सुरेन्द्र र विश्वको क्षेत्रमा गीत गाउँदै भोट मागिरहेका मिलन लामा बन्लान् त गेम चेन्जर ?

सुरेन्द्र र विश्वको क्षेत्रमा गीत गाउँदै भोट मागिरहेका मिलन लामा बन्लान् त गेम चेन्जर ?

A+ A A-

हे....
सधैँ कति आलु र तामालाई
यसपालि त भोट मिलन लामालाई ।

हे....
मतदाताले हेर्नुस् त यता
सधैँ कति उही पार्टी उही नेता ।

लोकदोहाेरी गायक मिलन लामाको दिन आजभाेलि घर–घर गएर यस्तै चुनावी गीत गाएर बित्दैछ । उनी प्रतिनिधिसभा सदस्यका लागि चितवन क्षेत्र नम्बर १ बाट स्वतन्त्र उम्मेदवार छन् । उनलाई निर्वाचन आयाेगले चुनाव चिह्न सूर्यमुखी फूल दिएकाे छ ।

लोकदोहोरी गायनक्षेत्रमा चर्चित लामा राजनीतिमा भने नयाँ अनुहार हुन् । चितवन क्षेत्र नम्बर १ मा उनी व्यक्तिगत रूपमा परिचित भए पनि उनको प्रतिस्पर्धा राष्ट्रियस्तरका हेभिवेट नेताहरूसँग छ ।

उनले निवर्तमान सांसद एवं एमाले उपाध्यक्ष सुरेन्द्र पाण्डे र सत्ता गठबन्धनका तर्फबाट कांग्रेस उम्मेदवार विश्वनाथ पौडेलकाे सामना गर्नुपर्नेछ । पार्टीका नेताहरूलाई पटक–पटक जिताएर पठाउँदा पनि जनताको जीवनमा केही फरक नपरेकाेभन्दै चुनावमा होमिएको उनी बताउँछन् ।

‘म गीत गाउने मात्र काम गर्दिनँ । समाज सेवा पनि गर्छु । दु:खी गरिबले मेरो घर भएन भाइ, कलेजको फि तिर्न सकिनँ दाइ, मेरो गोडाको स्टिल निकाल्न पैसा भएन दाइ भन्नेलाई विदेश गएर गीत गाएर अलि–अलि कमाएको पैसाले सकेको सहयोग गर्छु’, उनले भने, ‘मेरो घरमा दैनिकजसो सहयोग माग्न आउनुहुन्छ । मिलन लामाले हामीलाई केही गर्छ है भनेर मलाई आशा गर्नेको संख्या बढेको-बढ्यै छ । म ठाउँमा पुगे भने त उहाँहरूको लागि धेरै काम गर्न सक्छु ।’

लामाको भनाइ मान्ने हो भने उनका गाउँले, फ्यान र उनले सहयोग गरेका सयौँ व्यक्तिले आँखा चिम्लेर उनलाई भोट हाल्छन् । स्थानीय स्तरमा राम्रो भिजेका उनी थारु समुदायमै हुर्किएको भन्दा फरक पर्दैन । थारु भाषाको राम्रो दख्खल राख्ने लामा थारू समुदायमा जाँदा थारु भाषामै गीत गाएर भोट मागिरहेका छन् । त्यो उनलाई 'प्लस प्वाइन्ट' हुन सक्छ ।

व्यक्तिगत लोकप्रियताका कारण उनले केही हजार भोट ल्याए पनि चुनाव जित्न त्यति सहज भने छैन । तर, चुनावी अंकगणितमा गेम चेन्जर भने बन्न सक्ने अनुमान गरिएकाे छ । २०४८ को चुनावयता लगातार जसो एमालेले यो क्षेत्रमा चुनाव जित्दै आएको छ । यो क्षेत्रलाई एमालेको लालकिल्ला भन्दा पनि फरक पर्दैन । एमालेले यो क्षेत्रमा २०४८ सालमा जागृतप्रसाद भेटवाललाई चुनावी मैदानमा उतार्दा सफलता हात पारेको थियो । त्यसपछि २०५१ सालमा भएको मध्यावधि निर्वाचनमा पनि एमालेबाट भेटवाल नै निर्वाचित भए ।

एमाले विभाजन भएपछि भएको २०५६ सालको चुनावमा भने यो क्षेत्रबाट कांग्रेसकी सावित्री बोगटी निर्वाचित भएकी थिइन् । त्यसैगरी, २०६४ सालमा संविधानसभाको पहिलो निर्वाचनमा माओवादीले देशभर बलियो उपस्थिति देखाउँदा पनि यो क्षेत्रमा एमालेका उम्मेदवार लालमणि चौधरी निर्वाचित भएका थिए । २०७० को दोस्रो संविधानसभाको चुनावमा पनि एमालेका सुरेन्द्र पाण्डेले जितेका थिए ।

२०७४ सालमा भएको वाम गठबन्धनको तर्फबाट पनि पाण्डेले नै टिकट पाए । गठबन्धनका साझा उम्मेदवार पाण्डेले ५१ हजार ८० मत ल्याएका थिए । नेपाली कांग्रेसका राजेन्द्र बुर्लाकोटीले ३५ हजार ३ सय ६० मत प्राप्त गरेका थिए । पाण्डेले १५ हजार ७२० मतान्तरले बुर्लाकोटीलाई पराजित गरेका थिए ।

तर, यसपटक पाण्डेका लागि पाँच वर्षअघिजस्ताे सहज भने देखिँदैन । उनलाई यसपटक अघिल्लोचाेटि जस्ताे माओवादी केन्द्रको भोट आउँदैन भने एमाले विभाजनले पनि केही मत प्रभावित हुन्छ । त्यस्तै, मिलन लामाले पाउने अघिकांश भोट एमालेकै हुने विश्लेषण गरिएकाे छ । किनभने यस पटकको स्थानीय तहको निर्वाचनमा मिलन लामाको वडा नम्बर ९ काे वडाध्यक्षमा कांग्रेसका बागी उम्मेदवारले १ हजार ५ भोट ल्याएर जितेका थिए भने दोस्रो भएको एमाले र तेस्रो भएको समाजवादीको कुल मत १ हजार ३ सय ५४ मात्र छ । २०७४ सालको निर्वाचनमा यो भोट पाण्डेको पोल्टामा थियो ।

त्यसैगरी, यो क्षेत्रको ठूलो हिस्सा ओगट्ने खैरहनी नगरपालिकामा एमालेका पूर्वसांसद लालमणि चौधरीले नै खैरहनी नगरपालिकामा हार व्यहोरे र अघिल्लो पटक एमालेले जितेको रत्ननगर नगरपालिकामा एमालेकी उम्मेदवार तथा निर्वतमान उपमेयर विमला दवाडी पनि हारिन् । यसले पनि यो क्षेत्रमा एमालेले मतदाता जोगाउन नसकेको देखिन्छ ।

पाण्डेले अघिल्लोपटक १५ हजार ७२० मतान्तरले जिते पनि यो पटक माहौल त्यस्तो छैन । यसपटक नेकपा एकीकृत समाजवादी र माओवादीको भोट घटेकाे देखिन्छ । त्यस्तै, संसद् विघटनका बेला तत्कालीन प्रधानमन्त्री एवं एमाले अध्यक्ष केपी ओलीको विरुद्धमा लागेको कारण ओलीकाे परम्परागत गुटकाे पूरापूर सहयाेग नहुन सक्ने स्थिति पनि देखिँदैछ । त्यसाे भएमा एमालेकाे पूरै भाेटसमेत पाण्डेले नपाउन सक्छन् ।

समग्रमा हेर्दा यी सबैकाे फाइदा विश्व पौडेलले उठाउन सक्छन् । कांग्रेसमा एकाएक पाैडेल उम्मेदवार भएर आएपछि असन्तुष्टि नभएकाे हाेइन । राजेन्द्र बुर्लाकोटीले बागी उम्मेदवारी नै परेकाे थियाे । तर, असन्तुष्टिहरू घट्दै गएकाले पनि पाण्डेका लागि चुनाैती थपिएका छन् । पछिल्लो निर्वाचन हेर्दा समाजवादी र माओवादी कार्यकर्ता गठबन्धनप्रति इमानदार देखिएका छन् । गठबन्धनमा भएकै कारण पाैडेललाई यो पटक समाजवादीका कृष्णप्रसाद खनालको सर्मथन छ । उनी चितवन प्रदेशसभा १ (२) का उम्मेदवार पनि हुन् । खनाल यो क्षेत्रमा क्रियाशील नेताको रूपमा परिचित छन् ।

त्यस्तै, पौडेलले विद्यालय तह टाँडीस्थित नेपाल माध्यामिक विद्यालयमा अध्ययन गरेका हुन् । उनलाई र उनको परिवारलाई त्यो भेगको मान्छेले राम्रोसँग चिन्छन् । बरु पाण्डे राजनीतिमा स्थापित भइसकेपछि मात्र चितवनलाई कार्यक्षेत्र बनाएका हुन् ।

पौडेलको पपुलिस्ट भोट, माओवादीको भोट, समाजवादीको भोट र एमालेकै असन्तुष्ट भोटकाे बलमा पौडेल एमाले उपाध्यक्ष पाण्डेलाइ टक्कर दिँदैछन् । त्यसमाथि चितवन १ का एमालेको बाहुल्य रहेका बस्तीकाे भाेट मिलन लामाले तान्दा पाण्डे 'रेड जाेन' मा पनि पर्न सक्छन् । कांग्रेसभित्र पौडेललाई गैरराजनीतिक र टुरिस्ट उम्मेदवार भन्नेहरूकाे संख्या पनि कम छैन । त्याे मतले उनी अप्ठेराेमा परे चितवन १ बाट पाण्डेले ह्याट्रिक गर्ने सम्भावनालाई पनि नकार्न सकिँदैन ।

प्रकाशित मिति: शुक्रबार, कात्तिक १८, २०७९ ०७:२६