‘टुरिष्ट’ ट्यागबाट बच्न देव गुरुङले मनाङ छोडे, लमजुङमै घर बनाए

A+ A A-

नेकपा माओवादी केन्द्रका महासचिव देवप्रसाद गुरुङलाई ‘टुरिष्ट उम्मेदवार’को ट्याग छ । कहिले कास्की–१, कहिले मनाङ, कहिले लमजुङबाट उठेका गुरुङ योपटक पनि २०७४ सालमा जितेको क्षेत्र लमजुङ १ बाट उम्मेदवार छन् ।

नेकपा एमालेका नेता/कार्यकर्ताले उनलाई ‘टुरिष्ट उम्मेदवार’ भनेर प्रचार गरिरहेका छन् । महासचिव गुरुङ भने २०७९ को चुनावमा पनि अघिल्लो निर्वाचनमाजस्तै ट्याग लाग्ने र आफ्नो कमजोर पक्ष साबित हुने डरले पहिल्यै सचेत बनेको पाइएको छ ।

धेरैले मनाङका नेता भनेर चिन्ने गुरुङले मनाङ छोडेका छन् । महासचिव गुरुङले २०७९ मा हुने चुनावमा लमजुङबाटै उठ्ने भएपछि यहाँ मतदाता नामावली सारेको र घरजग्गा किनेको पाइएको छ ।

मनाङको नासोँ गाउँपालिका–४ ओडार छोडेर महासचिव गुरुङले स्थायी बसोबास सुन्दरबजार नगरपालिका–८ घोक्रेस्वाँरामा सारेका छन् । उनको मतदाता नामावली पनि सोही वडाको भारती सदन मावि, बलिथुङमा छ । उनकी श्रीमती यशोदा गुरुङ (सुवेदी)को मतदाता नामावली पनि त्यहीँ छ । गत स्थानीय तहको चुनावसम्म उनको मतदाता नामावली मनाङ नासो–४ ओडारको सरस्वती आधारभुत विद्यालयमा थियो ।

महासचिव गुरुङले स्थानीय तहको चुनावपछि र प्रतिनिधि तथा प्रदेशसभा चुनावको मिति घोषणा हुनुअघि आफ्नो बसोबास र मतदाता नामावली मनाङबाट लमजुङ सारेका हुन् । सुन्दरबजार–८ का वडाध्यक्ष बिजेन्द्र थापाले महासचिव गुरुङले आफ्नो वडामा बसाइँसराइँ गरेको पुष्टि गरे । उनकाअनुसार गुरुङले जग्गा पहिल्यै किनेको भए पनि बसाइँसराइँ भने थिएन । ‘तीन/चार महिनाअघि बसाइँसराइँको कागजात बनाइएको हो,’ वडाध्यक्ष थापाले शिलापत्रसँग भने ।

स्थानीयकाअनुसार त्यहाँ किनेको घरमा उनी बस्दैनन् । ‘बस्न यहाँ बस्नुहुन्न । गाउँले शैलीको घर र जग्गा छ । त्यो म यहाँको स्थानीय हो भन्न, चुनावमा देखाउनमात्रै हो,’ एक स्थानीयले शिलापत्रसँग भने ।

महासचिव गुरुङ निकटले लमजुङमै घर भएको मान्छे कसरी ‘टुरिष्ट उम्मेदवार’ हुन्छ भनेर बसाइँसराइँ प्रमाणपत्र उक्त कागजात बनाउँदाको मिति लुकाएर प्रचार गरिरहेका छन् । आफूलाई ‘टुरिष्ट उम्मेदवार’ भनिएकोमा महासचिव गुरुङले असन्तुष्टि जनाउँदै आएका छन् । ‘मलाई टुरिष्ट उम्मेदवार भनेर अनावश्यक हल्ला फैलाइएको छ । यसअघिको निर्वाचनमा एमालेसँगै हुँदा त्यतिबेला पनि म उम्मेदवार थिएँ । त्यतिबेला म मनाङकै बासिन्दा हुँदा पनि टुरिष्ट भइनँ तर अहिले लमजुङकै बासिन्दा भइसकेँ अहिले कसरी टुरिष्ट उम्मेदवार हुन्छु ?’ उनले सुन्दरबजारमा आयोजित एउटा चुनावी कार्यक्रममा भनेका थिए ।

महासचिव गुरुङ जुन पालिका जान्छन्, त्यहाँ कुन–कुन योजना र कति बजेट परेको छ लिखित पढेर सुनाउँछन् । त्यसमा आफूसहित स्थनीय तहका जनप्रतिनिधिको भूमिका रहेको दाबी महासचिव गुरुङले गरिरहेका छन् ।

मनाङबाट उठ्दा हार्ने र गठबन्धन हुँदा लमजुङ नै सुरक्षित देखेपछि महासचिव गुरुङले यहाँ घरजग्गा किनेर आफूलाई लागेको ट्याग मेटाउन खोजेको एमाले नेताहरू बताउँछन् । नेता गुरुङले २०७४ सालमा चुनाव जितेपछि काम नगरेकोमात्रै होइन, फर्केर जिल्ला नआएको र काठमाडौंतिरै भुलेको आरोप एमाले नेताको छ ।

आगामी ४ मंसिरको चुनावमा एउटामात्रै निर्वाचन क्षेत्र रहेको लमजुङमा महासचिव गुरुङको प्रतिस्पर्धा एमाले उपमहासचिव पृथ्वीसुब्बा गुरुङसँग हुँदैछ । २०७४ सालको चुनावमा एमाले–माओवादी गठबन्धन हुँदा पृथ्वीसुब्बाले देवलाई लमजुङको प्रतिनिधिसभा निर्वाचन क्षेत्र छोडिदिएका थिए । आफू प्रदेश सभा ‘ख’बाट लडेर मुख्यमन्त्री पनि बने । तर, अघिल्लो निर्वाचनमा सँगै रहेका नेता अहिले प्रतिस्पर्धामा उत्रिएका छन् ।

प्रकाशित मिति: शुक्रबार, कात्तिक २५, २०७९ ०७:१०