फेरि निर्वाचित हुने ईश्वरको ध्याउन्न, मतदाताले खोजेको नयाँ अनुहार बन्न प्रदीपको दौडधुप (भिडियोसहित)

फेरि निर्वाचित हुने ईश्वरको ध्याउन्न, मतदाताले खोजेको नयाँ अनुहार बन्न प्रदीपको दौडधुप (भिडियोसहित)

A+ A A-

निर्वाचनको सँघारमा उम्मेदवारको घरदैलोले तीव्रता पाएको छ । पार्टी र विगतमा सरकारको जिम्मेवारी रहँदाको हैसियतले पनि धेरै क्षेत्रमा चुनावको आकलन गर्ने गरिएको छ । काठमाडौं १, काठमाडौं ४ र काठमाडौं ५ जो कसैलाई विगत हेरेर चुनावी प्रक्षेपण गर्न सहज छैन ।

२०७४ मा स्थानीय तहको निर्वाचन भएपछि भएको प्रतनिधिसभा निर्वाचनको मत परिणामले पनि मतको निकै भिन्नता देखिन्छ । बढी उम्मेदवारको गुण दोषलाई नै केलाउने गरेका छन् । नयाँ अनुहारको खोजी र पुरानोको छवि उस्तै गरी विश्लेषण गरिएको हुन्छ ।

बूढानीलकण्ठ-३ का भीम खड्काले नयाँ योजना लिएर आउने र संसद्‌मा नहराउने पात्रलाई मत दिनुपर्ने तर्क गर्छन् । 'नेताहरू चुनाव आउँदा तातिन्छन्, चुनाव सकिएपछि जनतालाई सम्झिएका छैनन् । अब हामीले सोचेर मत हाल्नुपर्ने हुन्छ, पुरानोलाई दोहोर्‍याई-तेहेर्‍याई गर्ने र काम चलाउ गर्ने होइन, नयाँ योजना लिएर आउने उम्मेदवारलाई हामीले प्राथमिकता दिनुपर्छ,' खड्काले भने ।

आफ्ना-आफ्ना विशेषता र अब्बल पक्ष रहेर पनि काठमाडौं ५ मा स्थापित दलका मुख्य उम्मेदवारको रूपमा हेरिएका ईश्वर पोखरेल र प्रदीप पौडेललाई निर्वाचन नतिजा आकलन गर्न गाह्रै देखिन्छ । हामीले आइतबार बूढानीलकण्ठ-३ का पाँच जना, बूढानीलकण्ठ-५ का सात जना र टोखा-७ का दुई जना मतादातासँग कुरा गर्दा अधिकांशको मत नयाँ अनुहारतर्फ थियो ।

हामीले प्रश्न गरेका १४ जनामध्ये नौ जनाले पुरानो अनुहारको भर पर्न नसक्ने बताएका थिए भने पाँच जनाले आउने हराउनेसँग सचेत हुनुपर्ने तर्क गरेका थिए । यसमध्ये पनि तीन जनाले प्रदीप पौडेलकै नाम लिए भने दुई/दुई जनाले रञ्जु दर्शना र ईश्वर पोखरेलको ।

बूढानीलकण्ठ-५ मा चियापसल चलाएकी दोलखाकी शान्ता तामाङ नयाँबाट पनि आस गर्न गाह्रो हुने बताउँछिन् । 'कसलाई भोट हाल्ने त मलाई पनि थाहा छैन तर नयाँ आउनेका पनि कुरै ठूला, जितेर नहराउने नेताहरू खोज्नुपर्छ,' तामाङले भनिन् ।

'मंसिर ४, ओली सरकार', 'आयोआयो गठबन्धन आयो' काठमाडौं ५ मा ईश्वर पोखरेल र प्रदीप पौडेलको घरदैलोमा हिँडेका प्रचारकहरू नारा घन्काउँदै हिँडेका छन् । कोही हिजो गरेका र भोलि गर्ने कामको प्रचार सुनाउँछन् । कोही हिजो नभएका र भोलि हुने कामको प्रचार गरिरहेका छन् ।

प्रदीप पौडेलको घरदैलो

ईश्वर पोखरेलको घरदैलो

उता २०७४ को निर्वाचनमा स्थापित पार्टीहरूलाई काठमाडौं महानगरपालिकामा राम्रै चुनौती दिएकी रञ्जु दर्शना आफ्नी सासू आमा र केही युवाहरूसँगै मतदाताका घरघरमा ढोका ढकढक्याउँदै हिँडेकी छन् । ईश्वरको भने प्रदीपको जस्तो तामझाम छैन । रञ्जु दर्शनाले 'म एक्लो वृहस्पति पनि बन्न सक्छु, सहयोग गरिदिनुस्' भन्दै आफ्ना एजेन्डाको पोको फुकाएकी छन् ।

सोमबार साँझ प्रदीप पौडेल बूढानीलकण्ठ ३ मा मतदाताको घरदैलोमा थिए भने ईश्वर पोखरेल काठमाडौं ५ को, रञ्जु दर्शना टोखा ७ को घरदैलोमा ।

काठमाडौं– ५ मा काठमाडौं महानगरपालिकाका वडा २, ३, ४ र ५, बूढानीलकण्ठ नगरपालिकाका वडा ३,४,५,६ र ७ का साथै टोखा नगरपालिकाका २,३,४,५, ६ र ७ वडाहरू पर्छन् ।

यी क्षेत्रमा बढी मात्रामा बाहिरी जिल्लाबाट बसाइँ सरेर आएको जनसंख्या बढी छ । एकातर्फ दोलखा, रामेछाप, ओखलढुंगामा पुरानो घर भएका अर्कोतर्फ तनहुँ, लम्जुङ, कास्की । त्यस्तै नुवाकोट, धादिङलगायतका जिल्लाबाट बसाइँ सरेर आएका छन् । यहाँ मतदाताको संख्या पनि कम छैन ।

पौडेल तनहुँका स्थायी बासिन्दा हुन् । पोखरेलको पुरानो घर ओखलढुंगा हो । 'निर्वाचनको प्रचारका क्रममा मतदाताको के गुनासो पाउनुभयो' भन्ने प्रश्न हामीले प्रदीप पौडेललाई सोधेका थियौँ । संघीय सांसद र स्थानीय तहबीच समन्वय हुन सकेन भन्ने गुनासो, अति सामान्य काम पनि भएन भन्ने गुनासो र जितेर गएका व्यक्ति फर्केर आएनन् भन्ने गुनासो त्यस क्षेत्रका मतदाताहरूले गरेको उनले बताए ।

घरदैलोका क्रममा प्रदीपसँग गरिएको कुराकानी

हामीले आइतबार ईश्वर पोखरेलसँग कुराकानी गर्न त पाएनौँ । केही दिनअघि शिलापत्रको स्टुडियोमै गरिएको कुराकानीमा उनले आफू जनताको सुखदु:खमा हरपल सहयोग गरेकाले आफ्नो जित हुने आधार खुलाएका थिए ।

घर-दैलोकै क्रममा हामीले रञ्जु दर्शनासँग पनि कुरा गरेका थियौँ । उनले धेरै ठाउँ पैदल हिँड्दा थकित भए पनि मनबाट ऊर्जा बढेको प्रतिक्रिया दिएकी छिन् । तपाईंका लागि मुख्य चुनौती के हो भनेर प्रश्न गर्दा उनको भनाइ एजेन्डा बुझाउनै सामस्या परेको बताएकी छिन् ।

ईश्वर पोखरेलका लागि अब्बल पक्ष भनेको पार्टी शीर्ष नेता, स्थानीय तहबाट आएको मत परिणाम र पुरानो प्रतिद्वन्द्वीसँग प्रतिस्पर्धा गर्नु नपर्दा स्थायी उम्मेदवारका लागि लाभ नै छ । ६ महिनाअघि भएको स्थानीय तको निर्वाचनमा वडा अध्यक्षमा आएको मत परिणामले गठबन्धनभन्दा पनि उनी ३ हजार मतले अघि छन् । १५ वटा वडामध्ये ११ वटा वडा अध्यक्ष एमालेले जितेकाले पनि विजयी वडाध्यक्षको लाभ लिन सक्ने सुविधा ईश्वर पोखरेलसँग छ ।

प्रदीप पौडेलको अब्बल पक्षका रूपमा युवा उम्मेदवार र स्वच्छ छविलाई हेरिएको छ । 'पहिलोपटक प्रतिनिधिसभामा उम्मेदवार रहँदा पनि कसैलाई म प्रदीप पौडेल भनेर चिनाउनुपर्ने अवस्था छैन,' प्रदीप पौडेलको प्रचारमा जुटेका सुवास घिमिरे भन्छन् ।

प्रदीपलाई पार्टीको मत जोगाउन चुनौती देखिँदैन । सोही क्षेत्रबाट टिकट खोजेका स्वर्णिम वाग्ले पनि उनको प्रचारमा खुलेर लागेका छन् । यता विगतमा ईश्वरलाई नै पराजित गरेका नरहरि आचार्यसमेत अस्वस्थताका बीच प्रदीपको प्रचारमा जुटेका छन् ।

दर्शनाले भने जनतामा भएको राजनीतिक दलहरूप्रतिको नैरास्यताबाट लाभ लिन सक्ने देखिन्छ ।

सम्बन्धित समाचार