पहिलो त्रैमासमै घट्यो अधिकांश जलविद्युत् कम्पनीकाे नाफा, बढ्नेमा तीन कम्पनी मात्रै

पहिलो त्रैमासमै घट्यो अधिकांश जलविद्युत् कम्पनीकाे नाफा, बढ्नेमा तीन कम्पनी मात्रै

A+ A A-

जलविद्युत्‌ कम्पनीहरूले यतिबेला धमाधम चालु आर्थिक वर्षको प्रथम त्रैमासिक विवरण सार्वजनिक गरिरहेका छन् । हालसम्म सातवटा कम्पनीले आफ्नो वित्तीय विवरण प्रकाशित गर्दा तीनवटा मात्रै कम्पनी नाफामा देखिएका छन् ।

पछिल्लो २ वर्षदेखि व्यापार व्यवसाय समस्याग्रस्त भइरहेको अवस्थामा बैंक तथा वित्तीय संस्थाले कर्जा वितरणमा कडाइ गरेसँगै त्यसको प्रभाव उत्पादनमा देखिएको हो । यसपालि जलविद्युत्‌ कम्पनीहरू पनि घाटा खाने कम्पनीहरूको अग्रपङ्क्तिमै देखिएका छन् । जसमा हालसम्म प्रकाशित वित्तीय विवरणअनुसार चारवटा कम्पनीका अघिल्लो वर्षको तुलनामा नाफामा ह्रास आएको छ।

नाफामा ह्रास आउनेमा साहस ऊर्जा जलविद्युत्‌ आयोजना, नेसनल हाइड्रोपावर कम्पनी, दिव्यश्वरी हाइड्रोपावर र सानिमा माई हाइड्रोपावर कम्पनी छन् । यी कम्पनीको अघिल्लो वर्षको सोही अवधिको नाफाको तुलनामा यस वर्षको नाफामा उल्लेख्य गिरावट देखिएको छ ।

यस्ता छन् नाफा घट्ने कम्पनीहरू

नेसनल हाइड्रोपावर

नेसनल हाइड्रोपावर लिमिटेडको नाफामा शतप्रतिशतले ह्रास आएको छ । कम्पनीले सार्वजनिक गरेको चालु आर्थिक वर्षको त्रैमासिक वित्तीय विवरणमा गत आर्थिक वर्षको तुलनामा यस वर्षको नाफामा ९८.४८ प्रतिशतले ह्रास आएको देखिएको छ ।

अघिल्लो आर्थिक वर्षको पहिलो त्रैमासमा नेसनल हाइड्रोपावरले ६८ लाख १८ हजार रुपैयाँ मात्रै नाफा निकाल्न सकेको छ । जब कि अघिल्लो वर्ष सोही समयमा कम्पनीको नाफा ५८ करोड ७४ लाख ४३ हजार रुपैयाँ थियो ।

कम्पनीले विद्युत्‌ बिक्रीबाट हुने आम्दानी ३६८.६८ प्रतिशतले बढेको भए पनि खुद नाफा भने सुधार गर्न नसकेको देखिएको छ । कम्पनीको विद्युत्‌ बिक्री आय बढे पनि समीक्षा अवधिमा वित्तीय खर्च उल्लेख्य बढेका कारण खुद नाफा घट्न पुग्यो ।

वित्तीय खर्चमा कम्पनीले नियन्त्रण गर्न नसक्दा त्यसको असर कम्पनीको खुद नाफामा पर्दा अघिल्लो वर्षको तुलनामा नाफा घट्न पुुगेको हो । गत आवको प्रथम त्रैमासमा १७ लाखभन्दा बढी रहेको वित्तीय खर्च यो वर्षको तीन महिनामा बढेर १ करोड ४ लाखभन्दा माथि पुगेको छ ।

खर्चअनुसार आम्दानी बढाउन नसकेको कम्पनीले यस वर्ष विद्युत्‌ बिक्रीलाई भने बढाउन सफल बनेको देखिन्छ । वित्तीय विवरणअनुसार चालु आर्थिक वर्षको तीन महिनामा कम्पनीले ६ करोड ३६ लाख २८ हजार रुपैयाँबराबरको विद्युत् बिक्री गरेको छ । यस्तो आम्दानी अघिल्लो वर्षको सोही अवधिमा १ करोड ३५ लाख रुपैयाँमा मात्रै थियो ।

चुक्ता पुँजी १ अर्ब ६४ करोड ५० लाख १६ हजार रुपैयाँ रहेको कम्पनीको प्रतिशेयर आम्दानी भने १ रुपैयाँ ९६ पैसा मात्रै छ । अघिल्लो आर्थिक वर्षको सोही अवधिमा यस्तो रकम ४० रुपैयाँ ७३ पैसा थियो । प्रतिशेयर नेटवर्थ भने १०१.३६ रुपैयाँ छ । कम्पनीले आफ्नो जगेडा कोषमा भने २ करोड ३८ लाख रुपैयाँ बचत राखेको छ ।

दिव्यश्वरी हाइड्रोपावर

अघिल्लो आर्थिक वर्षको तुलनामा नाफामा शतप्रतिशत ह्रास आउने कम्पनीहरूमा नेसनल हाइड्रोपावरपछि आउँछ दिश्यश्वरी हाइड्रोपावर । जसको चालु आर्थिक वर्षको तीन महिनामा ७ करोड ३८ लाख रुपैयाँ नाफा कमाएको हो ।

कम्पनीले सार्वजनिक गरेको वित्तीय विवरणअनुसार अघिल्लो वर्ष यस्तो नाफा २९ लाख ३७ हजार रुपैयाँ थियो । यो भनेको गत वर्षको तुलनामा यो वर्षको नाफा ७५.८७ प्रतिशतले घटेको छ । खुद नाफा घटेसँगै प्रतिशेयर आम्दानी पनि १ रुपैयाँ १२ पैसा कायम भएको छ ।

खुद नाफा अघिल्लो वर्षको जसरी पर्याप्त गर्न नसके पनि कम्पनीले अघिल्लो वर्षको तुलनामा यस वर्ष विद्युत्‌ बिक्रीलाई भने बढाएको पाइएकाे छ । अघिल्लो वर्षको तीन महिनाको तुलनामा यस वर्ष ८.०९ प्रतिशतले विद्युत्‌ बिक्री बढाएको हो । कम्पनीले चालु तीन महिनामा ३ अर्ब २१ करोड रुपैयाँबराबरको विद्युत्‌ बिक्री गर्दा अघिल्लो वर्ष सोही अवधिमा २ करोड ९७ लाख रुपैयाँको मात्रै विद्युत्‌ बिक्री गरेको थियो ।

विद्युत्‌ बिक्रीलाई बढाए पनि बैंक वित्तीय संस्थाहरूबाट लिएको कर्जाको ब्याज खर्चका कारण खुद नाफा भने उल्लेख्य बढ्न सकेन । हाल सङ्खुवासभा जिल्लामा ३.३ मेगावाट क्षमताको सभा खोला जलविद्युत्‌ आयोजना सञ्चालन गरिरहेको कम्पनीको चुक्ता पुँजी २६.४ करोड रुपैयाँ रहेको छ । यस्तै, कम्पनीको जगेडा कोष भने रु. २२ करोड रुपैयाँले ऋणात्मक रहेको छ ।

साहस ऊर्जा

साहस ऊर्जा लिमिटेडले पनि यस वर्ष पर्याप्त नाफा कमाउन सकेन । कम्पनीले सार्वजनिक गरेको त्रैमासिक वित्तीय विवरणमा अघिल्लो वर्षको तुलनामा यस वर्षको पहिलो त्रैमासको नाफामा ५०.११ प्रतिशतले ह्रास आएको उल्लेख गरेको छ ।

चालु आर्थिक वर्षको पहिलो त्रैमासमा कम्पनीले १० करोड १८ लाख ९६ हजार रुपैयाँ खुद नाफा कमाएकोमा गत वर्ष सोही अवधिमा २० करोड ४२ लाख ७१ हजार रुपैयाँ नाफा कमाएको थियो ।

चुक्ता पुँजी ३ अर्ब ५० करोड रुपैयाँ रहेको कम्पनीको वार्षिक प्रतिशेयर आम्दानी भने ११.६५ रुपैयाँ छ । कम्पनीले जगेडा कोषमा २ अर्ब १२ करोड २२ लाख ६७ हजार रुपैयाँ बचत राखेको छ । यस्तो बचत अघिल्लो वर्षको तुलनामा ३२ प्रतिशतले बढी हो ।

सानिमा माई

माथि दिएका दुई कम्पनीको झण्डै शतप्रतिशतले नै नाफा घटे पनि सानिमा माई हाइड्रोपावरको भने खुद नाफा ४.६० प्रतिशतले मात्रै घटेको छ । कम्पनीले चालु आर्थिक वर्षको तीन महिनामा २३ करोड २४ लाख रुपैयाँ नाफा आर्जन गरेको छ । जबकि अघिल्लो वर्ष सोही अवधिमा कम्पनीको यस्तो नाफा २४ करोड ३१ लाख रुपैयाँ थियो ।

खुद नाफा घटेसँगै प्रतिशेयर आम्दानी पनि ३४ रुपैयाँ ७० पैसाबाट ३० रुपैयाँ ०९ पैसा कायम भएको छ । हाल २२ मेगावाट क्षमताको माई जलविद्युत्‌ आयोजना र ७ मेगावाट क्षमताको माई क्यास्केड गरी कुल २९ मेगावाट क्षमताका दुईवटा आयोजना संचालन गरिरहेको यस कम्पनीले पहिलो त्रैमाससम्ममा ३२ करोड १७ लाख रुपैयाँबराबरको विद्युत्‌ बिक्री गरेको छ, जुन अघिल्लो आर्थिक वर्षको सोही अवधिको तुलनामा ६.४३ प्रतिशतले कमी हो ।

चुक्ता पुँजी ३ अर्ब रहेको यस कम्पनीले आफ्नो जगेडा कोषमा १ अर्ब ६९ करोड रुपैयाँ राखेको छ । अघिल्लो वर्ष यस्तो बचत ८६.३७ प्रतिशतले कम थियो । यस्तै, अघिल्लो आर्थिक वर्षको प्रथम त्रैमासमा १ अर्ब ९१ करोड कर्जा सापट रहेकोमा यस वर्ष घटेर १ अर्ब ६० करोड रुपैयाँमा आइपुुगेको छ ।

नाफा बढाउने कम्पनीहरू

नाफामा ह्रास आउने कम्पनीहरूको वर्चस्व देखिइरहँदा खानीखोला जलविद्युत्‌ आयोजना, युनियन हाइड्रोपावर र चिलिमे जलविद्युत्‌ले भने राम्रै नाफा कमाउन सफल भएका छन् । जसमा अगाडि खानीखोला जलविद्युत्‌ आयोजना छ भने दोस्रो र तेस्रोमा युनियन र चिलिमे जलविद्युत्‌ कम्पनी रहेका छन् ।

खानीखोला जलविद्युत्‌

नाफामा ह्रास आउने कम्पनीहरूका बीच खानीखोला जलविद्युत्‌ लिमिटेडले भने पहिलो त्रैमासको नाफामा उल्लेख्य वृद्धि गरेको पाइन्छ । कम्पनीले सार्वजनिक गरेको पहिलो त्रैमासिक वित्तीय विवरण अनुसार कम्पनीले यो तीन महिनामा मात्रै २ करोड ५३ लाख ६ हजार रुपैयाँ नाफा कमाउन सफल बनेको हो । जब कि अघिल्लो वर्ष कम्पनीको यस्तो कमाइ ७० लाख १९ हजार रुपैयाँ मात्रै थियो । यो भने अघिल्लो वर्षको तुलनामा यस वर्ष कम्पनीको नाफा २६०.५४ प्रतिशतले धेरै हो ।

असोज मसान्तसम्ममा कम्पनीको विद्युत्‌ बिक्रीबाट हुने आम्दानी पनि ४५.८८% ले बढेर ६ करोड ६७ लाख १५ हजार रुपैयाँ पुगेको छ । गत आर्थिक वर्षको सोही अवधिमा यसले विद्युत्‌ बिक्रीबाट ४ करोड ५७ लाख रुपैयाँ आम्दानी गरेको थियो । कम्पनीको सञ्चालन नाफा ७२.३९ प्रतिशतले बढेर ६ करोड १ लाख रुपैयाँ पुगेको छ । विद्युत्‌ बिक्री र सञ्चालन नाफा बढ्नाले यसको खुद नाफा उकालो लागेको हो ।

खानीखोलाको चुक्ता पुँजी ४६ करोड ५७ लाख १४ हजार रुपैयाँ रहेको छ । रिटेन अर्निङ २ करोड ६० लाख ५४ हजार रुपैयाँले ऋणात्मक छ । यसको प्रतिशेयर आम्दानी ५ रुपैयाँ ४३ पैसा पुगेको छ । त्यस्तै, प्रतिशेयर नेटवर्थ ९४ रुपैयाँ ४१ पैसा छ ।

युनियन हाइड्रोपावर

युनियन हाइड्रोपावर लिमिटेडले भने यस वर्ष पहिलो त्रैमासमै अघिल्लो वर्षको भन्दा धेरै नाफा निकाल्न सफल बनेको छ । कम्पनीले यो तीन महिनामा १ करोड ४४ लाख २६ हजार रुपैयाँ नाफा निकालेको छ । जब कि अघिल्लो वर्ष यही अवधिमा कमपनीले १ करोड ३३ लाख ८७ हजार रुपैयाँ मात्रै नाफा निकालेको थियो । यो भनेको गत वर्षको तुलनामा यो वर्षको नाफा ७.७६ प्रतिशतले बढी हो ।

त्यस्तै, कम्पनीले अघिल्लो वर्षको तुलनामा यो वर्षको पहिलो त्रैमासमा विद्युत्‌ बिक्री पनि बढाएको छ । अघिल्लो वर्ष सोही अवधिमा कुल २ करोड ७० लाख रुपैयाँको विद्युत्‌ बिक्री गरेको कम्पनीले यस वर्ष भने २ करोड ८५ लाख रुपैयाँबराबरको विद्युत्‌ बिक्री गरेको छ । यो भनेको अघिल्लो वर्षको तुलनामा विद्युत्‌ बिक्रीबाट हुने आम्दानीमा ५.२२ प्रतिशतले वृद्धि हो ।

कम्पनीको चुक्ता पुँजी ७५ करोड रुपैयाँ रहेको छ । जगेडा कोष ३३ करोड ३४ लाख रुपैयाँ ऋणात्मक छ । यसको प्रतिशेयर आम्दानी ७ रुपैयाँ ६९ पैसा भने प्रतिशेयर नेटवर्थ ९५ रुपैयाँ ५५ पैसा छ ।

चिलिमे जलविद्युत्‌ आयोजना

चिलिमे जलविद्युत्‌ कम्पनीले पनि चालु आर्थिक वर्षको पहिलो त्रैमासमा नाफा कमाउन सफल बनेको छ । कम्पनीले सार्वजनिक गरेको वित्तीय विवरणअनुुसार २० करोड ७८ लाख ८० हजार रुपैयाँ नाफा कमाउन सफल भएको हो । जब कि यस्तो आम्दानी कम्पनीको २० करोड ३५ लाख ३१ हजार रुपैयाँ थियो । गत वर्षको तुलनामा यो नाफा २.१४ प्रतिशतले बढी हो ।

त्यस्तै, कम्पनीले विद्युत्‌ बिक्रीलाई पनि यस वर्ष बढाएको देखिन्छ । असोज मसान्तसम्ममा कम्पनीको विद्युत्‌ बिक्रीबाट हुने आम्दानी १.१८ प्रतिशतले बढेर ३५ करोड ५८ लाख ३८ हजार रुपैयाँ पुगेको छ । गत आर्थिक वर्षको सोही अवधिमा यसले विद्युत्‌ बिक्रीबाट ३५ करोड १६ लाख रुपैयाँ आम्दानी गरेको थियो ।

चिलिमेको चुक्ता पुँजी भने ६ अर्ब ७५ करोड १७ लाख ९४ हजार रुपैयाँ पुुगेको छ भने यसको प्रतिशेयर आम्दानी ४ पैसाले बढेर १२ रुपैयाँ १९ पैसा पुगेको छ ।

रुरु जलविद्युत्‌

रुरु जलविद्युत्‌ परियोजना लिमिटेडले चालु आर्थिक वर्षको पहिलो त्रैमासमा ३ करोड ३९ लाख ८४ हजार रुपैयाँ नाफा कमाएको वित्तीय विवरण सार्वजनिक गरेको छ ।

उक्त विवरणअनुसार अघिल्लो वर्षको तुलनामा यस वर्ष १.९४ प्रतिशतले धेरै नाफा कमाएको हो । अघिल्लो वर्ष यस्तो नाफा ३ करोड ३३ लाख ३५ हजार रुपैयाँ थियो ।

असोज मसान्तसम्ममा कम्पनीको विद्युत्‌ बिक्रीबाट हुने आम्दानी भने २.९९ प्रतिशतले घटेर ५ करोड ४८ हजार रुपैयाँ कायम भएको छ । गत आर्थिक वर्षको सोही अवधिमा यसले विद्युत्‌ बिक्रीबाट ५ करोड १५ लाख रुपैयाँ आम्दानी गरेको थियो । विद्युत्‌ बिक्रीमा आएको कमीका कारण यसको नाफा पनि प्रभावित बनेको हो । साथै, यसको वित्तीय खर्च पनि केही घटेको छ ।

कम्पनीको चुक्ता पुँजी ४४ करोड ८४ लाख ७६ हजार रुपैयाँ रहेको छ । जगेडा कोषमा १७ करोड २० लाख रुपैयाँ जम्मा रहेको छ । यसको प्रतिशेयर आम्दानी २९ रुपैयाँ ७३ पैसाबाट घटेर २२ रुपैयाँ ७३ पैसा कायम भएको छ ।

प्रकाशित मिति: सोमबार, कात्तिक २८, २०७९ १८:१९