चुनावपछि वर्तमान गठबन्धनको सरकार बन्नेमा 'कन्फिडेन्ट' छैन : एकीकृत समाजवादी

चुनावपछि वर्तमान गठबन्धनको सरकार बन्नेमा 'कन्फिडेन्ट' छैन : एकीकृत समाजवादी

A+ A A-

चुनावी घोषणापत्र सार्वजनिक कार्यक्रममा एकीकृत समाजवादीका महासचिव डा. वेदुराम भुसालले चुनावपछि अहिलेकै गठबन्धन कायम रहन्छ कि रहँदैन भन्न सक्ने अवस्था नरहेको बताए ।

‘निर्वाचनपछि गठबन्धन यही नै रहन्छ वा अर्को हुन्छ । कसैले भन्न सक्ने अवस्था छैन,’ उनले भने । भुसालले आफूहरू सरकारमा सहभागी भए घोषणापत्र कार्यान्वयन गर्ने बताए । सत्तारुढमध्येको ठूलो दल कांग्रेस आफ्नो नेतृत्वमा सरकार बनाउने रणनीतिमा छ ।

मंसिर ४ को चुनावपछि सरकार कसको बन्छ ? जनमतले तय गर्नेछ । ‘गठबन्धनको सरकार बन्छ त्यसमा दुविधा छैन । ताजा जनादेशले हामीलाई स्वीकार गरेन भने हामी प्रतिपक्षमा हुन्छौँ,' एकीकृत समाजवादीका उपमहासचिव डा. गंगालाल तुलाधरले भने, ‘सत्तामा रहेनौँ भने प्रतिपक्षमा हुन्छौँ । प्रतिपक्षमा रह्यौँ भने पनि घोषणापत्रको आधारमा योजनाहरू ल्यउँछौँ ।’

विगतमा गठबन्धन गरेर जाँदा दलहरू साझा घोषणापत्र लिएर चुनावी मैदानमा हुन्थे । तर, यो पटक सत्ता गठबन्धनका दलहरू छुट्टाछुट्टै घोषणापत्र लिएर चुनावी मैदानमा छन् । ‘घोषणापत्र आफ्नै बनाए पनि राष्ट्रिय स्वाभिमानको रक्षा संघीयता र स्थितरताको पक्षमा साझा सहमति भएको छ । गठबन्धनको साझा कार्यक्रमको आधारबाट घोषणापत्र बनेको छ,’ उपमहासचिव तुलाधरले भने ।

गठबन्धन सरकार बनेपछि सबैको घोषणापत्र समेटिने गरेर साझा नीति तय गरेको थियो । काजगबाट बाहिर जान नसकेको उक्त प्राथमिकता कार्यान्वयन भएन । विगतमा आफूहरूका प्रतिबद्धता कार्यान्वयन नभएको समाजवादीका उपाध्यक्ष राजेन्द्र पाण्डे स्वीकार्छन् ।

‘साझा प्रतिबद्धता गरेको थियो । साझा प्रतिबद्धतामा भनिएका कुरा गरिएन त्यो ठिकै भन्नुभयो । सरकारमा बस्दा सरकार ढल्छ कि भनेर बसेर हुँदैन,’ पाण्डेल शिलापत्रसँग भने, ‘सरकारबाट बाहिरिन पर्छ कि भनेर डराउनुभन्दा जनतका काम गर्न सकिएनकि भनेर डराएर काम गर्दा साझा घोषणापत्रका कामहरू धेरै गर्न सकिन्छ ।’

उनले बागमती प्रदेशको मुख्यमन्त्री हुँदा पार्टीको घोषणापत्रमा भएको काम अघि बढाइसकेको बताए ।

‘०४८ सालदेखि रासायनिक मल कारखाना स्थापना गर्ने ठोस काम भएका छैनन् । थाइल्याण्डको कम्पनीसँग वार्षिक दुई लाख मेट्रिक टन मल उत्पादन गर्ने गरी सम्झौता भएर तयारी सुरु भएको छ । जग्गा प्राप्तिको प्रक्रिया अघि बढेको छ । चुनावपछि त्यसको काम हुन्छ,’ उनले भने ।

बागमती प्रेदशका ११९ पालिकामध्ये प्रत्येक एक वडामा १ करोड बजेट विनियोजन गरेर वडा समाजवादी कार्यक्रम ल्याइएको उनले बताए । रोजगारी, शिक्षा र स्वास्थ्यलाई जोड दिइएको उनले बताए । प्रतिनिधिसभामा प्रत्यक्षतर्फ १९ सिटमा उम्मेदवारी दिएको पार्टीले १९ वटै सिट जित्ने उपाध्यक्ष पाण्डेले दाबी गरे ।

प्रकाशित मिति: सोमबार, कात्तिक १४, २०७९ १९:३७