कसले जित्ला टी–२० विश्वकप ?

A+ A A-

अस्ट्रेलियामा जारी टी–२० विश्वकप क्रिकेटको फाइनलमा आज (आइतबार) पाकिस्तान र इंग्ल्यान्डबीच प्रतिस्पर्धा हुँदैछ । यसअघि टी–२० विश्वकप क्रिकेटको उपाधि एक–एक पटक जितेको पाकिस्तान र इंग्ल्यान्डले दोस्रो पटक विश्वकप जित्ने लक्ष्यका साथ खेल्नेछन् ।

सेमिफाइनलमा पाकिस्तानले न्युजिल्यान्डलाई सात विकेटले र इंग्ल्यान्डले भारतलाई दोस्रो सेमिफाइनलमा १० विकेटले पराजित गर्दै फाइनलमा स्थान बनाएका हुन् । पाकिस्तानले २००९ मा टी–२० विश्वकप क्रिकेटको उपाधि जितेको थियो भने इंग्ल्यान्डले २०१० मा वेष्ट इन्डिजमा भएको विश्वकप जितेको थियो ।

फाइनल खेल अस्ट्रेलियाको मेलबर्न क्रिकेट मैदानमा नेपाली समयअनुसार दिउँसो १ः४५ सुरु हुनेछ । तर वर्षाको कारण खेल प्रभावित हुने सम्भावना पनि उच्च छ । आइतबार अस्ट्रेलियाको मेलबर्नमा पानी पर्ने मौसम पूर्वानुमान छ । योपटक मेलबर्न क्रिकेट मैदानमा विश्वकपका तीनवटा खेल वर्षाकै कारण रद्द भएका थिए ।

समूह–१ को न्युजिल्यान्ड र अफगानिस्तान, आयरल्यान्ड र अफगानिस्तान र अस्ट्रेलिया र इंग्ल्यान्डबीचको खेल वर्षाको कारण रद्द भएपछि टिमले अंक बाँडेका थिए । बिहीबार अस्ट्रेलियाको एडिलोइड ओभलमा दोस्रो सेमिफाइनलमा इंग्ल्यान्डले भारतलाई १० विकेटले पराजित गर्दै फाइनलमा स्थान बनायो ।

१६९ रनको चुनौती पाएको इंग्ल्यान्डले विना विकेट क्षति १६ ओभरमा लक्ष्य पूरा गरेको थियो । जहाँ एलेक्स हेल्सले ८६ र कप्तान जस बटलरले ८० रन बनाएका थिए । फाइनलमा पाकिस्तानविरुद्ध ओपनिङमा कप्तान जस बटलर र एलेक्स हल्सले ब्याटिङ सम्हाल्नेछन् । यी दुवै खेलाडी उच्च लयमा छन् ।

मध्यक्रममा मोइन अली, लियाम लिभिङ्सटन, ह्यारी ब्रोक, बेन स्टोक्सलगायतका ब्याटर छन् । बलिङमा मोइन अली, साम करन, मार्क वुड, बेन स्टोक्स, क्रिस वोक्स, आदिल राशिद छन् । पाकिस्तान पनि उच्च मनोबलको साथ फाइनलमा इंग्ल्यान्डविरुद्ध मैदानमा उत्रिने छ । सेमिफाइनलमा पाकिस्तानले न्युजिल्यान्डलाई सात विकेटले पराजित गर्दै १३ वर्षपछि फाइनलमा स्थान बनाएको थियो ।

पाकिस्तानको अर्को राम्रो पक्ष भनेको कप्तान बाबर अजाम र मोहम्मद रिजवान लयमा फर्किएका छन् । न्युजिल्यान्डविरुद्धको सेमिफाइनलमा यी दुवै खेलाडीले अर्धशतक बनाए । फाइनलमा इंग्ल्यान्डविरुद्ध ओपनिङ ब्याटिङ कप्तान बाबर अजाम र मोहम्मद रिजवानले गर्नेछन् ।

मध्यक्रममा शान मसुद, इफ्तिखर अहमद, मोहम्मद ह्यरिस, हैदर अली छन् । शादव खान, मोहम्मद नवाज, मोहम्मद वासिम लगायतका ब्याटरले फिनिसिङ गर्नेछन् । बलिङतर्फ पाकिस्तान निकै बलियो मानिन्छ । चोटपछि विश्वकपमा खेल्न टिममा फर्किएका शाहिन शाह अफ्रिदी इंग्ल्यान्डका लागि टाउको दुखाइ बन्न सक्छ ।