हिमाली क्षेत्रका सुन्दर तस्वीर हेर्दै पढ्नुहाेस् च्छो-रोल्पा तालसम्म पुग्दाकाे यात्रानुभूति

हिमाली क्षेत्रका सुन्दर तस्वीर हेर्दै पढ्नुहाेस् च्छो-रोल्पा तालसम्म पुग्दाकाे यात्रानुभूति

A+ A A-

काठमाडौंबाट करिब २ सय किलाेमिटर दूरीमा रहेको च्छो-रोल्पा ताल सुरुवाती गन्तव्यस्थल छेतछेत, दोलखा (१४०० मिटर) बस वा अन्य सवारीसाधनबाट ८ घण्टाको यात्रा गरेपछि पुग्न सकिन्छ । तामाकोसी नदीको किनारमा अवस्थित यो ठाउँमा छेतछेत झरना छ, जुन जोकोही ट्रेकर्सका लागि आकर्षणको केन्द्र हुनेछ । दोलखाको उत्तरी भागमा अवस्थित रोल्वालिङ उपत्यका यो पदमार्गअन्तर्गत नै पर्छ । धेरैजसो यात्रा रोल्वालिङ खोलाको किनारनजिक हुँदै च्छो-रोल्पा तालसम्म गरिन्छ ।

लगभग एक हप्तासम्म गरिने यो ट्रेकको दोस्रो दिन तामाकोसी नदी पार गरेर २/३ घण्टाको उकालो हिँडेपछि सिमीगाउँ (२००० मिटर) पुगिन्छ । तामाङ जातिको बाहुल्य रहेको यो गाउँबाट गौरीशंकर हिमाल, माथिल्लो तामाकोसी जलविद्युत् आयोजनाको ड्यामस्थल लामाबगर र अन्य प्राकृतिक सुन्दरताकाे दृश्यावलोकन गर्न सकिन्छ । यो ठाउँ यस पदमार्गको महत्त्वपूर्ण ठाउँ हो । खान बस्न सुविधायुक्त होटलहरूको व्यवस्था भएकाले धेरै पर्यटकहरूले यस ठाउँलाई विश्रामस्थलको रूपमा उपयोग गर्छन् ।

त्यसपछि जङ्गलको बाटो उत्तिसे, सुर्मुचेहुँदै क्याल्चेसम्म पुगिन्छ । गौरीशंकर संरक्षण क्षेत्रअन्तर्गत पर्ने यो जङ्गलमा लोपोन्मुख रेडपाण्डा, अन्य जीवजन्तु, चराचुरुङ्गी, वनस्पति, जडीबुटी पाइन्छ । अन्य ट्रेकिङ क्षेत्रको तुलनामा यो पदमार्ग सिँढी नै सिँढीको बाटो भएकाले सहज किसिमको छ । बाटोका सबै ठाउँमा सूचनाका लागि सूचनामूलक बोर्डहरू राखिएका छन् । हरेक २/३ घण्टाको फरकमा होटल/लजको व्यवस्था छ । रोल्वालिङ खोलाको किनारमा अवस्थित डोङाङ (२८०० मिटर) दोस्रो दिनका लागि बस्न उपयुक्त ठाउँ बन्न सक्छ ।

तेस्रो दिन, ठाङ्थिङ-बेदिङहुँदै ना पुगिन्छ, त्यो नै यो ट्रेकको अन्तिम गाउँ हो । अघिल्लो दिनको तुलनामा बाटो केही सहज हुनेछ । धेरैजसो तेर्सो थोरै-थोरै मात्र उकालो बाटोको यात्रा हुनेछ । पर्यटकहरूले बेदिङ (३७५० मिटर) मा गुम्बा, त्यहाँको पुरानो गाउँ, चौँरीगोठ, वरिपरिका हिमाल हेरेर केही समय बिताउन सक्छन् । ना गाउँ (४२०० मिटर) वरिपरि हिमाल नै हिमाल छन् । उपत्यकाकाे रूपमा रहेको यो ठाउँबाट च्छो-रोल्पा ताल रहेको ठाउँ पनि देख्न सकिन्छ । धेरै चिसो, पहाड नै पहाडको बीचमा, तलपट्टि रोल्वालिङ खोला छ ।

शेर्पा समुदायको बसोबास रहेको यो ठाउँ होटल, पर्यटन, चौँरीपालनमा संलग्न छन् । चौथो दिन च्छो-रोल्पा ताल (४५०० मिटर) र दूधकुण्ड (४७५० मिटर) अवलोकन गर्न सकिन्छ । ना गाउँबाट २/३ घण्टामा च्छो-रोल्पा ताल पुग्न सकिन्छ भने दूधकुण्डका लागि थप २ घण्टा हिँड्नुपर्ने हुन्छ ।

नेपालको जोखिम हिमतालको रूपमा चिरपरिचित च्छो-रोल्पा चोबुजे (६६८६ मिटर) हिमालको फेदीमा अवस्थित यो ताल आकारको हिसाबले धेरै ठूलो र लामो छ । यही तालको बाटोहुँदै टासीलाप्चा पास (५७५० मिटर) गरेर सोलुखुम्बु जान सकिन्छ । सूर्यास्तमा हिमालमा परेको घामको पहेँलो किरणको छाया तालमा अति सुन्दर देख्न सकिन्छ । तालको पानी रङ भने सधैँभरि एकनास हुँदैन, प्रायः वरिपरिको पहिरोका कारण धमिलो नै हुन्छ ।

धेरैजसो पदयात्रा गर्नेहरू तालको अवलोकनसँगै आफ्नो यात्रालाई सकाएर ना गाउँ फर्किने गर्छन् । तर, हिमालको दृश्यावलोकन गर्न रुचाउनेहरूका लागि थप एक दिन लाग्ने अर्को गन्तव्य हो– यलुङ रि बेस क्याम्प (५००० मिटर) । त्यसका लागि ना गाउँबाट नै छुट्टै दायाँ उकालो बाटो तय गर्नुपर्ने हुन्छ । अल्टिच्युडको हिसाबले धेरै माथि भएकाले जोकोही जान सक्दैनन् तर गएकाले चाहिँ स्वर्गकै अनुभूति गरेर फर्किन्छ्न् ।