माओवादी केन्द्रले आफ्नै उम्मेदवार छाडेर स्वतन्त्र बोकेपछि बाँके ३ मा गठबन्धनलाई तनाव

माओवादी केन्द्रले आफ्नै उम्मेदवार छाडेर स्वतन्त्र बोकेपछि बाँके ३ मा गठबन्धनलाई तनाव

A+ A A-

बैजनाथ गाउँपालिकास्थित सम्झना चोकमा शुक्रबार सत्तारुढ गठबन्धनले प्रचारप्रसार कार्यालय खोल्यो । कार्यालय उद्घाटनको ब्यानरमा बाँके ३ का गठबन्धनका उम्मेदवार कांग्रेस सहमहामन्त्री किशोरसिंह राठौरसँगै प्रदेशसभा ३ (१) का स्वतन्त्र उम्मेदवार दलबहादुर सुनारको पनि तस्वीर राखिएको छ ।

सत्तारुढ गठबन्धनका तर्फबाट बाँके ३ मा प्रतिनिधिसभा सदस्यका लागि कांग्रेसका राठौर, प्रदेशसभा ३(१)मा माओवादी केन्द्रका आईपी खरेल र ३(२) मा कांग्रेसका बादशाह कुर्मी उम्मेदवार तय भएका थिए । गठबन्धन दलहरूमध्ये बाँके ३(१) नेकपा एकीकृत समाजवादीले दाबी गर्दैआएको थियो । लुम्बिनी प्रदेशसभा सदस्यमा एक जना पनि उम्मेदवार नपाएपछि एकीकृत समाजवादीका पोलिटब्युरो सदस्य एवं प्रदेश सह–इन्चार्ज सुनारले स्वतन्त्र उम्मेदवारी दिएका थिए । बाँके ३ को चुनावी राजनीतिमा ‘ट्वीस्ट’ त्यतिबेला आयो, जब सुनारलाई माओवादी केन्द्र प्रवेश गराएर गठबन्धनको साझा उम्मेदवारका रूपमा अघि बढाइयो ।

७ कात्तिकमा माओवादी केन्द्रको प्रदेश निर्वाचन कमिटी ३ (१) संयोजक दीपेन्द्र शाह युगान्त, सचिव महेन्द्रबहादुर शाही, बैजनाथ गाउँपालिका कमिटी अध्यक्ष जयबहादुर विश्वकर्मा र खजुरा गाउँपालिका अध्यक्ष राजकुमार विकले संयुक्त प्रेस विज्ञप्ती जारी गर्दै सुनार पार्टीको आधिकारिक उम्मेदवार भएको दाबी गरे । त्यस लगत्तै, सो क्षेत्रमा सत्तारुढ गठबन्धनका कार्यक्रममा प्रतिनिधिसभा सदस्य उम्मेदवार राठौरसँगै सुनार पनि देखिन थाले ।

आईपी खरेल र सुनारमध्ये कसलाई आधिकारिक उम्मेदवार बनाउने भन्नेमा माओवादी केन्द्र पूरै विभाजित छ । खजुरा गाउँपालिका अध्यक्षसमेत रहेका जिल्ला संयोजक डम्बर बिक ‘तुफान’ र सचिव डिल्ली बराल ‘अमिर’ खरेलको उम्मेदवारी निष्क्रिय बनाएर सुनारलाई आधिकारिक उम्मेदवार बनाउने पक्षमा छन् । उनीहरूलाई खजुरा र बैजनाथ गाउँ कमिटी अध्यक्षद्वय विकले साथ दिइरहेका छन् ।

जिल्लाबाट सिफारिसमा समेत नपरेका खरेललाई पार्टीले उम्मेदवार बनाएको भन्दै प्रदेश निर्वाचन कमिटी ३ (१) संयोजक दीपेन्द्र शाह युगान्त, सचिव महेन्द्रबहादुर शाहीले २५ असोजमै पार्टी जिम्मेवारीबाट राजीनामा दिएका थिए । त्यसमा विकद्वयको पनि ऐक्यबद्धता थियो ।

माओवादी केन्द्रका आधिकारिक उम्मेदवार खरेल लुम्बिनी प्रदेशसभाका निवर्तमान सदस्य हुन् । अन्तरपार्टी संघर्षका बेला उनी तत्कालीन नेता रामबहादुर थापा बादलनिकट थिए । एमाले र माओवादी केन्द्र एकतापछि उनी नेकपाका जिल्ला अध्यक्षसमेत बने । तर, दुई पार्टी छुट्टिँदा बादल एमालेमै बसेपछि माओवादी केन्द्रमा रहेका खरेल अन्तरपार्टी संघर्षमा एक्लिए । खासगरी, पार्टी जिल्ला संयोजक तुफानसँग तिक्ततापूर्ण सम्बन्धले अहिले आधिकारिक उम्मेदवार हुँदासमेत सिंगो पार्टी उनको पक्षमा उभिन नसक्ने स्थिति बन्यो ।

पार्टीका केही नेताले स्वतन्त्र उम्मेदवार सुनारलाई गठबन्धनको आधिकारिक उम्मेदवार भन्दै प्रचारप्रसार मात्र होइन, भेला र बैठकमै सहभागी गराएपछि ८ कात्तिकमा आधा दर्जन धेरै केन्द्रीय सदस्यहरूको बैठकले पार्टी निर्णयबाहिर जानेहरूले गल्ती गरेको निष्कर्षसहित निर्णय पालना गर्न अपिल गरेको थियो । सो बैठकमा केन्द्रीय सदस्यहरू खरेल, पूर्णाकुमारी सुबेदी, महेश्वर गहतराज ‘अथक’, पार्वती पुन, कृष्णा केसी, नरेन्द्र न्यौपाने, अन्जना चौधरी र केन्द्रीय अनुशासन आयोगका सचिव अशोक रोकाय सहभागी थिए । जिल्ला संयोजक तुफान र सचिव बरालले निर्णय पालना नगरे बाँके इन्चार्ज सुवेदीलाई निर्वाचन परिचालनको नेतृत्व दिने निर्णय भए पनि कार्यान्वयन भएन ।

‘केही साथीहरूले पार्टीविरोधी पाखण्डी काम गरेका छन् । त्यसको समीक्षा इतिहासमा गरिनेछ,’ उम्मेदवार खरेलले भने, ‘माओवादी केन्द्रको आधिकारिक उम्मेदवार हुँदाहुँदै किन स्वतन्त्रलाई बोकेको भनेर मैले किशोरसिंह राठौरलाई भनेको छु । त्यसो गर्न लागियो भने त्यसको नतिजा गम्भीर हुन्छ भनिएको छ ।’

कांग्रेस उम्मेदवार राठौरले ‘तपाईंहरू मिलेर आउनुस् न’ भनेका छन् । तर, आधिकारिक उम्मेदवारलाई बाहिरै राखेर स्वतन्त्र उम्मेदवार सुनारसँग चुनावी मञ्च साझा मात्र गरिरहेका छैनन्, प्रचारप्रसारका लागि खोलिएका कार्यालयमा पनि आफूसँगै स्वतन्त्र उम्मेदवारको तस्वीर राखेका छन् ।

माओवादी केन्द्रका उम्मेदवार खरेलले पार्टीको निर्णयअनुसार मनोनयन गराएर पार्टीको चिह्नबाट चुनाव लड्दा पनि आधिकारिकको किचलो निकालेर पार्टीलाई कमजोर बनाउने र आफूलाई एक्ल्याउने कोसिस भएको भन्दै विरोध जनाएका छन् । ‘आज किशोर राठौरजीसँग बस्ने कुरा भएको छ । उहाँहरू अहिलेकै जसरी हिँड्ने हो भने माओवादी केन्द्र पनि आफ्नै तरिकाले हिड्छ । त्यसको जिम्मेवार कांग्रेस र राठौर हुनुपर्छ,’ उनले भने ।

स्वतन्त्र उम्मेदवार सुनार भने गठबन्धनले आफूलाई नै आधिकारिक उम्मेदवार बनाएर चुनावी सभा र घरदैलोमा सँगै लगिरहेको बताउँछन् । ‘दलबहादुर नै बलियो उम्मेदवार हो भन्ने निष्कर्षसहित गठबन्धनले सँगसँगै हिँडाएको छ । आईपीजीले उम्मेदवारी निस्कृय पार्दा राम्रो हुन्छ,’ सुनारले भने, ‘हैन भने गठबन्धन एकातर्फ एकठाउँ हुने र आईपीजी एक्लै हिँड्ने हुन सक्छ ।’

बाँके ३ मा एमालेले जिल्ला अध्यक्ष किस्मतकुमार कक्षपतीलाई प्रतिनिधिसभा सदस्य, प्रदेशसभा ३ (१) मा जिल्ला सचिव रत्न खत्री र ३ (२) मा युवा नेता भीम वलीलाई उम्मेदवार बनाएको छ । खत्री २०७० मा एमालेबाट दलबहादुर सुनारले सो क्षेत्रबाट संविधानसभा सदस्य निर्वाचन जित्दा चुनावी कमाण्डर थिए । सत्तारुढ गठबन्धनको उम्मेदवार किचलो र माओवादी केन्द्रको आन्तरिक कलहको लाभ यसपटक उनले उठाउन सक्ने सम्भावना पनि छ । सो क्षेत्रमा एकीकृत समाजवादीको पनि केही प्रभाव छ ।

गठबन्धनले साझा उम्मेदवार बनाए पनि पार्टी छाडेर माओवादी केन्द्र प्रवेश गरेका सुनारलाई एकीकृत समाजवादीले सघाउने कमै सम्भावना छ । एमाले उम्मेदवार खत्री गठबन्धनको किचलोले भन्दा आफूप्रति मतदाताको भरोसाले आफू जित्ने स्थिति रहेको दाबी गर्छन् ।

‘गठबन्धनको हौवा धेरै भयो । केही हजार कार्यकर्ता एक ठाउँ हुँदैमा ती पार्टीमा विगतमा भोट हालेका मतदाताले गठबन्धनकै उम्मेदवारलाई भोट हाल्छन् भन्ने भ्रम छ,’ उनले भने, ‘कसलाई आफ्नो प्रतिनिधि बनाउने भन्नेमा मतदाता स्वतन्त्र छन् । यसपटक मलाई जिताउँछन् भन्नेमा विश्वस्त छु ।’

प्रकाशित मिति: शुक्रबार, कात्तिक ११, २०७९ १५:३२