महाेत्तरी- ३ मा महन्थलाई मुस्किल, दुवै गठबन्धनभित्र लफडा, स्वतन्त्रलाई फाइदा

महाेत्तरी- ३ मा महन्थलाई मुस्किल, दुवै गठबन्धनभित्र लफडा, स्वतन्त्रलाई फाइदा

A+ A A-

प्रतिनिधिसभा सदस्य चुनावमा महाेत्तरी- ३ बाट लोकतान्त्रिक समाजवादी पार्टी (लोसपा) का अध्यक्ष महन्थ ठाकुरलाई समर्थन गर्ने र प्रदेशसभामा कांग्रेसले उम्मेदवार उठाउने सत्ता गठबन्धनबीच सहमति थियो । तर, ठाकुरले त्यो सहमति मानेनन् । २३ असोजमा उम्मेदवारी दर्ता गराउँदा प्रदेशसभाका दुई जना सदस्यमा ठाकुरले आफ्नै मान्छे उठाइदिए ।

त्यसले गठबन्धनमा असन्तुष्टि सुरु भइसकेको थियो । त्यही असन्तुष्टि बोकेर उम्मेदवारी दर्तालगत्तै कांग्रेसका नेता तथा समानुपातिक उम्मेदवार रामचन्द्र तिवारी लोसपा अध्यक्ष ठाकुरसँग भेट गर्नपुगे ।

भेटमा नेता तिवारीले भनेका थिए,‘हाम्रो क्षेत्रको प्रतिनिधि र प्रदेशसभा दुई क्षेत्र तपाईंले नै लिनुभयो । जबकि हाम्रो पार्टीको संगठन यहाँको पार्टीको भन्दा कयौँ गुणा राम्रो छ। तर, हामीले एउटा पनि क्षेत्र पाउन सकेनौँ । खैर, गठबन्धन भएकाले त्यो स्वीकार्य छ । मसहित पार्टीका नेताहरू तपाईंसँगै चुनावी प्रचारप्रसारमा खट्न तयार छौँ । तर समानुपातिक भोट मेरो लागि माग्दिनुपर्छ ।’

नेता तिवारीको कुरा सुनेर अध्यक्ष ठाकुर अवाक् भए । तिवारीसँगै अध्यक्ष ठाकुरलाई भेट्न गएका एक नेताले भने, ‘तिवारीजीले आफ्नो कुरा राख्नुभयो । तर ठाकुरजीको कुनै उत्तर आएन । त्यसपछि हामी त्यहाँबाट निक्कियौँ ।’

नेता तिवारी सो क्षेत्रबाट कांग्रेसको समानुपातिक कोटाको सूचीमा पहिलो नम्बरमा छन् । पार्टीले समानुपातिमा राम्रो मत ल्याएको खण्डमा उनको जीत सुनिश्चत छ । तर, अध्यक्ष ठाकुरले जावफ नै नदिएपछि नेता तिवारी असन्तुष्ट भएर फर्के । अहिले उनी अध्यक्ष ठाकुरको चुनावी प्रचारप्रसारमा देखिएका छैनन् । यो घटनासँगै सत्तारुढ गठबन्धनमाभित्र व्यापक असन्तुष्टि देखिएको छ ।

अध्यक्ष ठाकुरले प्रदेशसभा (१) का पूर्वराज्यमन्त्री अभिराम शर्मा र (२) बाट बाट रानी शर्मा तिवारीलाई उम्मेदवार बनाएका छन् । सांगठनिक रूपमा बलियो कांग्रेसले तीनमध्ये एउटा पनि सिट नपाएपछि असन्तुष्टि मात्र बढेको छैन, चुनाव प्रचार अभियान नै प्रभावित भएको छ । २०७४ को चुनावमा पनि कांग्रेसले ठाकुरलाई नै सहयोग गरेको थियो । निरन्तर ठाकुरलाई भोट हाल्नुपर्ने भएका कारण कांग्रेस नेताहरू पार्टी नेतृत्वसँग पनि असन्तुष्ट देखिएका छन् ।

कांग्रेस नेता बजरंग नेपाली भन्छन्, ‘गत चुनावमा पनि हामीले उहाँलाई नै सहयोग गरेका थियाैँ । अहिले पनि ठाकुरलाई नै असहयोग गर्दा साथीहरूमा असन्तुष्टि छ। पार्टीभित्रको असन्तुष्टि चुनावपछि पार्टीभित्रै राखौँला । अहिले गठबन्धनमा भएकाले उहाँलाई सहयोग गर्नु हाम्रो बाध्यता हो ।’

नेपालीकै भनाइमा असन्तुष्टि कांग्रेसभित्रमा होइन, लोसपाभित्र पनि छ । 'तर बिस्तारै त्यो समाधान हुँदैछ’, नेपालीले भने ।

महोत्तरी- ३ मा सत्तारुढ गठबन्धनभित्र मात्र होइन्, एमाले-जसपा गठबन्धनभित्र पनि ठूलै खटपट छ । विपक्षी गठबन्धनबाट प्रतिनिधिसभामा जसपाका हरिनारयण यादव उम्मेदवार रहेका छन् । एमाले-जसपा गठबन्धनको प्रदेशसभाको (क) बाट जसपाका दिपेन्द्र झा र (ख) बाट एमालेका रामदयाल मण्डल उम्मेदवार छन् । तर अहिलेको चुनावी अवस्थामा हरिनारायण यादवभन्दा सो क्षेत्रमा स्वतन्त्र उम्मेदवार रामआधार कापडले प्रभाव विस्तार गरिरहेका छन् । अर्थात् गठबन्धन दलका उम्मेदवार भए पनि यादवमाथि कापडले दबाब बढाउनुको मुख्य कारण नै जसपा र एमालेभित्रको असन्तुष्टि हो ।

लामो समयदेखि माओवादीमा राजनीतिक गरेका कापड गत स्थानीय तहको चुनावमा एमालेबाट जलेश्वर नगरपालिकाको मेयरमा चुनाव लडेका थिए । तर उनी पराजित भए । मेयरमा पराजित भएका उनले प्रतिनिधिसभा निर्वाचनमा लड्ने मनसाय बनाए । तर, पार्टीले जसपासँगको गठबन्धनका कारण उनलाई टिकट दिएन । अनि उनले स्वतन्त्र रूपमा प्रतिनिधिसभामा उम्मेदवारी दिए ।

गाविसदेखि नगरपालिका र संविधानसभाहुँदै गत स्थानीय चुनावसम्म करिब ८ पटक चुनाव लडेका कापडले अहिलेसम्म जीत भने निकाल्न सकेका छैनन् । एमालेबाट टिकट नपाएपछि अहिले प्रतिनिधिसभाका लागि स्वतन्त्र उम्मेदवार भएका कापडलाई एमालेकै एउटा समूहले साथ दिइरहेको छ । जसपासँग तालमेल गर्न नहुने पक्षमा रहेकाे एमालेको एउटा समूहले साथ दिएपछि प्रभाव बढाउन थालेका कापडलाई जसपाकै अर्को समूहले पनि साथ दिइरहेको छ । स्थानीय नेताहरूको बुझाइमा जसपाका प्रदेशसभाका उम्मेदवार दिपेन्द्र झा आफ्नै पार्टीका यादव विजयी भएकाे देख्न चाहँदैनन । झा खासमा प्रतिनिधिसभाको उम्मेदवार हुन चाहन्थे । तर, उनले त्यो अवसर पाएनन् र प्रदेशमा झरेका थिए । जसपाका यादव फेरि विजयी भए आफू खुम्चिनुपर्ने बुझाइमा रहेका झाले पनि कापडलाई सहयोग गरिरहेको चर्चा छ ।

सत्तारुढ गठबन्धन दलका असन्तुष्ट पक्षले पनि कापडलाई नै सहयोग गरिरहेकोले उनी कडा प्रतिस्पर्धीका रूपमा देखिएका छन् । एमालेका एक नेता भने, ‘रामआधारजी बलियो उम्मेदवार हुनुमा कांग्रेसका असन्तुष्ट पक्ष र एमालेका आन्तरिक सहयोग प्रमुख कारण हाे ।’

यो क्षेत्रमा एमालेका प्रदेशसभा सदस्यका उम्मेदवार मण्डलले पनि आन्तरिक रूपमा कापडलाई नै सहयोग गरिरहेको अनुमान छ । महोत्तरी-३ मा दुवै गठबन्धनभित्र असन्तुष्ट पक्षको फाइदा कापडले उठाइरहेका छन् । अर्थात दुवै गठबन्धन दलभित्रको लफडाले स्वतन्त्र उम्मेदवार कापड हाबी हुँदै गएका छन् ।

अर्कातिर महन्थ ठाकुरले लामो समय साथमा राखेका र प्रशस्त अवसर दिलाएका नेता वृषेशचन्द्र लाल पनि उम्मेदवार छन् । लोसपा विभाजनपछि तमलोपा गठन गरेर स्थानीय चुनावअघि लाल महोत्तरी- ३ मा ठाकुरसँगै प्रतिस्पर्धा गरिरहेका छन् । लामो समय कांग्रेसको राजनीति गरेका लालले ठाकुरसँगै कांग्रेस छोडेका थिए ।

तर, अहिले तिनै ठाकुरसँग प्रतिस्पर्धा गरिरहेका छन् । र, उनलाई लोसपा र कांग्रेसको एउटा पक्षले साथ दिइरहेको छ । त्यसैले, लालको उम्मेदवारी ठाकुरलाई हराउन काफी रहेको विश्लेषण पनि महोत्तरीमा भइरहेको छ । त्यसले गर्दा कांग्रेसको साथ पाएर पनि ठाकुर यसपटक चुनावी प्रतिस्पर्धामा हाबी हुन सकेका छैनन् ।

महोत्तरी- ३ को कांग्रेसमत खासमा ठाकुर, लाल र रामआधार गरी तीनतिर बाँडिएको छ । त्यसरी मत विभाजित हुँदा ठाकुरलाई असहज त हुन्छ नै, जसपाका हरिनारायण यादवले मत जोगाउन सके जीत निकाल्न सक्छन् । तर, जसपाको असन्तुष्ट पक्ष रामआधारलाई सहयोग गरिरहेकाे छ । त्यसको असर पनि जसपाका यादवलाई पर्नेछ ।

प्रकाशित मिति: शनिबार, कात्तिक २६, २०७९ ०९:००