ब्याजदर घटाउन माग गर्दै उद्योगी–व्यवसायीहरू सडकमा, माइतीघरमा माैन प्रदर्शन

ब्याजदर घटाउन माग गर्दै उद्योगी–व्यवसायीहरू सडकमा, माइतीघरमा माैन प्रदर्शन

A+ A A-

ब्याजदर तत्काल घटाउन सरकारसँग माग गर्दै आएका उद्योगी, व्यवसायीहरूले सडक आन्दोलन सुरु गरेका छन् ।

नेपाल उद्योग वाणिज्य महासंघको नेतृत्वमा उद्योगी–व्यवसायीहरूले शुक्रबार काठमाडौंको माइतीघर मण्डलामा बैंक तथा वित्तिय संस्थाहरूले ब्याजदर दोब्बर गरेर आतंक फैलाएको भन्दै मौन विरोध प्रर्दशन गरेका हुन् ।

उनीहरूले मुलुकको उद्योग, व्यवसायलाई बचाउनका लागि एक अंकको ब्याजदर कायम गर्न र तत्कालका लागि लिलामी गर्ने नीतिगत व्यवस्था खारेज गर्न पनि सरकारको गम्भीर ध्यानाकर्षण गराएका छन् । विगत ६ महिना यतामात्रै ब्याजदर दोब्बर वृद्धि गरेर आफूहरू मारमा परेकाले सरकारकाविरुद्ध सडक आन्दोलन सुरु गर्न बाध्य हुनुपरेको महासंघका उपाध्यक्ष दिनेश श्रेष्ठले बताए ।

उनले स्वदेशी उद्योगी–व्यवसायीहरूलाई मारमा पार्ने काम बैंक तथा वित्तिय संस्थाहरूले गरेकाले मुलुकको अनधिकृत व्यापार फष्टयाएको भन्दै आक्रोश पाेखे । व्यवसायीहरूले सरकारद्वारा बैंकिङ तरलता, बैंक ब्याजदर लागत न्यूनिकरणका लागि सुझाव दिन गठित उच्च स्तरीय समन्वय समितिले कामै नगरेकामा पनि आक्रोश पोखेका छन् ।

उपाध्यक्ष श्रेष्ठले भने, ‘एक अंकले बढी नहुने गरी ब्याजदर कायम गर्न सरकारसँग माग गर्दछौँ । त्यसैगरी बैंक तथा वित्तिय संस्थाहरूले लिलामी गर्न नीतिगत व्यवस्था पनि तत्कालका लागि खारेज गर्न नेपाल सरकार, अर्थ मन्त्रालय, नेपाल राष्ट्र बैंक र बैंक तथा वित्तिय संस्थाहरूको गम्भीर ध्यानाकर्षण गराउँदछौँ । ६ महिना नपुग्दै बैंक तथा वित्तिय संस्थाहरूले दोब्बर ब्याजदर वृद्धि गरी आतंकित बनाएकोमा हामी आजित छौँ ।’

विरोध प्रर्दशनमा महासंघ अन्तरगतका सबै उद्योगी, व्यवसायीहरू सहभागी भएका थिए । उनीहरूले सेवा शुल्क कम गर्न, ब्याजदरमा स्थिरता कायम गर्न, एक अंक भन्दा बढी ब्याजदर नराख्न माग गर्दै प्ले कार्डहरू पनि प्रर्दशन गरेका थिए । महासंघले ब्याजदर घटाउनेलगायत माग राखेर अर्थमन्त्री जनार्दन शर्मा, नेपाल राष्ट्र बैंकलाई पनि ध्यानाकर्षण पत्र बुझाउने जनाएको छ ।

प्रकाशित मिति: शुक्रबार, कात्तिक १८, २०७९ १३:५०