एकीकृत समाजवादीले ल्यायो दुईवटा नारा दिएर एकीकृत राजधानीको योजना

A+ A A-

एकीकृत समाजवादीले संघीय राजधानीका तीन जिल्लालाई एकीकृत राजधानी शहरको रूपमा विकास गर्ने योजना ल्याएको छ । सोमबार सार्वजनिक गरिएको प्रतिनिधिसभा र प्रदेशसभा चुनावको घोाषणापत्रमा स्वच्छ, सुन्दर र आधुनिक राजधानी काठमाडौँ, ललितपुर र भक्तपुर जिल्लाहरूलाई एकीकृत राजधानी शहरका रूपमा विकास गरी सुन्दर, स्वस्थ, स्वच्छ तथा पर्यावरणमैत्री ऐतिहासिक सम्पदा शहरका रूपमा विकास गर्न पहल गरिने उल्लेख छ ।

एकीकृत राजधानीको लागि घोषणापत्रमा दुईवटा नारा दिइएको छ । ‘हरित शहर, राम्रो शहर’ र ‘मेरो शहर, म बनाउछु’ भन्ने नारा दिइएको छ । ‘हरित शहर, राम्रो शहर’ अवधारणा अनुसार सडकहरूको दायाँ–बायाँ फल–फूलका बिरुवा लगाई सडकको सौन्दर्य बढाउने र तिनको संरक्षण गरी राजधानीलाई हरियाली शहरको रूपमा विकास गर्ने व्यवस्था मिलाउन पहल गरिने घोषणापत्रमा उल्लेख गरिएको छ । त्यस्तै, ‘मेरो शहर, म बनाउछु’ भन्ने उद्घोषका साथ सफा, सुरक्षित र सभ्य शहर बनाउन पहल गरिने घोषणापत्रमा उल्लेख छ ।

ऐतिहासिक तथा पुरातात्विक संरचना र वस्तीहरूलाई संरक्षित गर्ने, अव्यवस्थित संरचनालाई उचित मुआब्जा दिई अधिग्रहण गर्ने, राजधानीलाई फोहोर, धुलो, हिलो र प्रदूषणमुक्त बनाउन, राजधानीका नदी, खोला–नाला र तालमा ढल र फोहोर पानी मिसाउन प्रतिबन्ध लगाने, वाग्मती, विष्णुमती, मनोहरा, हनुमन्तेलगायत नदी र खोलाहरू सफा एवं स्वच्छ राख्ने, पशु छाडा छोड्न रोक लगाउने र पेट्रोलियम वाहनहरूलाई विद्युतीय वाहनमा परिणत गर्ने व्यवस्था मिलाउन प्रयास गरिने पनि घोषणापत्रमा लेखिएको छ ।

प्रकाशित मिति: सोमबार, कात्तिक १४, २०७९ १५:४७