चुनावपछि गगन थापा प्रधानमन्त्री बन्न सक्छन् ?

A+ A A-

नेपाली कांग्रेसका महामन्त्री गगन थापाले आफ्नो निर्वाचन क्षेत्र काठमाडौं–४ मा आफूलाई भावी प्रधानमन्त्रीका रूपमा भोट मागिरहेका छन् । उनको चुनावी प्रचारमा गएका अर्थविद् स्वर्णिम वाग्लेले पनि शनिबार चुनावपछि थापा प्रधानमन्त्री बन्ने दाबी गरे ।

थापासँग प्रधानमन्त्री बन्ने भिजन र आफूजस्तै विज्ञको टिम रहेको दाबी गर्दै वाग्लेले भनेका थिए, ‘अब पुराना नेताको सम्मान गर्दै नयाँ नेतृत्वबाट मुलुकलाई अघि बढाउन लाग्नुपर्छ । काठमाडौं ४ का जनताले जिताएर पठाए गगन थापालाई निकट भविष्यमै प्रधानमन्त्रीका रूपमा देख्न पाइने छ ।’

गत असार पहिलो साता एक टेलिभिजनमा यसपटक प्रधानमन्त्रीका लागि कोशिस गर्ने घोषणा गरेसँगै ‘भावी प्रधानमन्त्री’मा थापाको चर्चा हुँदैआएको छ । आमनिर्वाचनको मिति नजिकिँदै जाँदा थापा स्वयम् र उनको प्रचारक टिमले प्रधानमन्त्री ‘कार्ड’लाई बढी नै प्रचारमा ल्याएका छन् । महामन्त्री थापाले चुनावपछि कांग्रेसमा मात्र संसदीय दलको नेता निर्वाचन हुने टिप्पणी गर्दै त्यो चुनावमा भाग लिन आफूलाई जिताउन मतदातासँगै आग्रह गरिरहेका छन् ।

महामन्त्री थापा पार्टीमा सेलिब्रिटी नेताका रूपमा परिचित छन् । कांग्रेसका थुप्रै उम्मेदवारहरू आज पनि थापाले आफ्नो क्षेत्रमा पुगेर मन्तव्य दिए जित्न सहज हुने भन्दै निम्ता पठाइरहेका छन् । तर, यसपटक गगनलाई त्यो सुविधा छैन । चुनावी प्रक्रिया सुरु भएयता उनी काठमाडौं–४ बाट बाहिर निस्किन सकेका छैनन् । २०७४ को निर्वाचनमा एमाले–माओवादीको गठबन्धनसँग चुनाव लड्दासमेत थापा निर्वाचन क्षेत्रबाहिर चुनावी प्रचारमा निस्केका थिए । तर, पाँच दलीय सत्ता गठबन्धनको उम्मेदवारका रूपमा उभिँदा पनि यसपटक उनले काठमाडौं ४ का दबाब महशुस गरेको प्रष्टै देखिन्छ ।

संसद्‌मा प्रतिपक्षीय मुद्दामा थापा जति मुखर देखिए, निर्वाचन क्षेत्रको बाढी र डुबान समस्या समाधानमा नलागेको मतदाताको गुनासो रहँदै आएको छ । मतदाताका गुनासो थम्थम्याउँदै संसद्‌मा तेहेरिनकै लागि यसपटक प्रधानमन्त्री ‘कार्ड’ प्रयोग गरेको विश्लेषकहरूको दाबी छ ।

गगन र उनका प्रचारकले भावी प्रधानमन्त्रीको प्रचार गर्नुका पछाडि मुख्यतः दुई कारण देखिन्छन् । पहिलो, गगन यसपटक आफ्नै निर्वाचन क्षेत्रमा कमजोर देखिएका छन् । अघिल्लो चुनावमा जस्तो लोकप्रियताको माहोल पनि यसपटक देखिँदैन । नेपाली राजनीतिमा भावी प्रधानमन्त्री आफैँमा एउटा आकर्षक नारा हो । त्यसले चुनावको अघिल्लो दिनसम्म एकाएक आफ्नो पक्षमा माहोल बन्ने विश्वास गगन र उनको चुनावी रणनीतिक टिमलाई छ ।

दोस्रो, कांग्रेसमा सभापति शेरबहादुर देउवाको उत्तराधिकारी को हुने भन्ने प्रश्न उठिसकेको छ । पार्टीभित्रको ‘सेलिब्रेटी’ छवि जोगाएर गगन देउवापछि प्रधानमन्त्रीको लाइनमा उक्लिन चाहन्छन् । जसरी, १३औँ महाधिवेशनमा पार्टीको कमजोर कृष्ण सिटौला समूहबाट महामन्त्रीमा उठेर हारेर १४औँ महाधिवेशनमा निर्वाचित हुने आधार बनाए ।

प्रधानमन्त्री बन्न पहिले पार्टीको संसदीय दलको नेता निर्वाचित हुनुपर्छ । यसपटक चुनाव जितेर उनी कम्तिमा पार्टी संसदीय दलको नेतामा चुनाव लड्न सक्छन् । त्यहाँबाट उनी निर्वाचित हुने सम्भावना किन पनि कमजोर छ भने सभापति देउवाले संस्थापनइतरका ३० प्रतिशतभन्दा कमैलाई मात्र उम्मेदवार बनाएका छन् । तीमध्ये कति संसद्‌मा आउने हुन् यकिन छैन ।

सत्ता गठबन्धनको सिट बाँडफाँट हेर्दा कांग्रेसका सबै प्रत्यक्ष उम्मेदवारले जित्दा र समानुपातिकमा पहिलो पार्टी हुँदासमेत एक्लै बहुमत हुने स्थिति छैन । तर, कांग्रेसमा वरिष्ठ नेता रामचन्द्र पौडेलदेखि शेखर कोइराला, प्रकाशमान सिंह र सशांक कोइरालासमेतले भावी प्रधानमन्त्रीका रूपमा भोट मागिरहेका छन् । पार्टी सभापति शेरबहादुर देउवा, जो साँच्चिकै प्रधानमन्त्री हुँदैछन् उनले बरु बोलिसकेका छैनन् । त्यसैले महामन्त्री गगन थापाको प्रधानमन्त्रीको कार्ड पनि हाललाई सम्भावना कम रहेको चुनावी फण्डाजस्तो मात्र देखिएको छ ।

प्रकाशित मिति: आइतबार, कात्तिक २७, २०७९ १८:१४