सर्लाही ४ : बाबुको राजनीतिक विरासत जोगाउन नर्सिङ छाेडेर चुनावी मैदानमा उत्रिएकी मधुमाला

सर्लाही ४ : बाबुको राजनीतिक विरासत जोगाउन नर्सिङ छाेडेर चुनावी मैदानमा उत्रिएकी मधुमाला

A+ A A-

स्वास्थ्य उपचारमार्तफ देश र समाजकाे सेवा गर्ने इच्छा बोकेकी २७ वर्षीया मधुमाला यादव अहिले बाबुको राजनीतिक विरासत जोगाउन चुनावी मैदानमा होमिएकी छिन् । बीएससी नर्सिङ अध्ययन गरेकी मधुमाला आफूले रुचाएको पेसा छोडेर बुबाको राजनीतिक विरासत जोगाउन सर्लाही निर्वाचन क्षेत्र नम्बर ४ बाट प्रतिनिधिसभा सदस्यमा स्वतन्त्र उम्मेदवार बनेकी छन् ।

२०६४ सालमा संविधान सभासदस्य भएका उनका बाबु शिवपुजन राय यादव रातो पासपोर्ट दुरुप्रयोग गरेको अभियोगमा दोषी ठहर भएपछि उनको राजनीतिक जीवन सकिएको छ । त्यसैले उनले आफ्नो राजनीतिक विरासतलाई अगाडि बढाउन छोरीलाई मैदानमा उतारेका छन् ।

लामो समयदेखि नेकपा माओवादी केन्द्रमा आबद्ध भई राजनीतिक गरेका रायले गत स्थानीय तहको चुनावमा सर्लाहीको रामनगर गाउँपालिकाको अध्यक्षमा आफ्ना २४ वर्षीय छोरा राजाबाबु यादवलाई जिताए ।

बुबाको राजनीतिक विरासतलाई जोगाउन राजनीतिकमा आएकी मधुमालाले सो क्षेत्रमा चुनावी प्रचारप्रसारलाई तीव्रता दिएकी छिन् । यही क्षेत्रमा कांग्रेसका अमरेश सिंह टिकट नपाएपछि स्वतन्त्र उम्मेदवार बनेका छन् ।

सो क्षेत्रमा सत्ता गठबन्धन र विपक्षी गठबन्धनका उम्मेदवारलाई स्वतन्त्र उम्मेदवारले चुनौती दिएका छन् । सत्ता गठबन्धनबाट नेपाली कांग्रेसका पूर्वजिल्ला सभापति नागेन्द्रकुमार राय चुनावी मैदानमा छन् भने विपक्षी गठबन्धनबाट जसपाका राकेशकुमार मिश्रले उम्मेदवारी दिएका छन् ।

स्वतन्त्र उम्मेदवार सिंह यस क्षेत्रबाट २०७० सालको संविधानसभा निर्वाचन र २०७४ सालको प्रतिनिधिसभा निर्वाचनमा कांग्रेसबाट निर्वाचित नेता हुन् । मधुमालाले नेता सिंहसँगै सत्तारुढ र विपक्ष गठबन्धन दलका उम्मेदवारलाई चुनावी मैदानमा कडा टक्कर दिने देखिएको छ । मधेसका दलित, विपन्न, तथा विभेद र हिंसामा परेका महिलाको उत्थानका लागि आफू राजनीतिमा आएको मधुमाला बताउँछिन् । म आफैँ उम्मेदवार भएका होइन, जनताले घर घेरेर मलाई उम्मेदवार बनाएका हुन्’, मधुमालाले अगाडि भनिन्, ‘जनताले मलाई उम्मेदवार बनाएको छ । र जनताको अर्शिवादले मेरो जित सुनिश्चत छ ।’

आफ्नो परिवारको व्यक्तिले मात्र यो क्षेत्रको जनताको सेवा गर्न सक्ने भएकाले आफूले मधुमालालाई काम छोडाएर राजनीतिमा लाग्न उत्प्रेरित गरेको मधुमालाका बुबा शिवपुजन रायको भनाइ छ । ‘हाम्रो क्षेत्रमा एक वर्गका राजनीतिज्ञले बाहुबली, जातपात, मनी मशल र सत्ता केन्द्रित राजनीतिक गर्छन्’, रायले भने, ‘मैले सधैँ जनताको बीचमा रहेर जनताको दुःख सुखमा सँगै रहेर काम गरेको छु । त्यस कारण यो क्षेत्रका मतदाताले सधैँ मलाई मतदान गर्छन् ।’ जिल्लामा माओवादीको संगठन निर्माणमा आफू अहोरात्र खटेको बताउदै रायले भने, ‘यो क्षेत्रमा माओवादीको राम्रो संगठन छ । तर पार्टीले गठबन्धन गरेर आफ्ना नेता तथा कार्यकर्तालाई निषेध गर्ने काम गर्‍यो । त्यसकारण छोरीलाई राजनीतिकमा उतारेँ ।’

यता, स्वतन्त्र उम्मेदवार सिंहले भने सो क्षेत्रमा आफ्नो बलियो जनाधार रहेकोले आफ्नो जित सुनिश्चित रहेको दाबी गरे । ‘स्वतन्त्रबाट उम्मेदवारी दिए पनि जनता मेरो साथमा छन्,’ सिंहले भने, ‘यो क्षेत्रमा मैले गरेको विकास नै मेरो जित्ने आधार हो । गठबन्धनले केही फरक पार्दैन ।’ लोकन्तत्रको सबलीकरण, भ्रष्टाचार, परिवारवादको अन्त्यका लागि आफूले उम्मेदवारी दिएको सिंहको भनाइ छ । ‘निष्ठा र सिद्धान्तको राजनीतिक गर्ने मान्छे हुँ,’ उनले भने, ‘लोकतन्त्रको र विकासका लागि सदैव एक सच्चा सिपाहीको रुपमा काम गरेको छु । र जनताले त्यस्ता उम्मेदवारलाई मतदान गर्नेमा मान्यता हो ।’

यो क्षेत्रमा दुवै गठबन्धनका उम्मेदवारभन्दा स्वतन्त्र उम्मेदवार सिंह र यादवको बढी चर्चा छ । तर स्थानीय तहको निर्वाचनमा सत्तारुढ दलहरूले पाएको मतको अधारमा सत्ता गठबन्धन दलको उम्मेदवारलाई विजय प्राप्त गर्न सहज देखिन्छ । तर कांग्रेसका वागी उम्मेदवार सिंहले कांग्रेसकै मत पाउने सम्भावना भएकाले सत्ता गठबन्धनलाई आफ्नो मत जोगाउने चुनौती छ ।

प्रकाशित मिति: आइतबार, कात्तिक २७, २०७९ १७:३१