जब पेप्सीकाे भेरिफाइड खाताबाट ट्वीट भयाे, 'काेक इज बेटर'

A+ A A-

संसारकै धनी व्यक्ति एलन मस्कले ट्विटर किनेपछि अब के-के फेरबदल गर्लान् भन्ने चासाे सर्वत्र छ । तर मस्क भने सुरुवाती योजनाहरूमै असफल देखिएका छन् । केही निर्णय लागू हुनासाथ फिर्ता लिनुपरेको छ भने कतिपय कार्यान्वयन नै हुन नसक्ने अवस्था पैदा भएको छ ।

मस्कले गरेका केही निर्णयले ट्विटरले मात्रै होइन, यससँग जाेडिएका अरु थुप्रै कम्पनीले समेत नोक्सानी बेहोर्नु परेको छ ।

ट्विटरको ब्लू टिकका लागि महिनैपिच्छे ८ डलर लिने निर्णयपछि सोसल मिडिया प्लेटफर्मबाट नक्कली खाता हट्ने मस्कको विश्वास थियो । तर अनुमानविपरीत प्रयाेगकर्ता र कम्पनीलाई डुबाउन थालेपछि लागू भएको केही दिनमै यो कार्यक्रम फिर्ता लिन मस्क बाध्य भएका छन् ।

मस्कलाई लागेको थियो, ब्लू टिकका लागि मासिक ८ डलर तिराउँदा नक्कली खाताहरू घट्नेछन्, कम्पनीलाई पनि फाइदा हुने छ । तर यसाे भएन बरू उल्टै ८ डलर तिरेर नक्कली खाताहरू भेरिफाइड हुन थाले ।

ट्विटर प्रमुख एलन मस्क ।

यसअघि ट्विटरमा प्रयोगकर्ताले आइडेन्टिटी भेरिफिकेसनपछि ब्लू टिक पाउँथे । ताकि प्रयोगकर्तालाई यो विश्वसनीय लगोस् । तर मस्कले बुधबार ८ डलर प्रति महिनाको सशुल्क सदस्यता सुरु गरेपछि प्रयाेगकर्ताले ब्लू टिकसँगै नक्कली खाता हात पार्न थाले । यस्तो फेक अकाउण्टबाट ट्वीट पनि गर्न थालिहाले ।

यसरी नै, अमेरिकी फर्मास्युटिकल कम्पनी एली लिलिको एक फर्जी खाता खुल्याे । त्यसबाट भएको एक ट्वीटका कारण कम्पनीले लाखौँ डलरको नोक्सानी बेहोर्नुपर्‍यो । यसबाहेक ट्विटरको नयाँ ब्लु टिक सिस्टमअन्तर्गत निन्टेन्डो, लकहीड मार्टिन, पेप्सिको, मस्कको आफ्नै कम्पनी टेस्ला र स्पेसएक्स, अमेरिकी पूर्वराष्ट्रपति डोनाल्ड ट्रम्पदेखि लिएर कैयौँ व्यावसायिक खेलाडी र राजनीतिक हस्तीहरूको नक्कली खाता खोलियो । यति मात्र होइन, ब्लू टिक कार्यक्रमअन्तर्गत इसा मसीह र गेमिङ क्यारेक्टर सुपर मारियोको फर्जी अकाउण्टसमेत खुले ।

एलन मस्कको पेड सब्सक्रिप्सन प्रोग्राममातहत, एक प्रयोगकर्ताले फर्मास्युटिकल कम्पनी एली लिलिको नाममा ब्लु टिक पायो । र, ट्वीट गरिदियो, अब कम्पनीको इन्सुलिन सित्तैमा दिइने छ । एक भेरिफाइड अकाउण्टबाट गरिएको ट्वीटलाई मानिसहरूले गम्भीरतापूर्वक लिए । ट्वीटपछि कम्पनीको शेयरमा ४.३७ प्रतिशतको गिरावट आयो । यसको मार्केट क्याप करिब १५ अर्ब डलरम्म गिरेको थियो । कम्पनीले फर्जी ट्वीटबारे थाहा पाएलगत्तै यसबारे खुलासा गरेको थियो ।

सम्बन्धित समाचार

ट्विटरले राेक्याे 'ब्लू टिक'काे पैसा लिने निर्णय, नक्कली खाताको बिगबिगी

यसैगरी पेप्सी कम्पनीको नामबाट एक फर्जी अकाउण्ट खोलियो र ‘कोक इज बेटर’ ट्वीट भयो । मानिसहरू भ्रमित भए किनकि यो ट्वीट पनि भेरिफाइड अकाउण्टबाट गरिएको थियो ।

एलन मस्कले ट्विटर किनेपछि फर्जी खाताको मुद्दा ट्विटरसँग कारोबार गर्न बन्द गरेका कम्पनीका लागि थप चुनौतीपूर्ण बनेको छ । मस्कले ट्विटर किन्नु, यसका उच्च पदस्थ अधिकारीसहित ५० प्रतिशत कर्मचारीको बर्खास्तीजस्ता केही निर्णयले ट्विटरको अस्तित्व नै खतरामा लगेको जानकारहरू बताउँछन् ।

प्रकाशित मिति: आइतबार, कात्तिक २७, २०७९ १३:०१