कांग्रेसको संकल्प : एक वर्षभित्र शिक्षा ऐन ल्याउने, शिक्षालाई राजनीतिक हस्तक्षेपबाट मुक्त गर्ने

कांग्रेसको संकल्प : एक वर्षभित्र शिक्षा ऐन ल्याउने, शिक्षालाई राजनीतिक हस्तक्षेपबाट मुक्त गर्ने

A+ A A-

नेपाली कांग्रेसले शैक्षिक क्षेत्रलाई राजनीतिक हस्तक्षेपबाट मुक्त गर्ने संकल्प गरेको छ । कांग्रेसले आगामी मङ्सिर ४ गते हुने प्रतिनिधिसभा र प्रदेशसभा सदस्य निर्वाचनका लागि पार्टीको संकल्प पत्रमा शैक्षिक क्षेत्रलाई राजनीतिक हस्तक्षेपबाट मुक्त गर्ने उल्लेख गरेको हो ।

‘शैक्षिक क्षेत्रलाई राजनीतिक हस्तक्षेपबाट मुक्त गर्दै संघीय शिक्षा ऐनमा उचित व्यवस्था गरिने छ,’ कांग्रेसको संकल्प पत्रमा भनिएको छ । कांग्रेसले आगामी ५ वर्ष आफ्नो सरकार बनेमा १ वर्षभित्र संघीय शिक्षा ऐन ल्याउने उल्लेख गरेको छ । लामो समयदेखि संघीय शिक्षा ऐन बनेको छैन । संघीय शिक्षा ऐन नबन्दा शैक्षिक कार्यक्रम केन्द्र, प्रदेश र स्थानीय कसले सञ्चाल गर्ने भन्ने विवाद छ ।

अरु के–के छ ?

–१५–२४ बर्ष उमेर समूहका महिलाको साक्षरता दर ९२ प्रतिशत रहेकोमा यसलाई ९५ प्रतिशत पुर्‍याइने छ ।

–विद्यालयमा हाल २८ प्रतिशत इन्टरनेट सेवा पुगेकोमा आगामी ५ वर्षमा ८० प्रतिशत विद्यालयमा यस्तो सेवा पुर्‍याइ प्रविधियुक्त सिकाइलाई महत्व दिइने छ ।

–कक्षा ११ मा भर्ना हुने दर कम्तीमा ५० प्रतिशत पुर्‍याइने छ भने माध्यामिक तहको परीक्षा प्रणालीलाई एकीकृत गरिने छ ।
–शैक्षिक क्षेत्रलाई राजनीतिक हस्तक्षेपबाट मुक्त गर्दै संघीय शिक्षा ऐनमा उचित व्यवस्था गरिने छ ।

–वैज्ञानिक पद्धति मार्फत् जनसंख्या, भूगोल र विद्यार्थी संख्याको आधारमा हाल सञ्चालनमा रहेका विद्यालय र उच्च तहका शैक्षिक संस्थाको नक्साङ्कन गरी आवश्यकता अनुसार थप स्थानान्तरण र एक–आपसमा समाहित गर्दै दक्ष शिक्षक र कर्मचारीको व्यवस्था गरिने छ ।

–विद्यालय शिक्षाको संरचनालाई बालबालिकाको मनोविज्ञानको आधारमा परिवर्तन गर्न बालकक्षादेखि कक्षा ३ सम्म पूर्व आधारभूत तहलाई पहिलो प्राथमिकतामा राखी कक्षा ४ देखि ८ सम्म आधारभूत तह र कक्षा ९ देखि १२ सम्म माध्यामिक तहका बनाइने छ ।
–संविधानको मर्म बमोजिम निःशुल्क शिक्षाको प्रत्याभूति गर्नका लागि भौचर लगायत व्यवस्था गरी गुणस्तरीय शिक्षामा सबैको पहुँच पुर्‍याइने छ ।