स्वर्णिम वाग्लेको दाबी- कांग्रेसको घोषणापत्र यथार्थपरक छ

A+ A A-

नेपाली कांग्रेसका नेता डा. स्वर्णिम वाग्लेले पार्टीको घोषणापत्र यथार्थपरक रहेको दाबी गरेका छन् ।

शनिबार पार्टी केन्द्रीय कार्यालयमा आयोजित निर्वाचन घोषणापत्र सार्वजकि कार्यक्रममा वाग्लेले वास्तविकताप्रति बलियो चेत भएको संकल्पपत्र भएको बताए । दिगो विकासका लक्ष्यसँगको तादात्म्यता मिल्ने गरेर संकल्पपत्रमा विकासका लक्ष्यहरू राखिएको उनको भनाइ छ ।

युवा बेरोजगारीको नैराश्यता चिर्नका लागि आर्थिक वृद्धिका नयाँ श्रोतहरूको विषयलाई प्राथमिकता दिएको पनि वाग्लेले बताए । घोषाणापत्रमा डिजिटलाइजेशन, स्वदेशी उत्पादन, नीतिगत सुधारका विषय र वार्षिक करिब अढाइ लाख नयाँ रोजगारी सिर्जना गर्नसक्ने विश्वसनियताका आधारहरू समावेश गरेको उनको भनाइ छ ।

‘घोषणापत्रमा मनगढन्ते कुराहरू राखिने गरिन्छ भन्ने आरोप लागेको छ । तर, हामीले यसपालि असाध्यै यथार्थपरक कुराहरू मात्रै राखेका छौँ । वास्तविकताप्रति बलियो चेत भएको संकल्पपत्र राखेका छौँ,’ वाग्लेले भने, ‘दिगो विकासका लक्ष्यसँगको तादात्म्यता मिल्ने गरेर संकल्पपत्रमा विकासका लक्ष्यहरू राखेका छौँ ।’

पार्टीको घोषणापत्रमा तात्कालिक आर्थिक एजेण्डाका रूपमा ५ वटा विषयहरू समावेश गरेको उनको भनाइ छ । जसमा आयत, वाह्य असन्तुलनको विषय, कर्जा र तरलता, मुद्रास्फितिको विषयहरू रहेका उनले बताए । मुद्रास्फितिको विषय आगामी सरकार बनेको ६ महिनाभित्र समाधान हुने उनको दाबी छ ।