किन रोकियो निर्वाचन आयुक्त भण्डारीको भारत भ्रमण ?

A+ A A-

निर्वाचन आयोगका आयुक्त रामप्रसाद भण्डारीको भारत भ्रमण अन्तिम समयमा रोकिएको छ । प्रजातन्त्र र निर्वाचनसम्बन्धी गाेष्ठीमा भाग लिन भारत जाने तयारीमा रहेका भण्डारीलाई सरकारले स्वीकृति नदिएपछि भ्रमण रोकिएको हो ।

आयोग स्रोतले भन्यो, ‘भारतको निर्वाचन आयोगले बोलाएको थियो । तर, सरकारबाट स्वीकृति नपाएकाले उहाँको भ्रमण रोकिएको हो ।’

तर, आयुक्त भण्डारी भने प्रक्रिया ढिला भएकाले रोकिएको बताउँछन् । ‘सरकारले स्वीकृति नदिएर होइन । अर्थ मन्त्रालय जानुपर्ने थियो । अर्थमन्त्री र सचिव बाहिर भएकाले प्रोसेसमा ढिला भयो । त्यही भएर रोकिएको हो,’ उनले भने ।

यता प्रधानमन्त्री कार्यालयले पनि आयुक्त भण्डारीको भ्रमणबारे कुनै एजेन्डा नआएको बताएको छ । ‘भ्रमणबारे कुनै एजेन्डा आएको छैन,’ मुख्य सचिव शंकरदास वैरागीले भने ।

निर्वाचनको मिति नजिकिएकाले उनी नगएको आयोगको भनाइ छ । आयुक्त भण्डारी निर्वाचन आचारसंहिता समितिको प्रमुखसमेत रहेका कारण उनको सट्टा कर्मचारीलाई पठाइएको छ ।

उक्त कार्यक्रममा सहभागी हुन आइतबार आयोगका उपसचिव कमल भट्टराई भारत गएका छन् । ‘आयुक्त भण्डारी जान नपाएपछि उपसचिव जानुभएको हो,’ आयोग स्रोतले भन्यो ।

तर, प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल 'प्रचण्ड' र एकीकृत समाजवादीका अध्यक्ष माधवकुमार नेपाललगायतका नेताले हेलिकोप्टर चढेर चुनावी प्रचारप्रसार गरेको भन्दै आयोगले स्पष्टीकरण सोधेको थियो । सोही प्रकरणपछि आयोग र सत्तारुढ दलहरूबीच तिक्तता बढेकाले आयुक्त भण्डारीको भ्रमण रोकिएको आयोग स्रोतको दाबी छ ।

भारतले नेपाललाई निर्वाचन सामग्रीसमेत हस्तान्तरण गर्ने तयारी छ । भारतको निर्वाचन आयोगले एक आयुक्तलाई नै पठाउन भनेको थियो । त्यसैले आयुक्त भण्डारी भारत जाने कार्यतालिका थियो ।

प्रकाशित मिति: सोमबार, कात्तिक १४, २०७९ १५:३८