गर्छौं, इभेन्ट कम्पनीले गरेको कार्यक्रम छ भने त सबै सम्पर्क उनीहरूले राखिरहेका हुन्छन्, फ्रि वाइफाइ चलाउँदा कतिपय कम्पनीले नम्बर माग्छन्, सपिङ कम्प्लेक्स, सवारीसाधनको शोरुमलगायतका ठाउँमा पनि नम्बर छोड्छौँ । त्यस्ता नम्बरहरूमा कर्पोरेट हाउसहरूले म्यासेज गर्न सक्छन्,’ उनले भने ।

प्रकाशित मिति: बुधबार, कात्तिक ३०, २०७९ ०८:४२