सुनसरी–१ मा हर्क साम्पाङ फ्याक्टर कति निर्णायक ?

A+ A A-

गत असोज २ गते । धरानको गणेशमान चोक । हर्क साम्पाङको टिमको स्वतन्त्र उमेदवारी घोषणा गर्ने भनेर पत्रकारहरूलाई बोलाइएको थियो । त्यही दिन हर्क साम्पाङको टिमबाट सुनसरीको क्षेत्र नम्बर १ को प्रतिनिधिसभा र प्रदेशसभाको लागि स्वतन्त्र उमेदवारीको घोषणा गरियो ।

मेयर साम्पाङको श्रमदान अभियानको सदस्य रहेको बताउँदै तीन जनाले प्रतिनिधि र प्रदेशसभामा उमेदवारी घोषणा गरेका थिए । प्रतिनिधिसभामा तर्कबहादुर मगर अनि क्षेत्र नम्बर एकको (क) प्रदेशसभामा समिर तामाङ र (ख) मा हेमचन्द्र राईले स्वतन्त्र रूपमा चुनावमा उठ्ने घोषणा गरे ।

स्वतन्त्र रूपमा धरान उपमहानगरको मेयर जितेका हर्कराज साम्पाङको टिमबाट भनेपछि प्राय पत्रकार पुगेका थिए । तर, उमेदवारी घोषणा गर्ने दिन भने साम्पाङ सभामा देखिएनन् । साम्पाङ सभामा नदेखिए पनि प्रतिनिधि र प्रदेशसभामा उठेका तीनै जना उमेदवारले भने आफूहरूलाई हर्क साम्पाङको समर्थन रहेको बताउँदै आएका छन् ।

स्वतन्त्र रूपमा चुनाव उठ्नेलाई सहयोग रहने बताउँदै आए पनि साम्पाङले अहिलेसम्म कसैको पक्षमा भोट मागेको देखिँदैन । हर्क साम्पाङको समूह भनेर उम्मेदवारी दिएकाहरू साम्पाङको नियमित श्रम अभियानको सहभागी भने हुने गरेका छन् ।

स्वतन्त्रको ताँतीः हर्कको समर्थन कसलाई ?

धरान उपमहानगरको मेयरमा हर्क साम्पाङ स्वतन्त्र निर्वाचित भएपछि सुनसरी क्षेत्र नम्बर एकको आसन्न निर्वाचनमा स्वतन्त्रहरूको लर्को नै लागेको छ । प्रतिनिधिसभा निर्वाचनमा अहिले २० जना प्रतिस्पर्धी मैदानमा छन् । ती मध्ये ११ जनाले स्वतन्त्र उमेदवारी दिएका छन् ।

हुन त सुनसरी क्षेत्र नम्बर एकमा धरान मात्र छैन । बराहक्षेत्र नगरपालिकाको ५ वटा वडा र रामधुनी नगरपालिकाको २ वटा वडासमेत सुनसरी १ मा पर्छ । सुनसरी १ मा रहेका कुल १ लाख ४१ हजार ८७८ मतदाता मध्ये धरान उपमहानगरभित्र मात्र १ लाख ४ हजार ११८ मतदाता छन् । अर्थात धरानको मतदाता यो क्षेत्रको लागि निर्णायक हो । धरानको बहुसंख्यक मतदाता हुँदा सुनसरी क्षेत्र नम्बर एकमा धरानका मेयर साम्पाङको पक्षधरताले निर्वाचनमा समेत प्रभाव पक्कै पर्छ ।

तर, स्वतन्त्र उमेदवारहरूको लर्कोका बीच हर्कले आफ्नो धारणा दिएका छैनन् । आफ्नो नाम देखाउँदै भोट मागेको विषयमा साम्पाङ आफैँ पनि दिक्क रहेको देखिन्छ । गत असोक २९ गते सामाजिक सञ्जाल फेसबुकमा साम्पाङले लेखेको स्टाटसले समेत उनी दिक्क रहेको बुझिन्छ ।

आफ्नो नाम जोडेर भोट माग्न थालेपछि उनले त्यसो नगर्न आग्रह गरेका छन् । उनले लेखेका छन्– कृपया, कोही कसैले मेरो नाम जोडेर भोट माग्ने काम नगर्नु होला । मैले कसैलाई आफ्नो उम्मेदवार घोषणा गरेको छैन ।

बागी स्वतन्त्रको तनाव, हर्कलाई आफ्नो बनाउने दाउ

अघिल्लो प्रतिनिधिसभाको निर्वाचनमा उमेदवारविहीन भएको नेपाली कांग्रेस यो पटक पनि सुनसरी १मा उमेदवारविहीन छ । अघिल्लो पटक जसपाका अशोककुमार राईलाई सघाएको कांग्रेसले यो पटक भने माओवादीलाई सघाएको छ । सत्ता गठबन्धनभित्र रहेको कांग्रेसले यो पटक माओवादी केन्द्रका मुक्साहाङ मेन्यान्ब्योलाई समर्थन गरेको छ ।

कांग्रेस मात्र हैन, ०४८ पछि प्रायः प्रतिनिधिसभा निर्वाचन जितेको एमालेको सूर्यमा समेत सुनसरी एकका मतादाताले यसपटक प्रतिनिधिसभाको निर्वाचनमा यो पटक भाेट खसाल्न पाउने छैनन् । विपक्षी गठबन्धनमा रहेको एमालेले जसपाका अशोककुमार राईलाई समर्थन गरेको छ । अघिल्लो पटकको निर्वाचनमा एमालेका जयकुमार राईले पराजित गरेका अशोकलाई नै एमाले यो पटक समर्थन गरेको हो ।

कांग्रेससहितको सत्ता गठबन्धनमा रहेको बेला समेत जसपाका अशोक राईले टिकट पाउने लगभग पक्का देखिको थियो । त्यहीकारण पनि कांग्रेसमा यो पटक पनि कोही अन्य उमेदवारको चर्चा भएको थिएन । तर, अन्तिम समयमा जसपाले एमालेसँग गठबन्धन गरेपछि सत्ता गठबन्धनले माओवादीलाई टिकट दिएको थियो ।

तर, विपक्षीको रूपमा रहेको एमालेले जसपासँग तालमेल गरेपछि भने एमालेका केही नेताहरू रुष्ट बनेका थिए । एमालेले जयकुमार राईलाई सर्वसम्मत रूपमा पठाए पनि जसपालाई समर्थन गरेको भन्दै एमाले नेता मनोजकुमार मेन्यान्ग्बोले स्वतन्त्र उमेदवारी दिएका छन् ।

दुई ठूला दलहरूको आफ्नै उमेदवार नभएपछि दुवै दलका तल्लो तहका कार्यकर्ता तथा शुभचिन्तकलाई स्वतन्त्र उमेदवार मनोजकुमार मेन्यान्ग्बोले आफ्नो पक्षमा 'कन्भिन्स' गर्दै आएका छन् । दलका शुभचिन्तकमा नै फ्याक्टर देखिए पछि हर्कलाई मनोजले कन्भिन्स गर्न खोजेका छन् ।

मनोज मात्र हैन, अन्य उमेदवारहरू समेत हर्कको ग्रिन सिग्नलको लागि प्रयास गरिरहेका छन् । केही समयअघि माओवादी केन्द्रका अध्यक्ष प्रचण्ड आएर हर्कको श्रम अभियानको प्रशंसा गरेका थिए । माओवादीले गरेको जस्तै क्रान्तिमा साम्पाङ लागेकोमा प्रचण्डले खुसीसमेत व्यक्त गरेका थिए । त्यतिमात्र होइन, काठमाडौं पुगेका हर्कले प्रचण्डनिवास खुमलटारमा पुगेर लामै संवाद पनि गरेका थिए । त्यसमाथि धरानको उपमयेर पनि माओवादीबाटै निर्वाचित भएकोले हर्कको समर्थन माओवादी उम्मेदवारले लिन खोजिरहेका छन् ।

माओवादी मात्र हैन, विपक्षी गठबन्धनका अशोक राईले समेत हर्कको साथ खोजेको देखिन्छ । पछिल्ला भाषणहरूमा समेत अशोक राईले मेयरले गरेको कामलाई थप प्रोत्साहित गर्नुपर्ने बताउँदै आएका छन् । खानेपानीको सवालमा मेयर साम्पाङले गरेको कामलाई केन्द्रमा गएर समन्वयकारी भूमिका आफूले खेल्ने आश्वासन अशोकले दिइरहेका छन् ।

धरान उपमहानगपालिकाका बलियो प्रभाव राख्न सकेका हर्कको ग्रिन सिग्नल पाउने उम्मेदवार विजयी हुने संभावना हुनसक्छ । राजनीतिमा चतुर खेलाडीकै रूपमा देखिएका हर्कले पनि आफ्नो प्रभाव रहनसक्ने गरी उम्मेदवार रोजेर ग्रिन सिग्नल दिन सक्छन् । अर्थात, भोलिका दिनमा आफू प्रभावी हुन सक्ने उम्मेदवारलाई समर्थन गर्दा आउन सक्ने सहयोगको हिसाबकिताब गरेर नै हर्कले निर्णय लिने अनुमान गरिएकाे छ । जित्न सक्ने उम्मेदवारलाई समर्थन गर्दा नै हर्कका लागि फाइदा हुने पनि टिप्पणी भइरहेको छ । त्यसकारणले पनि, सुनसरी १ मा अशोक राई, मुक्साहा मेन्यान्ग्बो र मनोजकुमार मेन्यान्ग्बोमध्ये एक जनालाई समर्थन सक्ने विश्लेषण भइरहेको छ ।

प्रकाशित मिति: शनिबार, कात्तिक १२, २०७९ ०८:१५