जनकपुरमा यसरी मनाइयो छठ पर्व, हेलिकोप्टरबाट पुष्प वृष्टि (फोटो फिचर)

A+ A A-

लोकआस्थाको पर्वको रूपमा प्रसिद्ध छठ पर्व आइतबार धुमधामका साथ तराई मधेसका जिल्लाहरूमा मनाइँदैछ । यसै क्रममा जनपुरधाममा पनि छठ पर्व धुमधामका साथ मनाइँदैछ ।

श्रद्धालु भक्तजनहरूले घरनजिकको पोखरी, नदी तथा जलाशयक्षेत्रमा घाट बनाई छठ पर्व मनाइरहेका छन् । छठ पूजाका लागि जनकपुरधामका गंगासागर, धनुष सागर, दशरथ तलाउ, अगजासरलगायतका प्रमुख पोखरीमा घाट निर्माण गरिएको छ । ती घाटहरूमा विद्युतीय बत्ती बालेर झिलीमिली पारिएको छ ।

छठ पूजाका लागि पोखरी, नदी तथा जलाशयक्षेत्रमा निर्माण गरिएका घाटमा श्रद्धालु भक्तजनहरूले नयाँ–नयाँ वस्त्र लगाएर बाँसको चोयाबाट बनाइएको सुपली र माटोको ढकनीमा उखु, काँचो केरा, कागती, ठेकुवा, बोडी, अदुवाको बोट, स्याउ, जटा नरिवल, भिजाएको केराउ, पातसहितको मूलालगायतका फलफूल र प्रसाद राखेर अर्घ दिने गर्छन् ।

छठ पर्व मनाउने महिला वा पुरुष व्रतालुले औँसी तिथि लागेसँगै माछामासु वा मांसहारी भोजन त्याग गर्छन् । तिहारको चौथौ दिन नित्यकर्मपछि व्रतमा बस्नेहरूले शुद्ध साकाहारी खाना, खीर, दूध केरा मात्र खान्छन् । पञ्चमी तिथिमा दिनभरि निराहारपछि राति पूजा गरिने यस दिनलाई खरना भनिन्छ । षष्टीका दिन व्रत बसिन्छ र व्रत बस्नेहरूले अन्न जल ग्रहण गर्दैनन् ।

व्रतालुहरूले बिहानैदेखि छठका लागि भुस्वा, टकुवा, लड्डुलगायतका परिकारहरू तयार पार्छन् । ती सबै परिकारहरूलाई बाँसको डालोमा राखी सूर्यास्त हुनुभन्दा अगावै कुनै जलाशय, नदी वा पोखरीमा छठ पूजा गरिन्छ । करिब ४० घण्टासम्म भोकै बस्ने व्रतालुहरूले घन्टौँसम्म पानीमा उभिएर अस्ताउँदो सूर्य र उदाउँदो सूर्यलाई अर्घ दिन्छन् ।

केही दशकअघि नेपालको तराई र भारतका विहार, उत्तर प्रदेशलगायतका राज्यहरूमा मनाइने यो पर्व पछिल्लो समय काठमाडौंसहित नेपालका पहाडी जिल्लाहरूमा समेत मनाउन थालिएको छ ।

छठ धार्मिक आस्थाको पर्व भएकाले यसको लोकप्रियता दिनानुदिन बढ्दै गएको साहित्यकार उपेन्द्र भगतनागवंशी बताउँछन् । छठ पर्वलाई पण्डा, पुरोहित तथा वेदान्तीहरूको आडम्बरी प्रथाबाट मुक्त राखी विशुद्ध रूपमा सनातनी लोकपर्वका रूपमा मनाइनुपर्ने उनको भनाइ छ ।

यसैबीच, राजा समर्थक राष्ट्रियवादी नागरिक एकता समाजले आइतबार छठ पर्वको अवसरमा हेलिकोप्टरबाट पुष्प वृष्टि गरेको छ । छठ पर्वको अवसरमा प्रधानमन्त्री पत्नी आरजु राणा पनि जनकपुर आइपुगेकी छन् । आज आइतबार दिउँसो जनकपुर आइपुगेकी उनले गंगासागर पोखरीमा पुगेर छठीमाताको पूजापाठ गरी अर्घ दिइन् ।