७ करोड मतपत्र छपाइ सकियो, धमाधम जिल्ला-जिल्लामा पठाइँदै

A+ A A-

४ मंसिरमा हुने प्रतिनिधिसभा र प्रदेशसभा चुनावका लागि ८ करोड मतपत्र आवश्यक पर्नेमा सोमबारसम्म करिब ७ करोड मतपत्र छपाइ भएको छ ।

आयोगका अनुसार छपाइको काम अन्तिम चरणमा पुगेको छ । समानुपातिकतर्फ करिब ४ करोड र प्रत्यक्षतर्फ पनि करिब ४ करोड मतपत्र आवश्यक पर्नेछ । समानुपातिक निर्वाचन प्रणालीतर्फको मतपत्र यसअघि नै छपाइ भइसकेको छ ।

सोमबारसम्म प्रत्यक्षतर्फ २ करोड ८६ लाख ८८ हजार ५ सय मतपत्र छपाइ भएको छ । अब करिब एक करोड १४ लाख मतपत्र मात्र छपाइ गर्न बाँकी छ । छपाइ भएकामध्ये १ करोड २९ लाख ५३ हजार ५ सय प्रदेशसभा तथा १ करोड ४६ लाख ३५ हजार प्रतिनिधिसभाको मतपत्र रहेका छन् । जसमा प्रतिनिधिसभाका लागि ५० र प्रदेशसभातर्फ ४६ जिल्लाको मतपत्र समावेश छन् ।

धमाधम ढुवानी

निर्वाचन आयोगले छपाइसँगसँगै ढुवानी पनि गरिरहेको छ । मनाङ र मुस्ताङबाहेकका सबै जिल्लामा समानुपातिक निर्वाचन प्रणालीततर्फको मतपत्र ढुवानी सम्पन्न भएको छ भने पहिलो हुने निर्वाचित हुने प्रणालीतर्फ हालसम्म ७८ लाख ६५ हजार मतपत्र ढुवानी भएको छ । जसमा प्रतिनिधिसभाको मतपत्र ३९ लाख १९ हजार र प्रदेशसभाको मतपत्र ३९ लाख ४३ लाख रहेका छन् ।

प्रत्यक्षतर्फ सोमबारसम्म १६ वटा जिल्लाका मतपत्र ढुवानी भएको छ । ढुवानी भएका जिल्लाहरूमा कैलाली, कञ्चनपुर, अछाम, डोटी, डडेल्धुरा, बझाङ, बैतडी, दार्चुला, नवलपरासी पूर्व, नवलपरासी पश्चिम, बाँके, बर्दिया, जाजरकोट, कालीकोट, दैलेख र सुर्खेत रहेका छन् । हुम्ला, जुम्ला, डोल्पा, मुगु र बाजुरा जिल्लाका लागि सुर्खेतमा मतपत्र ढुवानी भएको छ । यी जिल्लामा सुर्खेतबाट हेलिकोप्टरमार्फत मतपत्र ढुवानी गरिने छ ।

आयोगले पहिलो हुने निर्वाचित हुने प्रणालीतर्फ प्रत्येक निर्वाचन क्षेत्रमा कायम रहेका दल वा उम्मेदवारको निर्वाचन चिह्न अंकित मतपत्र प्रयोग गर्ने भएकाले यो पटक निर्वाचन क्षेत्र अनुसार फरक-फरक मतपत्र प्रयोग हुनेछ । त्यस्तै समानुपातिक निर्वाचन प्रणालीअन्तर्गत प्रतिनिधिसभाका लागि देशभर एउटै मतपत्र प्रयोग हुनेछ । प्रदेशसभाका लागि भने प्रदेशमा कायम रहेका दलको संख्या अनुसार फरक-फरक मतपत्र प्रयोग हुनेछ ।

आयोगले ढुवानी भएका जिल्लाहरूमा अस्थायी मतदाताहरूका लागि प्रयोग हुने मतपत्रसमेत पठाएको छ । अस्थायी मतदाताको सूचीमा कर्मचारी, सुरक्षाकर्मी, कैदी, वृद्धाश्रमका व्यक्तिलगायतलाई समेटिएको छ । उनीहरूले समानुपातिक निर्वाचन प्रणालीतर्फ प्रतिनिधिसभाका लागि मात्र मतदान गर्न पाउने छन् । आयोगले १६ गतेसम्ममा गण्डकी, लुम्बिनी, कर्णाली र सुदूरपश्चिम प्रदेशका सबै जिल्लाहरूमा मतपत्र ढुवानी गरिसक्ने छ ।

प्रकाशित मिति: सोमबार, कात्तिक १४, २०७९ १७:४४