वर्षमान र जनार्दनका दुःख : प्रचण्डको उत्तराधिकारी हुँ भन्छन्, चुनाव प्रचारमा जिल्ला छाड्‌ने हिम्मत गर्दैनन्

वर्षमान र जनार्दनका दुःख : प्रचण्डको उत्तराधिकारी हुँ भन्छन्, चुनाव प्रचारमा जिल्ला छाड्‌ने हिम्मत गर्दैनन्

A+ A A-

सुर्खेतका माओवादी नेता र कार्यकर्ताले १ मंसिरमा नेता जनार्दन शर्मालाई वीरेन्द्रनगरको सभाका लागि निम्ता गरिरहेका छन् । उनीहरूले शर्मालाई बोलाएर सम्बोधन गराउने प्रयास गरेको लामै समय भयो । तर, अहिलेसम्म शर्माले टुंगो दिएका छैनन् । त्यही दिन शर्माले रुकुम पश्चिमको चौरजहारीमा कार्यक्रम राखेका छन् ।

माओवादी नेताहरूको भनाइमा १ मंसिरसम्म शर्माले रुकुम पश्चिम जिल्लाभित्रकै कार्यक्रममा व्यस्त हुने देखिएको छ । माओवादीको कर्णाली प्रदेश अध्यक्ष विमला केसीका अनुसार १ मंसिरसम्म शर्मा जिल्लाबाहिर जाने क्रममा नभएको बताइन् । शिलापत्रसँग कुराकानी गर्दै केसीले भनिन्, ‘साथीहरूले सुर्खेतमा बोलाइरहनुभएको छ, १ मंसिरसम्म जिल्लाकै कार्यक्रममा व्यस्त हुने कार्यसूची देखिएको छ, हामी सुुर्खेत ल्याउने प्रयासमा छौँ ।’

प्रदेश अध्यक्ष केसी रुकुम पश्चिमकी नेतृ मात्र होइन, उपमहासचिव शर्माकी आफन्त पनि हुन् । बरु उनी कर्णाली प्रदेशभरि निस्किरहेकी छन् । भोलि दैलेखमा आयोजना हुने गठबन्धनको चुनावी सभामा पनि नेतृ केसी नै पुग्दैछिन् । आफ्नै प्रदेशअन्तर्गतको दैलेखमा हुने चुनावी सभामा समेत शर्मा भने नजाने भएका छन् । केसीले शिलापत्रलाई दिएको जानकारीअनुसार शर्मा जिल्लाबाहिर जाने कार्यसूची नै छैन ।

माओवादीको प्रभाव क्षेत्र रुकुम पश्चिममा शर्माको उम्मेदवारीलाई चुनौती दिने अर्को उम्मेदवार छैन । अघिल्लो चुनावमा शर्मालाई चुनौती दिएका कांग्रेसका उम्मेदवार गोपालजंग शाह अहिले सत्ता गठबन्धनका कारण शर्माकै साथमा छन् । २०७४ मा शर्माले ३४ हजार ४ सय ४ मत ल्याउँदा उनका प्रतिस्पर्धी शाहले १५ हजार ६ सय ५९ मत ल्याएका थिए ।

त्यतिबेलाका प्रतिस्पर्धी शाहलाई साथमै लिएर शर्मा जिल्ला दौडमा निस्केका छन् । अर्थात्, शर्मालाई चुनौती दिने नेता नै साथमा भएपछि उनी थप बलियो उम्मेदवार भएका छन् ।

एमालेका उम्मेदवार नन्दराम देवकोटाले अहिले शर्मालाई चुनौती दिइरहेका छन् । यद्यपि, एमाले पश्चिम रुकुममा जित निकाल्न सक्ने अंकगणितमा छैन ।

त्यसमाथि अघिल्लो वर्ष एमाले विभाजित भएको जिल्ला अध्यक्ष विमल पुनसहितको टोली एकीकृत समाजवादीमा लागेपछि अंकगणित थप कमजोर भएको थियो । यसको अर्थ माओवादी उम्मेदवार शर्मा बलियो उम्मेदवार हुन् । तर, उनी आफ्नै जिल्लाभित्र सीमित भइरहेका छन् ।

पार्टीको उपमहासचिवसमेत रहेका शर्माको जिल्लाभित्रकै दौडधुप हेर्दाचाहिँ हारबाट त्रसित छन् भन्ने आंशका गराउँछ । तुलनात्मक रूपमा ‘सेफ जोन’मा रहेका नेता शर्मा अन्य जिल्लामा पुगेर पार्टी र उम्मेदवारको प्रचारमा लागेका छैनन् । र, उनीनिकट नेताहरूका अनुसार लाग्ने कार्यसूची पनि बनेको छैन ।

२९ कात्तिकमा वाम–लोकतान्त्रिक गठबन्धनले रोल्पाको होलेरीमा चुनावी सभा गर्दैछ । उक्त सभामा कांग्रेस सभापति शेरबहादुुर देउवा र माओवादी अध्यक्ष प्रचण्डले सम्बोधन गर्ने कार्यतालिका छ । उनीहरूले शान्ति र मेलमिलापको सन्देश दिने बताइएको छ । होलेरी प्रहरी चौकीमा आक्रमण गरेर १ फागुन २०५२ मा माओवादीले सशस्त्र युद्धको सुरुवात गरेको थियो ।

उक्त आक्रमणको २७ वर्षपछि माओवादी र कांग्रेसले त्यही स्थानमा चुनावी सभा राखेर शान्ति र मेलमिलापको सन्देश दिने प्रयास गरेका हुन् । यस्तो रणनीति बनाउने नेता हुन् माओवादीका उपमहासचिव वर्षमान पुन । रोल्पाबाट प्रतिनिधिसभाका लागि उम्मेदवार भएका पुनले दुवै नेतालाई रोल्पा लगेर नयाँ सन्देश प्रवाहित गर्न खोजेको बताउने गरेका छन् ।

रोल्पा माओवादीको प्रभाव क्षेत्र हो । एकल चुनावी प्रतिस्पर्धामा पनि बलियो रहेको माओवादीलाई अहिलेको चुनावमा कांग्रेसे पनि साथ दिएको छ । सत्ता गठबन्धनका कारण यो क्षेत्रमा प्रदेशसभामा भने गठबन्धनले कांग्रेस नेता अमरबहादुर पुनलाई उम्मेदवार बनाएको छ । माओवादीको जनमतका हिसाबमा अहिलेका कांग्रेस र माओवादीका उम्मेदवार जोखिममा देखिएका छैनन् ।

तर, रोल्पामा चुनाव लडिरहेका उमहासचिव वर्षमान पुन रुकुम पश्चिममा नेता शर्माझैँ जिल्लाबाहिर निस्केका छैनन् । चुनावी नतिजा आफ्नो पक्षमा हुने लगभग निश्चितझैँ भए पनि पुन किन पार्टी र उम्मेदवारको प्रचारमा जिल्लाबाहिर जान आनाकानी गरिरहेका छन् ? अहिले माओवादी नेताहरूले नै प्रश्न उठाइरहेका छन् । एमालेबाट पूर्ण बुढामगरले पुनलाई चुनाैती दिइरहेका छन् । का‌ंग्रेसकाे साथ पाएकाे माओवादीलाई एमालेका बुढामगरले चुनाैती दिन निकै गाह्राे छ ।

माओवादीभित्र आफूलाई अध्यक्षको उत्तराधिकारी दाबी गर्ने र प्रभाव विस्तारको प्रयासमा पनि रहेका पुन र शर्मा दुवै जिल्लाबाहिर निस्कने प्रयासमा पनि छैनन् । उल्टै नेताहरूलाई राेल्पा बाेलाएर उनीहरूकाे समय खर्च गराइरहेका छन् । यसले कतै शर्मा र पुनले जिल्लामा बढ्ता दबाब महसुस गरिरहेकाे त हाेइन भन्ने प्रश्न पनि उठाएकाे छ ।

उपमहासचिव पुन तत्काल रोल्पाबाहिरको कार्यक्रममा निस्कने कार्यसूची पनि छैन । अन्य जिल्लामा पार्टी र उम्मेदवारको प्रचारका लागि पुन जिल्लाबाहिर नगएको पुनका स्वकीय सचिव सन्तोष पुनले जानकारी दिए । उनका अनुसार अहिलेसम्म अन्य जिल्लामा निस्कने कार्यक्रम पनि छैन ।

शिलापत्रसँग पुनले भने, ‘पहिला पनि हामी जिल्लाबाहिर गएका थिएनौँ, पछि पनि जाने कार्यक्रम छैन । हामी जिल्लामै केन्द्रित छौँ ।’

प्रकाशित मिति: सोमबार, कात्तिक २८, २०७९ १९:२३

शिलापत्र संवाददाता

प्रतिक्रिया दिनुहोस्

भर्खरै

सुदूरपश्चिमका मुख्यमन्त्री सोडारीले आज विश्वासको मत लिने, प्रतिवाद गर्ने नेपाली कांग्रेसको तयारी

जनप्रतिनिधिको खरबुजा खेतीः सिंगापुर र साउदीमा ७ वर्ष बिताए, अहिले ९ जनालाई रोजगारी दिन्छन्

आज चार वटा संसदीय समितिको बैठक बस्दै

नेपाल फर्काइयो अमेरिका पुगेका शताब्दीऔँ पुराना मूर्ति

प्रेस तथा अभिव्यक्ति स्वतन्त्रताबिना लोकतन्त्र पूर्ण हुँदैनः मन्त्री शर्मा

लोकप्रिय

सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

इलाम २ः प्रारम्भिक मतपरिणाममा एमाले र 'पूर्वएमाले'बीच टक्कर

श्रीमती रञ्जितासँगकाे सहमति भंग भएपछि रेशम विक्षिप्त, २० मिनेटमा सात स्टाटस

बालकोट वार्ता: प्रचण्डलाई बाहिर राखेर कांग्रेस-एमालेको सरकार बनाउने शेखरको प्रस्ताव, ओलीले गरे अस्वीकार

इलाम २ अपडेटः यस्तो छ प्रारम्भिक मतपरिणाम

विचार

स्कूल छाड्ने मुख्य कारण- जीवन एकातिर, शिक्षा अर्कोतिर

आफ्नै सामर्थ्य नबुझेर अलमलिएका स्थानीय सरकार

पसिना बगाउनेहरूलाई हेलाहोचो गरेर कसरी आऊला समृद्धि ?

ब्लग

कसरी हटाउने सार्वजनिक सवारीको बेथिति ?

सधैँ हाँसीखुसी देखिने गाउँकी काकी, डाक्टर र अर्जुन मैनालीले राेजेकाे गलत बाटाे

छोटो तर मनमोहक पदयात्रा 'लाङटाङ'

शिक्षा

स्कूल छाड्ने मुख्य कारण- जीवन एकातिर, शिक्षा अर्कोतिर

सरकारी स्कुलप्रतिको नकारात्मक धारणा बदलेर यसरी उत्कृष्ट बन्यो ज्ञानोदय मावि

आफ्नै छोराछोरी पढाउन राजा वीरेन्द्रले भित्र्याएका थिए ए–लेभल, कस्ता विद्यार्थीले पढ्ने ?