उम्मेदवारलाई फसाउने नियतले उजुरीहरू आएः आयुक्त भण्डारी

A+ A A-

निर्वाचन आयोगमा केही उजुरीहरू उम्मेदवारलाई फसाउने नियतका साथ आएको पाइएको छ । निर्वाचन आयुक्त रामप्रसाद भण्डारीले कतिपय उजुरीहरू अरुलाई फसाएर फाइदा लिने गरी झुटा विवरणहरूसहित आएको बताएका हुन् ।

सोमबार दिउँसो न्यूज एजेन्सी नेपालसँगको संक्षिप्त कुराकानीमा उनले आयोगमा सोसम्बन्धी १५० वटा उजुरी रहेको र करिब ५० वटा उजुरी भने कारबाहीका लागि योग्य रहेको बताए ।

‘१५० भन्दा बढी उजुरीहरू छन्, आचारसंहिता उल्लंघन भएका । कतिपय उजुरीहरू सत्यतामा आधारित छन् । कतिपय उजुरीहरू अरुलाई फसाएर फाइदा लिने प्रयोजनका लागि झुटा विवरणका उजुरीहरू पनि छन्,’ भण्डारीले भने, ‘त्यसो भएकाले आयोगले ती उजुरीहरूउपर पहिला के हो तपाइको तथ्यगत भनाइ भनेर उहाँलाई आफ्नो स्पष्टीकरण पेस गर्ने मौका दिएको हो । हामी त्यसलाई मात्रै प्रमाण राखेर हेर्दैनौँ ।’

निर्वाचन आयुक्त भण्डारीले विगतको निर्वाचनहरूमा भन्दा अहिले हुन गइरहेको निर्वाचनमा आचारसंहिता उलंघनको घटना कम देखिएको दाबी गरे ।

‘निर्वाचन आचारसंहीतामा धेरै उजुरीहरू परे, निर्वाचनको सन्दर्भमा आचारसंहिता उल्लंघन भइरहेको छ भन्ने छ । हामीले तुलनात्मक रूपमा विगतका निर्वाचन र अहिले भइरहेको र गत स्थानीय तहको निर्वाचन, तीन वटै निर्वाचनलाई समष्टिगत मूल्यांकन गरी हेरेका छौँ । तुलनात्मक रूपमा भन्नुपर्दा यो भन्दा अघिका निर्वाचनमा जुन अनुपातमा आचारसंहिता उल्लंघन हुन्थ्यो । सो अनुपातमा अहिलेको निर्वाचनमा आचारसंहीता उल्लंघनको घटना कम भन्ने आयोगको रेकर्डमा देखिन्छन्,’ भण्डारीले भने ।